कुकुड़ कुड़मिन जो

पोयन लगभग वीहन मिनिटन खां मुहं सुजाये वेठल निखिमिणेमल आखिर चाहिं जे बिये कोप जी पहिरियीं चुस्की भरीन्दे पहिंजे माठि खे मोकिलाणी डिनी ऐं मुहिंजे साह में साहु पियो। सच पुछो त निखिमिणेमल सामहूं मुहिंजी हालत सलमान खान जी फिल्म जे हिक डायलॉग जे बदिलियल रूप खां बेहतर कडिहिं न रही आहे मुहिंजो मतलब आहे साईं निखिमिणामल तव्हां जे सवालन खां न पर तव्हां जे माठि करे विहण खां भउ थींदो आहे।

तव्हां जो लेख जवाब घुरन्दड़ के सवाल पढियो। ऐतिरी नाराज़गी बि छा एस पी सर जो कहिं जी खल लाहिण में का कसर बाकी न रहे ?

पर साईं निखिमिणामल मां इहो साफ कियो आहे त मां कहिं शख्स जे खिलाफ न आहियां। मां त असां जे सिंधी समाज जी सामाजिक हलत में में वधन्दड़ ग़ैर अखिलाखी रुख जे सुधार वास्ते कोशिश कियां पियो।

थी सघे थो तव्हां सही हुजो एस पि सर ! पर आम पढ़िहण वारे जी नज़रून में त तव्हां जे इन लेख जो मरकज़ हिकु शख्स आहे न जहिं कहिं बिये जे लेख में असली लेखक जो नालो गुम करे पहिंजो नालो लिखी फॉरवर्ड कियो आहे।

त साईं निखिमिणामल छा तव्हां चवण चाहियो था त इहा हलत गलत न आहे ? छा असां जे सिंधी समाज में कुकुड़ कुड़मिन जो नावं वडेरे जो वारे रुख जी हलत वधन्दी वंञे ऐं असां माठि करे वेठा डिसन्दा रहूं ?

न बिलकुल न मां तव्हां सां शामिल राय आहियां एस पी सर त इन किसम जी हलत जी हर मुमकिन नमूने मुखालफत थियण घुरिजे पर छा इहो मुनासिब न थिये हां जेकडहिं तव्हां लेख लिखण खां अगु सामहूं वारे जे जवाब जो इंतिज़ार कियो हां ?

तव्हां खे शायद खबर कोन हून्दी साईं निखिमिणामल त इहो शख्स उहो ई आहे जहिं कुछ महीना अगु दादा जशन वासवानी जी श्रद्धांजली तोर लिखियल मुहिंजी कविता में मुहिंजो तखलुस आज़ाद सचल हटाये पहिंजो नालो लिखी इहो ज़ाहिर करण जी कोशिश कयी हुयी  त इन कविता जो रचनाकार हू आहे। ।

इन हालत में त तव्हां सही आहियो एस पी सर ! छो जो जेकडहिं को शख्सु कहिं गलती ते अफ़सोस ज़ाहिर करण खां पोय बि सागी गलती बियो भेरो करे त उन जे जवाब जो इंतिज़ार करण बेमानी आहे।

पर मुहिंजी हिक बी शंका आहे एस पी सर ! सोशल मीडिया ते इन्हन गालिहिन खे रोकिण का सवली गालिह बि त न आहे ? घणा भेरा त असली रचनाकार खे खबर ई कोन पवंदी आहे त उन जी रचना कहिं बिये पहिंजे नाले सां पोस्ट कयी आहे। छा इन जो मतलब इहो आहे त रचनाकार पहिंजियूं रचनाऊं सोशल मीडिया ते शेयर करण बंद करे छड़िन ?

साईं निखिमिणामल मां इनकरे त ऐतिरो वड़ो लेख लिखियो हुओ जीयं समाज में सोशल मीडिया ते सुजागी अची ऐं इन कुकुड़ कुड़मिन जो नावं वडेरे जो वारे रुख वारी हलत मतलब बिये जी रचना में असली रचनाकार जो नालो कटे पहिंजो नालो लिखी फॉरवर्ड करण / पोस्ट करण जी हलत ते लगाम लगे।

हमेशा वांगुर चाहिं पूरी करे निखिमिणोमल त उथी हलन्दो थियो आहे पर जे तव्हां मुहिंजी गालिह सां सहमत आहियो त मुहिंजी कोशिश खे वधीक असिराइतो बणायिण वास्ते हीउ पोस्ट पहिंजन सभनी सिंधी दोस्तन खे फॉरवर्ड कियो।