भोलो भंडारी

रोज़ जी सुबह सवेल उथण जी आदत ऐं मथां वरी शिव जे करे निखिमिणेमल खे असुर में उथारिण जी जवाबदारीअ – मतलब निम जे रस में बुडियिल करेलो। हाणे तव्हां पाण विचार कियो त जेको शख्स रात जो 11 बजे खां पोय घरवारी सां डिनर जे मीनू बाबत सलाह मसलत कंदो हुजे उन खे 3 बजे उथारिण को सवलो कमु त न आहे।

पर हरिदवार में चवंदा आहिन न फिसल पड़े तो हर हर गंगे सो मूं बि लाचारी में उथी निखिमिणेमल जे घर जी घिटिअ जो रुख कियो। बुधो हो त शहर जे सभु खां वड़े ऐं खौफनाक आवाज़ में भोकिण वारन कुतन जो पसंदीदा रिहाइशी स्थान इहा घिटी आहे। सो मां ओम नमो शिवाय जे मंत्र जो जाप कंदे ऐं भोले भंडारी खे तांडव जे ताप खां बचायिण जी प्रार्थना कंदे घिटिअ में पहिरियों डकंदड़ कदम रखियो।

शायद त इहो ओम नमो शिवाय जो असर हो जो तुरत राज़ी थियण वारे भोले भंडारी जी महर सां मां बिना कहिं कुते जा दर्शन करे निखिमिणेमल जे दर तायीं पहुची वियुम। साह में साह पियो त ओम नमो शिवाय जे मंत्र जो जाप बि बंद थियो।

बस दरू खटिखटायिण जी देर हुयी जो मुहिंजो मथियों साहु मथे त हेठियों साहु हेठ रहिजी वियो। घिटिअ में ऐतिरो गौड शुरू थी वियो जो मूं लाय त पहिंजे दिल जी धड़कन बुधण बि डुखियो थी वियो। जहिं तांडव जे ताप खां बचण जी आरज़ू हुयी सो मूहिंजे सामहूं कुछ कदमन जे मुफासिले ते वातु फाड़े बीठो मुखे निहारिये पियो।

इहो त भोले भंडारी भलो करे निखिमिणेमल जो जहिं बिलकुल सही वक़त ते दरु खोले मुखे अंदर गीलिहे वरितो ऐं मुखे 14 सुयूं हणायिण खां बचाये वरतो। हकीकत में मुखे सुरत त निखिमिणेमल जो आवाज़ – एस पी सर शिव जूं वाधायूं हुजन तव्हां खे – बुधी आयी।

हाणे जे होश ठिकाणे ते आहिन त छो न मां बि पहिंजो फरज़ु पूरो करे वठां – भोले भंडारी शाल सभनी जो भलो करे – सभनी खे शिव जूं वाधायूं।