सिंधी लोक कहाणियूं ऐं साहित्य

जडिहिं मां माज़ी जे परदे ते पंहिजे बालपणे जी फिल्म डिसन्दो आहियां त हिकु नज़ारो नज़रुन में तरी ईंदो आहे। हिकु डहन सालन जो छोकिरो पंहिजे पीउ खां मास्टर चन्दर जी बुधायल ऐट्र जी आखाणी बाबत पुछी रहियो आहे ऐं समझण जी कोशिश करे रहियो आहे त कीअं हिक छोकिरी जेका घर में अकेली हुयी सां पंहिंजी समझदारी सां सुतल नौकर खे जागाये चोरन खां पंहिंजो घर बचाये थी। मुखे खातिरी आहे त तव्हां मां पिणु घणन वटि अहिडिन अमोलक यदिगिरिन जो खज़ानो ज़रूर हूंदो।
इहे उहे कहाणियूं आहिन जेके साहित्य में न थियूं मिलन छो जो इन्हन जे रचनाकार या लेखक बाबत कंहिं वटि का जानकारी न आहे पर सदियिन खां वठी हर नवजवान पीढ़ी पहिंजन वड़न खां इहे कहाणियूं बुधन्दो अचे थी। इहे कहाणियूं लोक कहाणियूं लेखियूं वेंदियूं आहिन।
दरअसल में डिसजे त साहित्य छा आहे त घटि में घटि मुखे त हिकु ई जवाब मिले थो ऐं उहो इंसान जी इन फितरत सां लागापो रखे थे थो त इंसान जे बुनियादी गुणन मां हिकु गुण आहे पंहिंजो ज्ञान अचण वारी नयीं पीढ़ी खे डियण। इंसान जे इन स्वभाव बोली खे भाषा में बदिलायो मतलब लिखण जी शुरुआत थी ऐं ज्ञान जो इहो लिखियिल रूप ई साहित्य आहे। चाहे लोक कहाणियूं रिवायती साहित्य जो हिसो न लेखियूं वंञन पर आहिन इहे बि साहित्य ई ऐं इन किसम जे साहित्य जो नालो आहे लोक साहित्य।
तव्हां जेको बाजार मां पंच तंत्र जी कहाणिन जो किताब खरीद करे बारन खे पढ़िहण लाय डियो था उहो काफी आहे इहो समझण वासिते त इंसान जी ज़िंदगी में लोक कहाणिन ऐं लोक साहित्य जी केतिरी अहमियत आहे। सिंधी अदबी दुनिया में अजीमोशान हसिति लेखियो वेन्दड शाह साहिब पिणु सतन बेहद मशहूर सिंधी लोक कहाणिन खे सत सुहिणियूं चवन्दे पंहिंजी लासानी रचना शाह जो रिसालो में शामिल कयो आहे।
भारत में जावल सिंधी पीढ़ियूं मुनासिब ऐं मुफ़ीद सिंधी माहोल न हुअण सबब इन्हन सिंधी लोक कहाणिन खां महरूम रहिजी वयूं आहिन सो उन्हन वासिते इहे हिते शामिल कयूं था।
सिंध जो ट्रैजिक रोमांस ऐं लोक साहित्य
मां जडिहिं सिंध जे ट्रैजिक रोमांस जी गालिह चवंदो आहियां त आम तोर सिंधी नवजवान तबको अज़ब में पियल महसूस थींदो आहे छो जो सिंधी लव स्टोरी त उन्हन जी कल्पना खां बि परे जी गालिह आहे। वापार लाय मशहूर सिंधी कौम वटि रोमांस वासिते वकतु किथां आयो पर हक़ीक़त त हक़ीक़त आहे। मथे ज़िकुरु कियल सत कहाणियूं सिंध जे ट्रैजिक रोमन्स जो हिसो आहिन।
सिंधी भाषा – सिंधी समाज – सोशल मीडिया ऐं सिंधी लोक साहित्य
हिकु आम रायो आहे त बियन केतिरिन ई इलाकायी भाषाउन (जेका भाषा कंहिं महदूद ऐराजी में वापिरायी वंञे) वांगुर सिंधी भाषा बि खतम थियण ते अची पहुती आहे। नयें रिवायती सिंधी साहित्य जो सिरजन ई मुशकिल थी पयो आहे त सिंधी लोक साहित्य जी गालिह करण बेमानी आहे। इन सोच वारन सभनी लाय मुंहिजो जवाब आहे हिते गालिह रिवायती सिंधी साहित्य जी न पर सिंधी लोक साहित्य जी आहे त दोस्तों रोज़ नवों बेशुमार सिंधी लोक साहित्य सामहूं अची रहियो आहे। तव्हां असां सोशल मीडिया ते जेको रोजु पया था लिखूं सो वकतु पुजाणे सिंधी लोक साहित्य ई लेखियो वेन्दो।
सिंधी पहाका इसतिलाह ऐं चवणियूं
इहे सिंधी लोक साहित्य जो लासानी रूप आहिन जिन खे सिंधी भाषा जो अमोलक खज़ानो ऐं सींगार बि चयो वेन्दो आहे। सिंधी पहाका तोड़े चवणियूं कन्हि लिखियूं इन जो विचार केरु बि न कंदो आहे पर उहो सिंधी न आहे जंहिं कडिहिं न कडिहिं इहे कमि न आंदा हुजन। इहो बि कोयी चयी न सघन्दो त आखिर सिंधी पहाकन ऐं चविणिन जो तादाद केतिरो आहे।
सिंधी नवजवानन वासिते इहे सत लोक कहाणियूं ऐं कुझु चूंड सिंधी पहाका हिते शामिल कंदे उन्हन वासिते लिंक हेठि डिजे थी।
सिंधियत सुहिणी रहे
एस पी सर (मंघिरमलानी) कोल्हापुर