सिंधी बोली ऐं सिंधी भाषा जो कमज़ोर थियण

इहो समझण ज़रूरी आहे त भाषा जा ब हिसा थियन बोली (गालिहायिण) ऐं लिपी (लिखण) ऐं सिंधी अहिड़ी भाषा आहे जहिं जे लिखण वास्ते अरबी लिपी ऐं देवनागिरी लिपी त आहिन ई पर वेझडायी में अंग्रेजी भाषी मुलकन में रहण वारन सिंधियन सिंधी भाषा खे लिखण वास्ते अंग्रेजी या रोमन अल्फाबेट कम आणिण जी शुरुआत कयी आहे जहिं रोमन लिपी पियो चयो वञे। हिते किन जो सवाल ज़रूर थी सघे थो त एस पी सर जे सिंधी भाषा वास्ते अरबी ऐं देवनागिरी बिन्ही लिपिन जो वापर थिये थो त पोय अरबी लिपी न अचण वारन वास्ते इहो छो थो चयो उन्हन खे सिंधी न थी अचे ?

इन सवाल जो जवाब डियण खां अगु मां हिकु आज़मूदो शेयर करण चाहियां थो। मुहिंजे हिक सिंधी अदीब दोस्त खे कहिं सरकारी ट्रेनिंग वास्ते दिल्ली में हिकु महीनो रहण जी ज़रूरत पयी। संदस हिक बिये दोस्त चयुस त जिते तव्हां जी ट्रेनिंग थियणी आहे उन जगह जे बिलकुल वेझो मुहिंजा साहुरा मायट्र रहन्दा आहिन जिन जे घर जो सेकंड फ्लोर घर में सिर्फ चार मेंबर्स हुअण सबब खाली पियो हूंदो आहे सो सुठो थींदो जे तव्हां इहो हिकु महीनो उन्हन जे घर रहो। हुन जे राज़ी थियण ते बंदोबस्त थी वियो ऐं सूमर खां शुरू थियण वारी ट्रेनिंग वास्ते असां जो साहित्यकार [कवी] दोस्त छंछरवार डीन्ह वञी दिल्ली पहुतो। हुन महसूस कियो त घर जे बिन बारन भाउ भेण मां छोकिरी जो संदस बाबत जाण हासिल करण में वधीक चाहु आहे सो उहा नियाणी असां जे कवी दोस्त सां वधीक पयी वार्तालाप करे। असां जे कवी दोस्त बुधायो हो त एस पी सर विशवास कियो या न पर उन 15 सालन जी नंढड़ी बालिका मुहिंजो जो बि मनु मोहे वरतो हुओ। इहो सचु आहे त उन जे सिंधी गालिहायिण में काफी वधीक अंग्रेजी हिंदी अखर कम पिया अचन पर जहिं गालिह मुहिंजो मन मोहे छड़ियो सा हुयी उन नियाणी जी सिंधी वास्ते हुब।

पहिरियें ई आरतवार ते स्कूल जी छूटी हुअण सबब नेरन खां पोय उन जा सवाल शुरू थी विया। एस पी सर इहो त शायद तव्हां वास्ते बि अज़ब में विझण वारो सवाल थी सघे थो जेको उन नियाणीअ मुखां पुछियो। अंकल छा तव्हां मुखे सिंधी सेखारीन्दा? पापा चवन था त तव्हां त सिंधी में पोयम्स [कविता] बि राइट [लिखन्दा] आहियो? धियान डियण जोग त असां जे कवी दोस्त जो जवाब बि आहे। बेटा जी हीउ जेको असां पाण में कल्ह खां गालिहाये रहिया आहियूं इहा ई सिंधी भाषा आहे पर तूं शायद त सिंधी लिखण जी गालिह चवण चाहीं थी छो जो तोखे सिंधी त अचे थी शायद लिखी न थी सघीं।

मुहिंजो हीउ आज़मूदो शेयर करण जो हिकु ई मकसद आहे त सिंधी नवजवान इहो महसूस कनि त सिंधी भाषा त उन्हन खे अचे थी कहिं वटि वञी सिखण जी ज़रूरत न आहे। ज़रूरत आहे त सिर्फ सिंधी भाषा जो वापर [उपयोग] वधायिण जी।