ताकत ई विनाश आन्दो Sindhi Language Destroyers

हाणे बाकी सवाल बचे थो सिंधी कौम जो मतलब इहो समझण जो त सिंधी कौम जी ताकत सिंधी भाषा जे विनाश जो कारण कीयं बणी? छो भारत जे सिंधी समाज भस्मासुर जहिड़ी हलत हली? पहिंजी मिठड़ी सिंधी भाषा विंञाये पहिंजी कौम खे बिना सुंञाणप वारी कौम जी राह ते वधंदो डिसी सिंधी कौम खे का झिझक महसूस छो न थी थिये?
तव्हां चयी सघो था त इहो कहिड़ो सवाल थियो त सिंधी कौम जी ताकत छा आहे? सज़ी दुनिया वाकिफ आहे त सिंधी कौम न सिर्फ व्यापारी रुख वारी कौम आहे पर व्यापार करण में ऐतिरो माहिर आहे जो चयो पियो वंञे त मच्छी जे बारन खे तरणु ऐं सिंधी बारन खे धंधो करण सेखारिण जी का ज़रूरत न पवंदी आहे। मतलब सिंधी कौम जी वड़े में वड़ी ताकत आहे धंधो।
भारत में सिंधी भाषा खे सरकारी तोर घटितायी वारी भाषा [Minority Language] जो दरिजो हासिल आहे मतलब सिंधी भाषा जी तैलीमी संस्थाउन खे सरकार वठां खास सहूलियतूं मिली सघन थियूं सिर्फ ऐतिरो न पर इन्हन संस्थाउन में सिखिया हासिल करण वारन खे बि के फायदा मिली सघन था।
शुरुआत में सिंधी अगुवानन पेसे वारन सिंधियिन जी या सामाजिक मदद वठी चंगे तादाद में सिंधी तैलीमी संस्थाउं बरपा कयूं पर गुजिरिन्दड़ वक़त सां गडु – सिंधी कौम जी बुनियादी ताकत धंधो – खेन अहसास करायिण लगो त तैलीमी संस्था जी बिल्डिंग ऐं बियन सहूलियतुन ते जेका सीड़प कयी वयी आहे उन मां ओतिरी कमायी न पयी थिये। हिते सिंधी कौम जे अगुवानन सिंधी कौम जी ताकत धंधोड़ी रुख [Professional attitude] जो वापर कन्दे इन्हन सिंधी स्कूलन खे अंग्रेजी ऐं मकानी भाषा में बदिलाये कमायी वधायिण जो तरीको गोलिहे लधो। नतीज़े तोर सिंधी स्कूल बंद थींदा विया मतलब सिंधी भाषा जे बाग़ में सावक बणाये रखण वारा ज़खीरा सुकन्दा वया सो कुदरती तोर सिंधी भाषा बि मरण जी राह ते सफर शुरू करण ते मज़बूर थी वयी।
सिंधी कौम जे धंधोड़ी रुख सिंधी व्यापारिन खे समझायो त कमायी वधायिण वास्ते ग्राहकन सां अंग्रेजी में न त मकानी भाषा में गालिहायिण ज़रूरी आहे सो उहे खास धियान डियण लगा त औलाद खास करे पुट्र त सुठे नमूने अंग्रेजी ऐं मकानी भाषा गालिहाये सघन। सिंधी कौम जी ताकत धंधो जे सबब मज़बूरी जे इन बदिलाव सबब न सिर्फ सिंधी स्कूलन जे बंद थियण जे सिलसिले में तेज़ी आहे पर सिंधी घरन में बि सिंधी भाषा जो उपयोग घटिजण जी शुरुआत थी वयी।
सिंधी कौम जी हिक बी वड़ी ताकत संत पिण इन धंधोड़ी रुख वारी ताकत जा शिकार बणिजी पया मतलब सिंधी संतन पिण मकानी समाजन में पहिंजो असर वधायिण वास्ते सिंधी भाषा जी जगह ते हिंदी या बी मकानी भाषा में सत्संग करण शुरू कियो ऐं सिंधी घरन में गालिहायिण जी भाषा तोर कमि अचण वारी सिंधी भाषा जे घर निकाले जो दौर शुरू थियो।
पंचायत ऐं बियन सामाजिक संस्थाउन खे पिण सिंधी कौम जी ताकत लेखियो वेंदो हुओ पर भारत में ही न सिर्फ केतिरियूं ई पंचायतूं पर बिये बेशुमार संस्थाउं बरपा कयूं वयूं। घणिन पंचायतुन जे वज़ूद त सिंधी कौम जी ताकत घटायी ई पर बेशुमार बियन संस्थाउन जे वज़ूद सिंधी अगुवानन जे विच में पाण खे वड़ो ऐं असिरायितो अगुवान साबित करण जी रेस शुरू करे छड़ी।
रेस खटण जी कोशिश में इन्हन संस्थाउन जे कार्यक्रमन में मकानी नेताउन ऐं बियन समाजन जी शख़्सियतुन खे घुरायिण जो सिलसिलो शुरू थियो जहिं बेहद घणी रफ़तार सां वाधि पिण पाती। मतलब इहो त सिंधी समाज जे कार्यक्रमन में सिंधी भाषा जी जगह ते बियन भाषाउन जो उपयोग वधी वियो।