सिंधी व्हाट्सएप्प Sindhi WhatsApp

चवन्दा आहिन त हिन ब्रह्माण्ड खे सही राह ते रखण जी जवाबदारी ब्रह्मा, विष्णु ऐं महेश जी त्रमुर्ती ते आहे।  इंसानी सामाजिक जीवन जी छंड छाण करण वारन जो बि चवण आहे त सुठा ख़राब या अमीर गरीब हिनन बिन तबकन में इंसानन जी विरहासत पूरी तरह सां सही कोन आहे छो जो इंसानन में लेखे जोग वड़ो तादाद एहिड़न जो आहे जेके न त सुठा आहिन न ई वरी ख़राब सागे नमूने उन्हन जो बि तादाद घटि न आहे जिन खे अमीर चवण हकीकी अमीर पहिंजी बेइज़्ज़ती समझन था त इहे पाण खे गरीबन जे दायरे खां बाहिर निकतल – तरकी कियिल महसूस कनि था।  

त एस पी सर, तव्हां जो चवण आहे त व्हाट्सएप्प वापिरायिण वारन सिन्धियन जा ट्रे किसम आहिन ? निखिमिणेमल पहिंजी हाज़िरी दरजु कराईन्दे मुहिंजी गालिह दोहिरायी। 

हा साईं घटि में घटि ट्रिन किसमन जा त ज़रूर आहिन। पहिरियां उहे जेके शौकीन आहिन अखिल भारत सतह ते पहिंजी सुञाणप तैयार करण जा। इन्हन मां हर हिकु घटि में घटि 15 ग्रुपन में त ज़रूर शामिल हूंदो आहे।  हर ग्रुप में जुमले मेंबर्स जे तादाद में हिनन जो तादाद 20 % खां वधीक न हूंदो आहे पर ग्रुप में पोस्ट थियण वारिन पोस्ट्स मां 80 % पोस्ट हिनन जूं फॉरवर्ड कियिल हुँदियूं आहिन।  

पर एस पी सर , जीयं त इहे लगभग हर विषय ते वीडियो फोटो या बियन जा विचार गोल्हे पहिंजन ग्रुपन में पोस्ट कनि था – सालु सालु गुजरण खां पोय बि कहिं ट्रैन एक्सीडेंट या टी वी ते अचण वारे कहिं सिन्धी प्रोग्राम बाबत पोस्ट कनि था – जहिं जो फायदो ग्रुप जा बिया सभु मेंबर्स वठन था तहिंकरे अहिड़न मेंबर्स खां सिवाय त ग्रुप हली बि कोन सघन्दो न ? डिसो जे हाणे तव्हां हेडी सख्त मेहनत करण वारन, बियन खे तरह तरह जे ज्ञान जी वाकफियत डियण वारन जे खिलाफ कुछ चयो त पक समझो त झगड़ो थी पवन्दो। 

न साईं निखिमिणामल मुहिंजी कहिड़ी औकात जो मां इन्हन मेहनती जांबाज़न जे खिलाफ चप बि चोरे सघियां ? मुहिंजी हालत कुछां त पटिजन मुछां, तहिं खां माठि भली खां जुदा किथे आहे ? मां त सिर्फ ऐतिरो पियो चवण चाहियां त इन्हन फॉरवर्ड करण वारन अमीरन जी पोस्ट्स जे तादाद में असां जहिडन थोरन पाण पोस्ट तैयार करण वारन जूं पोस्ट्स लिकी वञन थियूं। 

त मतलब इहो त एस पी सर तव्हां व्हाट्सएप्प वापिरायिण वारन सिन्धियन जे बिये किसम में शामिल आहियो ? 

निखिमिणेमल अखर बिये किसम जो उचार अहिड़े नमूने जो हिकु भेरो त मुखे बि शक जे नांगन वेडहे वरतो पर निखिमिणेमल जे मज़ाकिया स्वभाव जो ध्यान कंदे मां शक जे इन्हन नागंन जे ज़हर खां पाणु बचाये वरतो।  

त एस पी सर हाणे गालिह कयो ट्रियें किसम जे सिन्धियन जी ? 

इन्हन में ऐं लोकशाही में रहन्दड़ आम शहरी में को खास फरकु न थींदो आहे।  जीयं लोकशाही में चाहे सरकार जियण केतिरो बि डुखियो छो न करे छड़े पर वोट डियण में, ईमानदारी सां टैक्स भरणिण में आम शहरी अगते हूंदो आहे तीयं व्हाट्सएप्प वापिरायिण वारन सिन्धियन जो हीउ वड़े में वड़ो तादाद चाहे ग्रुप में पोस्ट थियण वारिन पोस्ट्स जे वड़े तादाद मां बेज़ार हुजे पर चुपचाप रहंदो ऐं सहंदो पियो आहे। छो जो व्हाट्सएप्प छडिण जो मतलब आहे पाण खे गैर तरकी कियिलन में शामिल करण ? या पाण खे उन्हन गरीबन में शामिल करण जेके हिक स्मार्ट फ़ोन बि खरीद न था करे सघन।    

पर एस पी सर उन्हन जो छा ? जेके दुकान या ऑफिस में वेठे वेठे हथन में महांगी स्मार्ट फोन खणी व्हाट्सएप्प वापिरायिण जो डेखाऊ करे इन गालिह खे पहिंजी सामाजिक हैसियत या रूतीबो ज़ाहिर करण जे वसीले जे रूप में कम आणिन था ? छा इहे चौथें किसम जा आहिन ? 

मां इन्हन खे पहिरियें किसम में शामिल करण पसंद कंदुम छो जो हिकु त इन्हन जे वास्ते वकतु गुजारिण हिकु मसलो आहे सो नवां नवां वीडियो फोटो या शेरो शायरी या बियन जूं लिखियिल पोस्ट्स गोलिहिण वास्ते हिनन वटि वकत जी खोटि कोन्हे। सागे नमूने इन्हन वटि पेसन जी बि कमी न आहे सो इहे फ्री डाटा वारो महाँगो इंटरनेट प्लान वठी बिना सोचे समझे फॉरवर्ड करण में रुधियिल रही सघन था।    

ठीक आहे एस पी सर पर उहे त पक ई पक चौथें किसम जा आहिन जेके रोज़ 25 /50 न पर डीन्ह में 2 /4 पोस्ट कनि था से बि पहिंजे पंथ या पहिंजी संस्था सां लागापो रखण वारियूं ? 

निखिमिणामल तव्हां शायद ध्यान न डिनो आहे त इन्हन जे पोस्ट कियिल हर फोटो / वीडियो में इहे पाण ज़रूर हूंदा आहिन ? हाणे तव्हां पाण फैसिलो कियो त इन्हन खे पहिरियें किसम में शामिल न करणु इन्हन सां बेइंसाफी आहे या न ? 

पर एस पी सर अहिड़ा बि सिन्धी घटि न आहिन  जिन खे संदन कहिं यार दोस्त पहिंजे एडमिन जे रूप में मिलियिल पावर जो उपयोग कंदे ग्रुप में शामिल कियो आहे ? इहे वेचारा त दोस्ती जो लिहाज़ रखन्दे ग्रुप मां धार बि न था थी सघन ऐं न ई इन्हन वटि वकतु आहे जो ग्रुप में एक्टिव थी सघन ? इहे त व्हाट्सएप्प जा चौथें किसम जा सिंधी लेखिया वेंदा न ? 

मुखे खबर आहे जे मां हिन सवाल जो जवाब डिनो त निखिमिणेमल वटि बियो सवाल तैयार पियो हूंदो। इहो सिलसिलो सिर्फ तडहिं खतम थींदो जडहिं मां हुन जी राय त व्हाट्सएप्प ते चौथें किसम जा सिन्धी बि वज़ूद रखन था सां सहमत थीन्दुम। 

सो मां त माठि करण पसंद कयी बाकी रहियो सवाल तव्हां जो त जे तव्हां जवाब डियण चहियो त तव्हां जे जवाब जे इन्तिज़ार में।