इनकम टैक्स बचायिण जा तरीका

हिकु भेरो वरी मुहिंजे सामहूं निखिमिणोमल विराज़मान हुओ ऐं दस्तूर मूजिब हिन भेरे बि संदस फ़रमाइश या चाहत बि नयीं हुयी। हुन जो चवण हो त मार्च अची पहुती आहे सो बेहतर थींदो जे मां खेस इनकम टैक्स बचायिण जा कुछ तरीका बुधायां।मां चवण चाहियो पे त मां त विज्ञानं जो तालबे इल्म आहियां पर हमेशा वांगुर हिन भेरे बि निखिमिणेमल मुखे चप चोरिण जो मोको न डिनो। 

मां बुधो आ एस पी सर त तव्हां कुछ साल अगु ज़ी टी वी जे प्रोग्राम पब्लिक का वितमंत्री में शामिल थी चुका आहियो सो तव्हां खां बेहतर बियो केर थी सघे थो जेको इनकम टैक्स बचायिण में मुहिंजी मदद करे सघे।

पर साईं निखिमिणामल तव्हां खे त लगभग 5 लख रुपया पेंशन मिलन्दी आहे सो जे तव्हां डह वीह हज़ार रूपया टैक्स भरी बि त तव्हां खे कहिडो फरकु पवन्दो।

पर मुहिंजो जुमलो पूरो थियण खां अगु ई निखिमिणेमल जो चेहरो डिसी मुखे लगो मां खेस सलाह न डिनी आहे पर शायद नांग जे पुछ ते पेर रखियो आहे। ततल तये जहिड़े गाडिहे चेहरे वारे निखिमिणेमल जे वातां निकितल – बरसात जी खिवण जी गज़गोड करण – आवाज़ मुहिंजा होश खता करण में का कसर बाकी न रखी।

छा पियो चवो इनकम टैक्स भरिण सां मुखे कहिड़ो फरकु पवंदो ? अड़े मां टैक्स भरियां त छो भरियां ? कहिंजे लाय टैक्स भरियां ?

मां तमाम कमज़ोर आवाज़ में चयो साईं निखिमिणामल सरकार जो खरचु त टैक्स जी कमायी ते हलन्दो आहे न ? ही जेके रोड ठहन पिया, नवां नवां एयरपोर्ट पिया अडजन या कुड़मिन जो करज़ु माफ़ पियो थे उन वास्ते घुरबल पैसा टैक्स मां ई त मिलन था।

साईं एस पी सर तव्हां अलाये कहिड़ी दुनिया में पिया रहो ? मां तीह साल डींहुं रात हिकु करे नौकरी कयी ऐं पोय बि पेंशन ते टैक्स भरियां ? हाणे असांजे नेताउन खे डिसो ? चूंडियूं खटण पोय हर को करोडासपती थी थो पवे या अग में ई आहे। उन खे त न सिर्फ लगभग मुफ़त में खाधो थो मिले [ विधान सभा ऐं लोकसभा जी केंटीन जा अघ चेक करे डिसो] पर उन खे मिलण वारी पगार ते बि का टैक्स कोन्हे ? जे इहे टैक्स न था भरिनि त पोय मां छो भरियां ?

बियो त परे असांजा वापारी विकरो त कनि करोड़न में पर नफो डेखारिन था चार पंज लख ? बिन रूपयिन वारी कोल्डड्रिंक 15 रूपये में विकिण वारी कंपनी जाहिरात ते अंधाधुंध खरचु थी करे पर टैक्स न थी भरे ऐं तव्हां चवो था त मां टैक्स भरियां ?

गुसे में भरियिल निखिमिणोमल त उथी हलन्दो थियो पर मां सोचियां पियो त शायद मूं गलती कयी जे निखिमिणोमल वेठो हुजे हां त शायद मुखे बि टैक्स बचायिण जा ब – चार तरीका खबर पयजी सघन हां। निखिमिणोमल को अजु त रिटायर कोन थियो हो। पंजन सालन खां पेंशन वठी रहियो आहे सो हुन अग में बि कहिं न कहिं नमूने पाण खे टैक्स भरिण खां ज़रूर बचायो हूंदो।