सुनील वासवानी

फोर्बेस मिडिल ईस्ट जे दफ्तर खाने [Archives – पुराणा] जे अभ्यास सां इहो धियान में अचे थो त 2015 ऐं 2016 इन्हन बिन्ही सालन में सुनील वासवानी फोर्बेस जे अरबी दुनिया जे टॉप टेन इंडियन अगुवानन में पहिरियें नंबर ते हुओ। जयपुर राजस्थान में 11 जुलाई 1963 ते जन्म वठण वारो सुनील वासवानी भारतीय सिंधी हुअण जो दावो न थो करे सघे। नंढी उमिर में ई हू पहिंजे पिता सुंदर वासवानी ऐं परिवार सूधो लड़े नाइजीरिया हलियो वियो हो जिते संदस बालपणो गुजरियो। UK – इंग्लैंड वंञी सुनील वासवानी कॉमर्स में [इकनॉमिक्स ऐं एकाउंटिंग ] डिग्री हासिल करे वापस आयो।
दुबई रहवासी सुनील वासवानी न त भारतीय नागिरक आहे ऐं न ई NRI सिंधी। हुन वटि नाइजीरियन ऐं ब्रिटिश पासपोर्ट आहिन ऐं हू दुबई में स्टैलियन ग्रुप जे चेयरमैन तोर कमु पयो करे। इहो चयो वेन्दो आहे त जीयं मच्छी जे बारन खे तरणु न सेखारिबो आहे तीयं सिंधी बारन खे धंधो सेखारिण जी ज़रूरत न आहे। सुनील वासवानी पहिंजी कामियाबी सां इहा गालिह सचु साबित कयी आहे।
सिर्फ 21 सालन जी उमिर में पीउ खां नाइजीरिया में परिवार जे धंधे जी जवाबदारी संभाले वठण वारो सुनील वासवानी तरकी जे उन ओज ते पहुतो आहे जो फोर्बेस जे अमीरन जी लिस्ट में शुमारियिल आहे। भारत में जन्म वठण वारे, नाइजीरिया में वड़े थियल, इंग्लैंड में पढ़ायी कियिल ऐं दुबई में धंधे करण वारे सुनील वासवानी खे सामहूं रखी चयी सघिजे थो त सिंधी कहिं हिक देश जा न पर सजी दुनिया जा रहवासी आहिन।
जे असां स्टैलियन ग्रुप जे धंधे जे प्रोडक्ट्स ते धियान डियूं त के अज़ब में पयजी वेन्दा त आखिर सुनील वासवानी इन जी संभाल कीयं थो करे। स्टैलियन ग्रुप जे धंधे जे प्रोडक्ट्स में मुख्य तोर चांवर, भाणु, मच्छी, खाधे जो तेल, खंडु, बिल्डिंग मटेरियल त आहिन ई ग्रुप ऑटोमोबाइल खेतर में निसान, होण्डा, हुंडई, पोर्श्चे, वॉक्सवैगन, ऑडी, स्कोडा, चंगन ऐं अशोक लेलैंड जहिड़न ब्रांड्स सां पिण जुडियिल आहे। थोरे में चयजे त स्टैलियन ग्रुप जे धंधे जे थैले में कमोडिटीज जी ट्रेडिंग, फ्रोजेन खाधे जा पदार्थ, ऑटो असेंबली ऐं डीलरशिप भरियल आहिन।
नाइजीरिया में सुनील वासवानी धंधे में मुख्य तोर सां ट्रेडिंग सां जुडियिल हुओ। टॅक्स जे मामले में या वधीक सही नमूने में ड्यूटी भरण खे टारिण जे हिक इलज़ाम सबब सुनील ऐं नाइजीरिया जी सरकार में कानूनी विवाद पैदा थी पियो। सुठी गालिह इहा थी जो इन जो को गलत नतीज़ो न निकितो पर सुनील खे देश छडे वंञण वास्ते चयो वियो ऐं परिवार खे बि वापस मोटण खां न रोकियो वियो। इन हालत में सुनील वासवानी जेका जगह चूड़ी सा दुबई हुयी।
अप्रैल 2016 में सुनील वासवानी जी कुल मिलकियत $2 billion हुयी तहिंकरे इहा अज़ब जी गालिह कोन न आहे त सुनील छो लागीतो चैयन सालन खां गल्फ ऐराजी जो सभ खां वधीक अमीर भारतीय आहे। जिन खे सुनील वासवानी जी हिन बेमिसाल कामियाबी ऐं तरकी ते अज़ब आहे उन्हन जे वास्ते सुनील जे पहिंजन अखरन में जवाब आहे –

मां कडिहिं बि गालिहिन खे छडे न डीन्दो आहियां। हिकु भेरो जे मां विचार पको कियो त पोय मां जेसी तायीं उन खे हासिल न करे वठां कोशिश कन्दो रहंदो आहियां।

हिन वक़त हू अफ्रीका में स्टील,पेट्रोकेमिकल्स ऐं एग्रीकल्चर खेतरन में पहिंजो धंधो वधाये रहियो आहे जहिं वास्ते सुनील वासवानीअ $9 billion जी सीड़प कयी आहे।
सुनील वासवानी जी शादी रिया सां थियल आहे ऐं जोड़े खे ट्रे बार आहिन। दुबई में सुनील जहिं ऐराजी टोनी एमिरेट्स हिल्स में हिक आलिशान घर में रहे पियो उते चिड़िया घर [ indoor aviary], नाईटक्लब, आटोमेटिक कार वाश ऐं वेन्दे कैसिनो जहिड़ियूं सहूलियतूं आहिन। संदस नंढा भाउर हरेश ऐं महेश वासवानी सागी कम्पनी में हुन सां गडु कमु कन्दा आहिन।