Ram Panjwani
TSW Citation
राम पंजवानी हिक अहिडी शख्सियत जेका कंहिं बि कौम में क़ुदरती डाति तोर जनमु वठी थी। राम पंजवानी खे चाहे हिकु शख्सु लेखियो वञे पर हुन पंहिंजी हयात में इहो साबित कयो हू घणि हुनरी फनकार त आहे ई पर गडोगडु केतिरन ई शख़्सियतुन जो धणी पिणु आहे। जेकडहिं भगत जे रुप में राम पंजवानी भगत कंवर राम साहिबन जो बियो रूप आहे त संदस उहा बि शख्सियत आहे जेका सिंधी भाषा जे वाधारे ऐं सिंधियत जे वरसे वासिते सीता सिंधु भवन बरपा करे थी। जे फ़िल्मकार जे रूप में राम पंजवानी सामाजिक सुजागी वासिते शल धीउर न जमन जहिड़ी फिल्म थो ठाहे त सिंधी लोक कला भगत जे वरसे खे हर सिंधी घर तायीं पहुचायिण भारत जे हर सिंधी आबादी वारे शहर / गोठ में प्रोग्राम करे थो। साहित्यकार रूपी शख्सियत जो लिखियिल किताब आहे न आहे सचु थो चवे त अजु राम पंजवानी असांजे विच आहे त न बि आहे। टीम TSW खे पूरो विशवास आहे त रहन्दी दुनिया तायीं सिंधियत जा शैदायी अनोखा आजमूदा करण वारे राम पंजवानी खे यादि कन्दा।
(आहे न आहे, अनोखा आजमूदा, ऐं यादि कन्दा इहे राम पंजवानी जे लिखियल किताबन जा उनवान आहिन)
सिंधी आहियां – सिंधी आहियां – सिंधी मुंहिंजी बोली – कीयं विसारियां बोली – जंहिं में माउ डिनी हुयी लोली
बायोग्राफी -राम पंजवानी
फेमस सिंधी लेखक, कवी, लोक गायक ऐं तैलीमदान [ Educationist]
सिंध जी सरज़मीं संतन, दरवेशन, फ़कीरन , कवी, लेखकन ऐं बियन महान शख़्सियतुन जी जन्म भूमी तौर मशहूर आहे। 20 नवंबर 1911 जी तारीख सिंध ऐं सिंधी कौम जे इतिहास में सुनहरी लफजन में दरजु आहे छो जो इन डीहं ते लासानी सिंधी कवी, फेमस सिंधी भगत ऐं तैलीमदान प्रोफेसर राम पंजवानी जो जन्म लाडकाणे जे मशहूर ज़मींदार कुटुंब दीवान प्रताप राय पंजवानी जे घर थियो हो। पंजवानी कुटुंब सजे सिंध में पहिंजी सिंधी तहज़ीब ऐं सिंधियत वास्ते चाह लाय मशहूर हो बार राम पंजवानी खे बि उहे संस्कार मिलिया। हुन खे जल्दु ई समझ में अची वियो त सभ्यता जी कहिड़ी अहमियत आहे, सिंध जे आलिशान विरसे ऐं रुहानी विचारधारा खे महफूज़ रखण छो ज़रूरी आहे।
पदम श्री प्रोफेसर राम पंजवानी न सिर्फ हिकु महान सिंधी लेखक हो पर गडोगडु सिंधी सभ्यता ऐं संस्कृति जो पुजारी बि हो। प्रोफेसर राम पंजवानी सिंधीअ खां सिवाय पर्शियन, हिंदी, अंग्रेजी, उर्दू ऐं पंजाबी भाषाउन जो विद्वान हो। 1934 में बॉम्बे यूनिवर्सिटी मां बी ए करण खां हुन कराची जे डी जे सिंध कॉलेज में टीचर जी नौकरी करण शुरू कयी।
1947 जे मुल्क जे विरहांङें खां पंजवानी कुटुंब मुंबई लड़े आयो जिते हू बतौर हेड ऑफ़ सिंधी डिपार्टमेंट जय हिन्द कॉलेज सां जुडियो। जल्दु ही राम पंजवानी खे मुंबई यूनिवर्सिटी में सिंधी जे रीडर तौर कमु करण जो मोको मिलियो जिते अगते हली हुन [16 -06 -1974 खां 19 -11 -1976 तायीं] सिंधी डिपार्टमेंट जे हेड तौर कमु कियो।
राम पंजवानी मशहूर सिंधी भगत कंवर राम जे दरिजे जो गायक ऐं भगत साहिब जहिडियिन सलाहियतुन जो धणी हो। हिन जो आवाज़ ऐड़ो त मिठो ऐं जादुई असर वारो हो जो आमु तौर बुधण वारा पाण विसारे विहन्दा हुआ। सिंधी लोक संगीत ऐं गायिकी में प्रोफेसर राम पंजवानी हिकु नवों अध्याय जोड़ियो छो जो भगत जे दौरान संगीत वास्ते हिन घड़े / मटकी खे कमु आणिण जी रीत शुरू कयी। अजु बि “वाह वाह रे घड़ा वजु वजु रे घड़ा ” माणुहू जी ज़ुबान ते आहे। भगत जे दौरान राम पंजवानी जो कहाणी बुधायिण जो अंदाज़ निरालो हुओ। मां खुशनसीब आहियां जो मुखे प्रोफेसर साहिब जी भगत बुधण जो मोको मिलियो आहे। अजु बि याद आहे भगत साहिब जी कहाणी जहिं में राजा जे दरबार में , नाच कन्दड़ नारी, संदस तबलची गुस्ताखी खे संभालिण वास्ते गाये थी “कुछ गुजरी, कुछ बाकी , रंग में भंगु न पाय ढोलण रंग में भंगु न पाय। “
प्रोफेसर राम पंजवानी जो अदबी सफर संदस पहिरियें नॉवेल “पदमा ” सां शुरू थियो जेको 1939 में छपजियो हो। कुछ बिये रचनाऊँ, जिन प्रोफेसर राम पंजवानी जी मशहूरीअ में इज़ाफ़ो कियो से आहिन “कैदी , शर्मिला, असांजो घर, आहे न आहे ऐं शल धीउर न जमन। “
1964 में छपियिल “अनोखा आजमूदा ” वास्ते प्रोफेसर राम पंजवानी खे साहित अकडेमी अवार्ड सां नवाज़ियो वियो। सिंधी बोली वास्ते भगत खे बेहद प्यार हो ऐं सिंधी बोली भारत जे संविधान जे अट्टें शेड्यूल में शामिल थिये इन वास्ते हुन कोशिशिन जी हद कयी।
सिंधी सभ्यता संस्कृति जे आलिशान विरसे जी संभाल ऐं सिंधी लोक संगीत जे वाधारे वास्ते हिन “सीता सिंधु भवन ” बरपा कियो। सिंधी साहित जी अजीमोशान हस्ती शाह अब्दुल लतीफ़ जे लिखियिल ऐं शाह जो रिसालो में शामिल मूमल राणो ऐं उमर मारवी जहिडियिन लोक कहाणिन खे नाटक जे रूप में पेश करण खां सिवाय प्रोफेसर राम पंजवानी पहिंजे नॉवेल “शल धीउर न जमन ” ते आधारित सागे नाले वारी सिंधी फिल्म खां सिवाय कुछ बियन फिल्म्स “झूलेलाल, लाड़ली ऐं होजमालो” वगैरह में पिण कमु कियो हो।
1981 में राम पंजवानी जी सिंधी कौम ऐं अण सिधे नमूने भारत जे नागरिकन जी कियिल सेवा खे धियान रखी भारत सरकार हिन खे “पदम श्री “अवार्ड डियण फेसिलो कियो। 31 मार्च 1987 ते सिंधी कौम शान वधाइन्ड लासानी सिंधी लेखक ऐं सिंधियत विरसो संभालीन्दड़ प्रोफेसर राम पंजवानी स्वर्गवास थियो।
के लक़ब जिन सां राम पंजवानी जहिड़ी शख्सियत खे नवाजिये / याद करे सघिजे थो से आहिन
– फेमस सिंधी लेखक राम पंजवानी
– तैलीमदान राम पंजवानी
– भगत [लोक गायक] राम पंजवानी
– कवी राम पंजवानी
– एक्टर [अदाकार] राम पंजवानी
– सिंधी नाटक – स्टेज ड्रामा (हिदायतकार) राम पंजवानी
– सिंधी फ़िल्मकार राम पंजवानी
राम पंजवानी - हासिल अवार्ड
1964: साहित्य अकादमी अवार्ड (सिंधी भाषा) – अनोखा आजमूदा (यादगिरियूं)
1965: डॉ चोइथराम गिडवानी अवार्ड
1970: राजस्थान सिंधी अकादमी पारां सिंधु रतन अवार्ड
1981: पदम श्री
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.