जवाब चौथें किसम जो

कल्ह हिकु फॉरवर्ड थियन्दड मैसेज पढ़िहण जो मोको मिलियो।
सजी दुनिया जा माणुहू सिर्फ ट्रिन नमूनन में जवाब डियन था
[1] हा [2] न [3] शायद या खबर कोन्हे 
सिर्फ हिक सिंधी कौम आहे जहिं में चौथें नमूने मतलब तोखे छा करणो आहे ? जे रूप में बि जवाब डिनो वंञे थो।

मां सोचियां पियो त सिंधी कौम में इहो बियन खां अलग चौथें नमूने जो जवाब डियण जो गुण किथां आयो ? छा इहो बि सिंधियत जे वरसे जो हिसो आहे ? छा सिंधी कौम सवाल न समझी सघन्दी आहे जो बियन खां जुदा चौथें नमूने जो जवाब डिये थी ? इयें त न आहे त हाणोके ज़माने जी हलत मूजिब पाण खे बियन खां जुदा डेखारिण /साबित करण जी कोशिश हेठ सिंधी कौम जाणी समझी इहो चौथें किसम जो जवाब डियण जी रीत शुरू कयी आहे ?

मुहिंजे विचार सागर वास्ते निखिमिणेमल जो आवाज़ हिकु वडो रुखनो साबित थियो जेको चयी रहियो हो इहो त थियणो ई हुओ एस पी सर ! पर पहिंजन विचारन में गुम हुअण सबब या चौथें नमूने जे जवाब जे असर हेठ मुखे बुधण में आयो प्यार तो होना ही था। सुबह सां प्रभात वेले निखिमिणेमल जे वातां हिक हिंदी फिल्म जे नाले मुखे अज़ब में विझी छडियो पर मुहिंजो अज़ब ततल तये जो पाणी फुड़ो साबित थियो छो जो विहंदे ई निखिमिणोमल शुरू थी वियो।

तव्हां शायद बुधो न एस पी सर मां चयोमांव इहो त थियणो ई हुओ।

उहो त ठीक आहे साईँ पर मां समझुम न त छा थियणो ई हुओ ?

कल्ह तव्हां बुधायो पिया न एस पी सर ! त हिक अखिल भारतीय सिंधी संस्था जे कहिं ओहदेदार कहिं रचनाकार जी रचना में रचनाकार जो नालो हटाये पहिंजो नालो लिखी रचना शेयर कयी।

हा त उन जो छा ?

छा न एस पी सर ! इहो मुहिंजो जवाब आहे तव्हां जी गालिह जो त इहो त थियणो ई हुओ।

पर साईं निखिमिणामल मां समझुम न ?

चाहिं ढुक भरे निखिमिणेमल चयो
मां समझायो किथे आहे जो तव्हां खे समझ में अचे ! डिसो एस पी सर मां विचार कियो ऐं इन नतीजे ते पहुतो आहियां त सोशल मीडिया ते मौजूद सिंधी ट्रिन किसमन तायीं महदूद न आहिन छो जो चाहे अटे में लूण जेतिरा छो न हुजन पर इन ओहदेदार जहिड़ा चौथें किसम जा सिंधी बि सोशल मीडिया ते वज़ूद रखन था।

त साईँ निखिमिणामल तव्हां जे हिसाब सां सोशल मीडिया जे सिंधियन जा ट्रे बुनियादी किसम कहिड़ा आहिन ?

चाहिं जो खाली कोप हेठ रखन्दे निखिमिणेमल चयो ध्यान सां मुहिंजी गालिह बुधिजो एस पी सर।

सो त मां बुधण वारो हुयुम छो जो निखिमिणेमल जो कहिड़ो भरोसो चाहिं पी पूरी करे चुको हुओ सो कहिं महल उथी हलन्दो थींदो इन जो को भरोसो कोन्हे।

डिसो एस पी सोशल मीडिया ते मौजूद सिंधियन में वड़ो तादाद उन्हन जो आहे जेके सिर्फ पहिंजो सोशल स्टेटस कायम रखण वास्ते सोशल मीडिया ते आहिन। इन्हन लगभग 70 खां 80 % सिंधियन मां अध खां वधीक त अहिड़ा आहिन जेके पंजे अठें डींहुं मैसेज मस था डिसन। मतलब इहे नाले में निहाल आहिन। न त इन्हन जो मतलब आहे न इन्हन खे खबर पवे त अजु सोशल मीडिया जो हॉट टॉपिक कहिड़ो आहे ? मतलब इहे सिर्फ मैसेज पढ़िहण वारा आहिन। जे बाबे ते अहसान करण जी गालिह याद अची वियन त छट छःमाही को मैसेज फॉरवर्ड करे पहिंजी जवाबदारी पूरी करे पहिंजी मौजूदगी जो अहसास बि करायिन। 

बियो किसम उन्हन जो अथव एस पी सर जिन जे वास्ते वकतु गुजारिण हिकु वड़ो प्रॉब्लम आहे ? इहे घणे भांगे या त रिटायर थियल सरकारी नौकर आहिन या अहिड़ा वापारी जिन जा बार धंधो संभाले वेठा आहिन। के विरला सिंधी नवजवान जिन जो धंधो नौकरन जी मदद सां सुठो हले पियो से बि हिन किसम में कुछ हद तायीं शामिल आहिन। सोशल मीडिया ते मौजूद सिंधियन में इन्हन जो तादाद लगभग 15 खां 20 % थिये ऐं हकीकत में इहे ई सोशल मीडिया खे मज़ेदार ऐं जियरो बणाये वेठा आहिन छो जो इन्हन जो इकलोतो कमु आहे मैसेज फॉरवर्ड करण।

बाकी बचिया 5 खां 10 % तव्हां जहिड़ा सिंधी त एस पी इहे न सिर्फ ट्रियें किसम जा सिंधी आहिन पर इहे बिन किसमन बि विरहायिल आहिन। के तमाम थोरा तव्हां जहिड़ा जेके सिर्फ ऐं सिर्फ पहिंजा तयार कियिल मैसेज शेयर कनि था त बिया अहिड़ा आहिन जेके पहिंजन मैसेजन सां गडु बियन जा बि मैसेज शेयर कनि था।

इहे त ट्रे किसम थिया न ? तव्हां त चौथें किसम जी बि गालिह पे कयी ?

कुछ त सबुर कियो न एस पी सर ! चौथें किसम ते बि अचां थो न ? पर पहिरियूं हिक गालिह त आखिर उन ओहदेदार जी इहा असली रचनाकार जो नालो कटे पहिंजो नालो लिखण जी गालिह तव्हां खे गैर अखिलाखी ऐं ऐतिरो चुभन्दड़ महसूस छो थी ?

सचु पुछो त गालिह निकती त मां बि इहो पियो सोचियां त आखिर कबीरा तेरी झोपड़ी गलि कटियन के पास जो करेंगें सो भरेंगें तू क्यों भयो उदास में विश्वास करण वारे खे उन ओहदेदार जी इहा हरकत ऐतिरी खराब छो लगी ?

त एस पी सर इन जो सिर्फ ऐं सिर्फ हिकु जवाब आहे त तव्हां इन्सांफ पसंद इंसान आहियो। तव्हां पहिंजा मैसेज पाण तयार कियो था सो तव्हां खे खबर आहे त हिक रचनाकार खे केतिरो वकतु ऐं अभ्यास लगे थो का बि रचना करण में।

हाणे अचो त चौथें किसम जो विचार कयूं। इहे हकीकत में बियें किसम में शामिल उहे तमाम विरला आहिन जेके सोचिन था त फॉरवर्ड करण में वकतु त विंञायूं था सो छो न शौहरत बि हासिल कयूं ? इन वास्ते करणो त सिर्फ ऐतिरो आहे न त फॉरवर्ड करण खां अगु असली रचनाकार जो नालो हटाये पहिंजो नालो लिखणो आहे। हाणे मशहूरी हासिल करण वास्ते ऐतिरी मेहनत त करणी पवंदी न ?

पर साईं निखिमिणामल ! मशहूर त बियें किसम वारा बि आहिन न ?

तव्हां सही था चवो एस पी सर पर उहे सिर्फ मशहूर आहिन उन्हन खे रचनाकार जो लक़ब हासिल न आहे ?

त दोस्तों निखिमिणेमल मूजिब इन सवाल त सोशल मीडिया ते मौजूद सिंधियन जा किसम घणा आहिन ? जा चार जवाब आहिन। मुखे खबर आहे त तव्हां मां कुछ हीउ लेख फॉरवर्ड करण वास्ते बेसबिरा थी रहिया आहिन, ज़रूर फॉरवर्ड कियो पर पहिरियूं इहो फेसिलो कियो त इन्हन चयन जवाबन मां तव्हां कहिड़ो जवाब चूंडियो था ? बियों जवाब या चौथों जवाब ?