राजीव मोटवानी

कंप्यूटर साइंस – सिंधी प्रोफेसर – फेमस सिंधी
जे तव्हां खे को चये त “तमाम वधीक पढ़ियिल लिखियिल सिंधी ” जे वासिते सिर्फ हिक अखरु बुधायो जेको इन्हन सभनी अखरन वासिते सागी मायना वारो हुजे त शायद त तव्हां ” विरलो ” चवन्दा। पर हाणे जे हू शख्स पहिंजो सुवाल बदिलाये “कंप्यूटर साइंस जो प्रोफेसर ” पुछे त पक ई पक तव्हां जो जवाब “अणथियणी ” हूंदो। इन अणथियणी खे हकीकत जो जामो पहिरायो फेमस सिंधी नवजवान राजीव मोटवानी जहिंजो जन्म 24 मार्च 1962 ते जम्मु में नमिता ऐं कर्नल होतचंद मोटवानी जे पुट्र जे रूप में थियो हो। पिता जे फौज में हुअण सबब राजीव बालपणे जा डीहं अलग अलग शहरन में गुजारिया आहिन। तहिं हूंदे बि राजीव देवलाली [नासिक] ऐं दिल्ली में घणो वकतु रहियो आहे। पहिंजी पढ़ण जी आदत बाबत पुछण ते हिक भेरो राजीव मोटवानी जवाब डिनो हो
“जे किताब पढ़ण बाबत चवां त इहा विरसे में मिलियिल आदत आहे छो जो असांजे कुटुंब में हर को किताब पढ़ण जो दीवानों आ। “टेन ग्रेट साइंटिस्ट ” या “फाइव फेमस मेथेमेटिशन्स ” जहिडा किताब पढ़ी मां बि विद्वान मेथेमेटिशन गॉस जहिडो मैथमेटिक्स जो जाणु थियण जो सपनो डिसण लगो हुयुस पर मुहिंजे पीउ जी दिली तमना हुयी त मां कंप्यूटर एक्सपर्ट थियां। इहो त जडिहिं मां आय आय टी कानपुर में दाखिला वरती त मां महसूस कियो त हकीकत में कंप्यूटर साइंस ऐं मैथमेटिक्स हिक जहिडायिन वारा खेतर आहिन।

आय आय टी कानपुर में इहे कंप्यूटर साइंस जा शुरुआती साल हुआ। हुअं बि 1970 -1980 जे समे में सजे देश में कंप्यूटर साइंस सेखारिण जूं सहूलियतूं हिकदम शुरुआती दोर में हुयूं । राजीव जो विशवास हो त “कंप्यूटर प्रोग्रामिंग सिर्फ हिक कोड़ लिखण न आहे , दरअसल इहो मसाइलन ऐं उनजे हल खे हिक सूत्र जे रूप में लिखण आहे। ” खुशकिस्मतीअ सां राजीव खे प्रोफेसर केसव नोरी जहिडियिन ज्ञानवान शख़्सियतुन जी रहबरी मिली सो हर का गालिह सवली थींदी वयी। 1983 में B.Tech. पूरी करण खां पोय राजीव UC Berkeley में दाखिला वरती ऐं 1988 में Ph.D. पूरी कियायीं।

हाणे राजीव जे सामहूं 1983 वारो सुवाल वरी अची वयो। उन वक़त सुवाल हो त वधीक पढ़ायी वासिते अमेरिका वञजे या भारत में रही नौकरी कजे त हाणे सुवाल हो त भारत मोटिजे या अमेरिका में ई रहिजे। हिते Don Knuth जंहिखे कंप्यूटर साइंस जी शुरुआत कन्दड़ विद्वानन मां हिक लेखियो वेंदो राजीव जी मदद ऐं सलाह वास्ते अगते आयो। हू राजीव सां मिलियो ऐं चयायिसं त हुनन खे स्टैनफोर्ड यूनिवर्सिटी में अलगोरिथमस वास्ते हिक नवजवान जी गोलिहा आहे। हिन गालिह राजीव खे अमेरिका में रहण जो फेसिलो करण में मदद कयी। राजीव बतौर कंप्यूटर साइंस जे प्रोफेसर स्टैनफोर्ड यूनिवर्सिटी सां जुडियो। हिन जी सजी रिसर्च जो मरक़ज़ हो थ्योरेटिकल कंप्यूटर साइंस। राजीव मोटवानी “Randomized Algorithms” and Introduction to “Automata Theory, Languages, and Computation” जहिडा किताब पिणु लिखिया।

मई 1989 में राजीव जी मुलाकात यूनिवर्सिटी ऑफ़ साउथ कैलिफ़ोर्निया जी ग्रेजुएट आशा जडेजा सां थी ऐं 22 मार्च 1990 ते बिन्ही शादी कयी। इन वक़त तायीं राजीव साइंटिस्ट , एंटरप्रेन्योर ऐं मेंटोर तौर मशहूर थी चुको हो छो जो केतिरन इंटरनेट स्टार्ट अपस जे पुठियां जेको दिमाग हो सो राजीव मोटवानी हो। ऐतिरो ई न पर स्टैंडफोर्ड जे केतिरन स्टार्टअपस में त हुन पैसा बि सीड़ाया हुआ। 1998 में हुन ब्रिन ऐं पेज खे गूगल बरपा करण में मदद कयी पर उन खां अगु राजीव Mining Data at Stanford project (MIDAS) बरपा करे चुको हो।

05 जून 2009 जो डींहुं राजीव मोटवानी बाबत दुख भरी खबर खणी आयो। खबर हुयी त राजीव जी संदस घर में पुल में बुड़ी वञण सबब मौत थी वयी आहे। राजीव खे श्रद्धांजली डीन्दे Sergy Brin चयो हो
” रीतसर त राजीव मुहिंजो सलाहकार कोन हो तहिं हूंदे बि हू मुहिंजी रिसर्च, पढ़ायी ऐं पेशेवर विकास में हिक अहमियत वारे किरदार जे रूप में मौजूद रहियो आहे। हू हिक होनहार ऐं विद्वान कंप्यूटर साइंटिस्ट हो जेको सभनी सां दोस्ताने नमूने हलन्दो हो। हिन जी ज़िंदगी या कम जो कहिडो बि हाल हुजे संदस दरु हमेशा खुलियिल हूंदो हो। मां आम तौर जडहिं बी राजीव जी ऑफिस वयुमि हुन खिलन्दड चेहरे सां मुहिंजो स्वागत कियो ऐं मुखे हिक मज़ेदार विचारन जी डे वठु में शामिल थियण जो मोको डिनायीं। “

राजीव बाबत Larry Page जो चवण हो
” राजीव हिक सियाणो सिंद्धांतवादी हो जहिं में सिद्धांत [Theory] खे हकीकत [प्रैक्टिकल] जो रूप डियण जी दिली तमन्ना ऐं आदत हुयी। संदस दर ऐं विचार करण जी सलाहियत जो फायदो बियन खे पहुचायिण वास्ते हू बे झिझक तैयार थी वेंदो हो। शुरुआती कम जिन सबब गुगल ठही तिन में राजीव काफी मदद कयी। ”
राजीव जहिड़ी शख्सियत बाबत मां बियो कुझु चवण जी जगह ते Larry Page जा अखर दोहरायिणु चाहीन्दुम “इन गालिह जो तमाम घणो इमकान आहे त तव्हां अजु जेका बि टेक्नोलॉजी वापिरायो था तहिं में थोरो या घणो राजीव मोटवानी जो हथु आहे। “