राम जवाहरानी

फेमस सिंधी समाज सेवी – सहयोग फाउंडेशन – ग्लोबल सिंधी कौंसिल
जे आज़ादी खां पोय जे समे जी गालिह कजे त इन हकीकत खां केर इंकार करे सघन्दो त श्री राम जवाहरानी, ग्लोबल सिंधी कौंसिल जो चेयरमैन, फेमस सिंधियिन जी जमात जो सरगनो आहे। हर उहो शख्स जहिं खे सिंधी ऐं सिंधियत वास्ते हुब आहे, चाहे उहो दुनिया जी कहिड़ी बि कुंड में छो न रहंदो हुजे , उहो राम जवाहरानी जे पहिंजी संस्था सहयोग फाउंडेशन (1988 में बरपा कयल ) जी मदद सां सिंधी समाज जी बुरायिन ऐं कुरीतियन – चाहे उहा सदियिन खां हलन्दड़ डेती लेती हुजे या हाणोके समे जे सिंधी नवजवानन जी बतौर फैशन ड्रग वापर जी आदत – बरख़िलाफ़ कमन सां वाकिफ आहे। सहयोग फाउंडेशन नामवर सिंधी शख़्सियतुन जो सत्कार करे बियन खे सामाजिक कमन वासिते पिण हिमथाये थो।

राम जवाहरानी जन जो जन्म 07 दिसंबर 1947 ते सिंध जे लाडकाणे जिले में थियल आहे। काफी नंढी उमर में ई हिनन खे अहसास थी वियो त सिंधी समाज में कला, तहज़ीब [Culture] ऐं साहित्य बाबत सुजागी जी तमाम घणी घटितायी आहे। सागे नमूने सिंधी समाज ऐं बियन समाजन में बि घटि में घटि विचारन जी डे वठु जे मामले में हिक विछोटी [गैप] आहे। इन्हन गालिहियिन खे धियान में रखी हुनन मुंबई में “सहयोग टाइम्स ” [अंग्रेजी अख़बार ] शुरू कयी। जहिं हू पाण न सिर्फ बतौर एडिटर लेख लिखन्दो हो पर बियन सिंधी ऐं ग़ैर सिंधी नामवर लेखन जा लेख बि छपिजंदा हुआ।

थोरे ई अरसे में समाज जे मसैलन डान्हुँ सुजागी, समाज वास्ते कमु करण जी हुब, गरीबन ऐं पुठिते पयलन जी मदद चाह , संदस हिमथ ऐं होसिले सबब राम जवाहरानी नवजवान सिंधी तबके वास्ते आदर्श समाज सेवी जो मिसाल बणिजी पियो। सिंधी इतिहास में दूरदशन जे हिक प्रोग्राम सिंधी सर्वेच जहिं में, एल के आडवाणी, राम जेठमलानी, डॉ सुरेश आडवाणी, डॉ इंदिरा हिंदुजा , गोविन्द निहालानी ऐं एडमिरल आर एच टहिलानी जहिड़ियूं लगभग 100 नामवर सिंधी शख़्सियतूं शामिल थी चुकियूं आहिन, जे बतौर इंटरव्यू वठन्दड संदस सिंधी तहज़ीब ऐं सामाजिक विरसे खे महफूज़ रखण वासिते डिनिल योगदान खे विसारे न सघिजे थो।
इहो राम जवाहरानी जी सिंधी बोलीअ खे महफूज़ रखण जी दिली चाहत जो इज़हार आहे जो हिन हिंदी फ़िल्मी दुनिया में पहिंजी सुञाणप जो फायदो वठन्दे फेमस सिंगर – महेंद्र कपूर, अनूप जलोटा, कविता कृष्ण्मुर्ती, उदित नारायण, साधना सरगम वगैरह खे सिंधी गाना गायिण वास्ते हिमथायो।

राम जवाहरानी मुंबई में सहयोग फाउंडेशन नाले सां सामाजिक, तहज़ीबी ऐं अदबी कमन वासिते संस्था बरपा कयी आहे। निसुवारथ भाव सां कमु करण सबब हिन वटि फंड्स जी कमी न रहन्दी आहे। सहयोग फाउंडेशन पारां केतिरिन बेसहारा विधवाउन खे मोफत सिलाई मशीन डिनियूं वयूं आहिन त केतिरा फ्री हेल्थ चेक उप कैम्प्स बि लगाया विया आहिन। स्वर्गवासी सुनील दत्त त राम जवाहरानी खे संदस नाले जी जगह ते “मिरेकल मॅन ऑफ़ मुंबई ” करे सडु कन्दो हो , त फेमस सिंधी वकील सियासतदान राम जेठमलानी वास्ते राम जवाहरानी सिंधी कौम जो तहज़ीबी नुमाईंदो आहे।

घणि हुनरी ऐं घणन सलाहियतुन जो मालिक राम जवाहरानी दूरदर्शन जी सिंधी टेली फिल्म्स “दान वीर ” ऐं “नियाणी निमाणी ” सां बतौर कहाणी लेखक जुडियिल आहे। हू हिक असिरायितो गालिहायीन्दड आहे जहिं खे हर मुनासिब मोके ते सिंधी तहज़ीब ऐं सिंधियत जे विरसे बाबत जाण डियण में महारत हासिल आहे।