सियासी माहोल ऐं सिंधी एकता

सिज देवता डीन्ह जी शुरुआत करण वास्ते पहिंजे रोशनी जे रथ खे तैयार करण जे आखिरी दौर में हुओ ऐं हमेशा वांगुर अजु बि चांहि जो मजो माणिण वास्ते निखिमिणोमल बि मुहिंजे सामहूं वेठो हुओ।

एस पी सर तव्हां खे न थो लगे त हिन वक़त मुल्क जूं सियासी पार्टियूं ऐं सिंधी कौम में एकता जी घटितायी दुशवारी जे सागे दौर जे मुहं डयी रहियूं आहिन

तव्हां बि अज़ब में आहियो न त आखिर सिंधी कौम जी एकता जी घटितायी ऐं मुल्क जे सियासी माहोल में कहिं बि किसम जो लगापो हुअण कीयं मुमकिन आहे ? पर हीउ आहे असां जो निखिमिणोमल सो उन वास्ते न सिर्फ अहिड़ा नामुमकिन लगापा गोलिहे लहण मुमकिन आहे पर हू पाण खे सही साबित करण वास्ते विचार रुपी सबूत पेश करण में बि महारत रखे थो।

खैर जीयं तीयं करे मां पाण खे अज़ब जे वाके जी हद में शामिल थियण खां रोकिण में कामियाबी हासिल कन्दे, चप चोरे कुछ चवण आहियो पर जेको बिये जे बुधे तहिं खे निखिमिणोमल केर चवे।

तव्हां जो अज़ब में पवण वाज़िब आहे एस पी सर ! पर डिसो न हिन वक़त मुल्क जो सियासी माहोल कहिड़ी हालत में आहे ?

[1] 2014 में मोदी ऐं शाह जी जोड़ीअ कमाल कन्दे 70 सालन में पहिरियों भेरो कहिं गैर कांग्रेसी पार्टी खे पहिंजी खुद जी घणाई जे दम ते सरकार ठाहिण वारी हालत में पहुचायो आहे।

[2] गुजिरियल 3 – 4 सालन में जिन बि राज्यन में चूंडियूं थियूं आहिन उन्हन में घणे भांगे न सिर्फ कांग्रेस पर मकानी सियासी पार्टियूं बि हाराये वयूं आहिन।

[3] कांग्रेस जी हालत त ख़राब आहे ई पर बियन मकानी सियासी पार्टीयिन जे सामहूं त वज़ूद कायम रखण जो संकट पैदा थी पियो आहे।

[4] मुल्क जा वड़ा वड़ा ऐं सालन खां सियासत करण वारा अगुवान बि [चाहे उहे बीजेपी में छो न हुजन ] इहो अहसास करे रहिया आहिन त मोदी जे आंन्दल तूफ़ान जो मुक़ाबिलो करे पहिंजो वज़ूद बचाये रखण सवलो न आहे।

[5] उतरप्रदेश में बहुजन समाज पार्टी ऐं समाजवादी पार्टी जो गडु अचण, महाराष्ट्र में शिवसेना जो ऐलान करण त 2019 जी चूंडिन में उहा बीजेपी खां धार थी अकेले सिर लडन्दी या वरी ममता बैनर्जी ऐं कांग्रेस जो अलग अलग कोशिशूं करण त बीजेपी जी मुखालफत करण वारियूं पार्टियूं एकता जो इजिहार कनि।

मतलब एस पी सर मुल्क जो सियासी माहोल इहो आहे जो हर हिकु सियासी दल बीजेपी खे हारायिण वास्ते एकता जी ज़रूरत ऐं अहमियत समझण जे दौर मां गुजिरी रहियो आहे।

न सिर्फ मुखे पर तव्हां खे बि इहो कबूल करणो पवन्दो त निखिमिणेमल मुल्क जे सियासी माहोल जी हकीकी ऐं हिकदम सही तसवीर पेश कयी आहे। बाकी रहियो लागापे ते पुछण जो त सामहूं आहे निखिमिणोमल जो सिर्फ पहिंजी गालिह बुधायिण सां मतलब रखन्दो आहे।

त एस पी सर हाणे अचो सिंधी समाज जी एकता ते। हिते बि हालतूं जुदा कोन आहिन।

[1] पुरातन समे खां पंचायत जहिड़ी सामाजिक संस्था सिंधी कौम में एकता कायम रखण में कामियाब थींदी आहे पर गुजिरियल 50 -60 सालन में इहे सिंधी पंचायतूं मुखतलिफ सबबन जे करे कमज़ोर थी ऐं बेशुमार बियन सामाजिक संस्थाउन जे ज़ार में फ़ासी पहिंजो वज़ूद ऐं सामाजिक अहमियत विञायिण जी हद ते अची पहुतियूं आहिन।

[2] सामाजिक संस्था पंचायत जी रहनुमायी खां महरूम थियण सां गडु सिंधी कौम अगुवानन ते विशवास जी घटितायी जे संकट खे बि मुहं डयी रही आहे छो जो हर हिक अगुवान जो पहिंजी संस्था खे सोभारो बणायिण जो स्वार्थ समाज में निफ़ाक़ जे पहाड़ खे उचो बणाये थो।

[3] कहिं बि कौम जे सामाजिक जीवन जी एकता रुपी बिल्डिंग वास्ते समाज जो धार्मिक विश्वास सीमेंट जो कम कन्दो आहे पर अजु संतन ऐं पंथन में विराहियिल सिंधी कौम वास्ते इते बि संकट जी घड़ी आहे।

थोरे में चवां एस पी सर त सिंधी कौम जी हालत घणे मरदे हरु न हले खां जुदा न आहे।

मुल्क जूं सियासी पार्टियूं ऐं अगुवान त थी सघे थो त हुकूमत हासिल करण वास्ते ऐं पहिंजो वज़ूद कायम रखण जी मज़बूरी में एकता जे बंधन में बंधजी वञन पर सिंधी कौम लाय त इहो बि सवलो न आहे छो जो न त गैर पंचायती संस्थाउन जे सामहूं वज़ूद कायम रखण जो खतरो आहे न अगुवानन खे हुकूमत [सामाजिक रुतिबो ऐं मिलन्दड़ माली इमदाद ] जे खसिजण जो।

हाणे तव्हां पाण फेसिलो कियो एस पी सर त मुल्क जो सियासी माहोल ऐं सिंधी कौम जी एकता सागे संकट जे दौर में आहिन या न ?

निखिमिणोमल त चांहि ऐं गालिह बयी खतम करे हलन्दो थियो पर मुहिंजो हिकु सवाल बाकी आहे।

सिंधी कौम जी एकता वास्ते असां छा था करे सघूं ऐं उन जी शुरुआत कडिहिं थींदी ?