सबीर भाटिया

सिंधी समाज जे नवजवानन – सिंधी युथ केतिरिन ई मोकन ते इहो साबित कियो आहे त न सिर्फ रिवायती खेतर धंधे वापार में पर एन्टरप्रेनुएरशिप में बि सिंधी पोयिते कोन आहिन। हिन भेरे वारो हुओ सबीर भाटिया जो, जहिं हिकु भेरो वरी इहा गालिह सचु साबित कयी। सबीर भाटिया इन गालिह खे त सिंधी युथ तकनीकी खेतर में अगते अचण में झिझक महसूस करे थो हिकु भरम साबित कियो। बेंगलोर जे सेंट जोसेफ बॉयज हाय स्कूल में पढ़ायी करे सबीर भाटिया वधीक पढ़ायी वास्ते बिर्ला इंस्टिट्यूट ऑफ़ टेक्नोलॉजी एंड साइंस [BITS, Pilani] में दाखिला वरती। अगते हली हुन स्टैनफोर्ड यूनिवर्सिटी मां मेकेनिकल इंजिनयरिंग में [अल्ट्रा लो पावर [ VLSI Design from] में महारत ] एम.एस. जी डिग्री हासिल कयी।

हॉटमेल बाबत ज़ाहिर करण खां अगु थोरे वकत लाय सबीर भाटिया एप्पल कंप्यूटर ऐं फयर पावर सिस्टम इनकारपोरेशन वास्ते कमु करे चुको हुओ। इहो 4 जुलाई 1996 जो डींहुं हुओ – उहो डींहुं जेको अमेरिका में आज़ादी जी निशानी समझी मलिहायो वेन्दो आहे – मतलब अमेरिका जो ब्रिटिश राज खां आज़ादी हासिल करण वारो डींहुं, जो सबीर भाटिया पहिंजे सहकारी जैक स्मिथ सां गडु हॉटमेल जी शुरुआत ज़ाहिर कयी। हॉटमेल मतलब रिवायती ISP बेसड ई मेल खां आज़ादी – हॉटमेल मतलब यूजर खे आज़ादी त हू दुनिया जी कहिं बि कुंड मां पहिंजो इनबॉक्स चेक करे सघे।

सबीर भाटिया जो जन्म हिक सिंधी परिवार में बलदेव भाटिया जे पुट्र जे रूप में 30 दिसंबर 1968 ते थियो आहे। पिता फौज में कैप्टेन हुओ त माता सेंट्रल बैंक ऑफ़ इंडिया में नौकरी ते। कुदरती तोर सबीर भाटिया खे डिसिपीलीन ऐं वक़त जी अहमियत समझण जी सिखिया बालपणे खां मिली। कॉर्पोरेट दुनिया में तरकी करण में इन सिखिया सबीर खे काफी मदद कयी। 2008 में सबीर जी शादी तान्या शर्मा सां थी ऐं जोड़े खे हिक धीउ पिण जाई। बदकिसिमती सां जोड़े जो इहो नातो घणे अरसे वारो न साबित थियो 2013 में उन्हन सान फ्रांसिस्को जी अदालत में धार थियण [डाइवोर्स] वास्ते अरजु दाखिल कियो।

1998 में सबीर भाटिया हॉटमेल जे प्रेसीडेंट ऐं CEO तोर माइक्रोसॉफ्ट सां कियिल करारनामे ते सही कयी। इन करारनामे मूजिब अंदाज़े $400 million जी ऐवज़ में माइक्रोसॉफ्ट खे हॉटमेल जा मालिकाना हकु मिलिया। पेसन जे लिहाज खां सबीर भाटिया वास्ते इहो करारनामो काफी वड़ो हुओ, खास करे जेकडहिं इहो धियान में रखिजे त 19 सालन जी उमिर में जहिं वकत सबीर लॉस एंजेल्स जी धरती ते कदम रखियो हो त संदस खीसे में सिर्फ $250 हुआ। इन करारनामे खां पोय बि लगभग हिकु साल अप्रैल 1999 तायीं सबीर माइक्रोसॉफ्ट वास्ते कमु कियो। चवन था त माइक्रोसॉफ्ट जी नौकरी छड़िण खां पोय ई कॉमर्स कंपनी आरज़ू इनकारपोरेशन बरपा कयी हुयी।

JaxtrSMS – जेका फ्री मेसेजिंग सर्विस तोर पेश कयी वयी – जी शुरुआत ज़ाहिर करण वकत सबीर काफी जोश में हुओ पर न त इहा सेवा संदस उमीद मूजिब कामियाब थी आहे ऐं न ई हॉटमेल जहिड़ो ज़ुदायी करिश्मो – जहिं सबीर खे सॉफ्टवेयर पोस्टर बॉय ठाहे छड़ियो हो – पैदा करे सही आहे। आइडियाउन जी खोजना कन्दड़ सबीर भाटिया खे 1997 में venture capital firm Draper Fisher Jurvetson, साल जो एंट्रेप्रेनुएर अवार्ड डिनो। 1998 में San Jose Mercury News and POV magazine सबीर भाटिया खे डहन सभ खां वधीक कामियाब एंट्रेप्रेनुएर में शुमारियो। TIME जी 2002 जी पीपल टु वॉच लिस्ट में पिण सबीर जो नालो शामिल हुओ।