सिंधी भाषा घटिजन्दड़ उपयोग - Use of Sindhi Language

सिंधी भाषा जे लागीतो ऐं सिलसिले वार घटिजन्दड़ उपयोग जे सबबन जी खोजना कन्दे जेके गालिहियूं सामहूं अचन थियूं तिन मां के अहमियत वारियूं हिते शामिल आहिन।
[1] लिपी जे झगड़े सबब, अरेबिक तोड़े देवनागिरी लिपि जा माहिर ऐं विद्वान बी लिपी खे घटि या ग़ैर उपयोगी साबित करण जी पहिंजन कोशिशिन में त पूरी तरह सां कामियाब कोन थिया पर इन्हन कोशिशिन जे नतीज़े तोर आम सिंधी शहरी में सिंधी भाषा वास्ते ना पसंदगी जी भावना ज़रूर पैदा थी वयी।
[2] भारत में अचण खां पोय सामाजिक अगुवान तोड़े सिंधी भाषा विज्ञानी सिंधी भाषा खे धंधे सां जोड़े रखण में कोशिश कंदा बि नज़र न आया। हुअं बि भारत में भारत में वापर वारिन भाषाउन जे तादाद ऐं भारत सरकार जे सिंधी कौम खे अलग अलग ऐराजिन में वसायिण जे फेसिले सबब इहा गालिह सवली न रही हुयी।
[3] सिंधी कौम जे धंधे जे लाडे बि सिंधी भाषा जे उपयोग घटायिण में काफी अहमियत वारो किरदार अदा कियो। हिक पासे सिंधी संस्थाउन जेके सिंधी माधियम स्कूल शुरू किया हुआ तिन जे अंग्रेजी माधियम में [वड़ी फी मिलण सबब] जो सिलसिलो शुरू थियो त बिये पासे धंधे जी कामियाबी में सिंधी भाषा को उपयोग न डिसी करे आम सिंधी बि बारन खे ग़ैर सिंधी भाषा सेखारिण जी चाह डेखारिण लगा।
[4] सिंधी माधियम स्कूलन जे बंद थियण सबब सिंधी भाषा जो उपयोग घटिजी वियो।
[5] आर्थिक तरकी सां गडु सिंधी समाज जी हलत ऐं विचारन में आयल तबदील सबब अंग्रेजी माधियम में बारन खे पढ़िहायिण खे तरकी ऐं सामाजिक रुतिबे में वाधि जे नज़रिये सां जोड़िण जी शुरुआत थी।
[6] सिंधी समाज जी हासिल कियिल आर्थिक तरकी जो हिकु बियो असर बि ज़ाहिर थियण लगो। सिंधी जेके कॉलोनी या कैम्प्स में गडु रहन पिया तिन मां आर्थिक तरकी जे ओज ते पहुतलन मां केतिरा ई कैम्प्स जा पहिंजा घर छडे शहर जी ग़ैर सिंधी ऐराजिन में बंगलो ठाहिराये रहण लगा मतलब सिंधी माहोल खां परे थी विया।
[7] अग में ई भारत में भारत में टिड़ियल पखड़ियिल आदमशुमारी ऐं आर्थिक तरकी जी ज़फ़ाकशी जे दौर मां गुजिरण वारो सिंधी समाज पहिंजे सांस्कृतिक, साहित्यिक ऐं सामाजिक विरासत कायम रखण ते ओतिरो धियान न पियो डिये मथां पहिंजी बियन समाजन ऐं मिलियिल माहोल सां ठहकी हलण जी पहिंजी लासानी खूबी सबब सिंधी समाज सिंधी भाषा खां परे पियो थींदो वञे।
[8] जलसा, महफ़िलूं ऐं सामाजिक गड़िजाणियूं सिंधी कौम जी सुञाणप वारिन खूबिन में शामिल आहिन। भारत में अचण खां पोय बि इहो उत्सव मलिहायिण या सामाजिक कार्यक्रमन जो सिलसिलो बंद कोन थियो या वधीक सही नमूने चयिजे त बियन मकानी समाजन खे सिंधियत जी वाकफियत डियण जे मकसद सां अहिड़न कार्यक्रमन जो सिलसिलो वधी वियो पर खतरनाक गालिह इहा थी जो इहे कार्यक्रम सिंधी भाषा जे बदिरां हिंदी अंग्रेजी मतलब ग़ैर सिंधी भाषा में थियण लगा।
[9] सामाजिक कार्यक्रमन में ग़ैर सिंधी भाषा जे उपयोग जो आलम इन हद तायीं वधी वियो जो केतिरा ई सिंधी संत बि पहिंजो सत्संग बि ग़ैर सिंधी भाषा में करण लगा।
[10] बारन जे ग़ैर सिंधी स्कूलन में पढ़िहण, ग़ैर सिंधी दोस्तन जे हुअण ऐं ग़ैर सिंधी माहोल में घर ठाहिरायिण जे कुदरती नतीज़े ते रूप में सिंधी भाषा जो वापर घटिजंदो वियो।
[11] अखबारुं ऐं रिसाला उहे पुलूं आहिन जेके आम माणुहुन जी दुनिया ऐं साहित्य जी दुनिया खे हिक बिये सां जोड़े रखन पयूं। भारत में टिड़ियल पखड़ियिल सिंधी आदमशुमारी सबब, लिपी जे झगड़े सबब बिन लिपिन में छपिण जी मज़बूरी सबब ऐं सभ खां वधीक सिंधी वापारी तबके जो मुनासिब अंदाज़ में आर्थिक मदद न करण सबब आहिस्ते आहिस्ते सिंधी अखबारुन ऐं रिसालन जे छपिजण जो सिलसिलो घटिजंदो वियो मतलब सिंधी कौम खे सिंधी भाषा सां जोड़े रखण वारा पुलुन जो तादाद घटिजी वियो।