तमन्ना भाटिया

हाणोके समे जी सभ खां वधीक मशहूर, पसंदीदा ऐं बेहद घणी कमायी करण वारी फिल्म बाहुबली जे किरदार अवंतिका खे जहिं खूबी सां सिंधी एक्ट्रेस तमन्ना भाटिया निभायो तहिं जी तारीफ न सिर्फ फिल्म क्रिटिक्स पर फिल्मस डिसण वारे हर आम दर्शक बि कयी आहे। अवंतिका जे किरदार बाबत चयिजे त इहो किरदार गुसे बदिले खां रुमानियत भरियो किरदार हुओ। मुंबई जी सिंधी छोकिरी ऐं तमिल तोड़े तेलुगु फिल्मस जी नामवर एक्ट्रेस तमन्ना भाटिया जहिं क़ाबिलियत सां इन किरदार जे हर रंग खे दर्शकन तायीं पहुचाये सा बेमिसाल आहे।

बॉलीवुड हिंदी फिल्मस जे घर मुंबई में 21 दिसंबर 1989 ते रजनी ऐं संतोष भाटिया जी धीउ जे रूप में जन्म वठण वारी तमन्ना भाटिया पहिंजे कम ऐं कामियाबी वसीले इहो जग जाहिर कियो आहे त अजो का सिंधी नवजवान मेहनत करण ऐं मुशकिलात खे मुहं डियण जे सिंधी कौम जे विरसे खे बखूबी अगते वाधाए रहिया आहिन। तमन्ना जी स्कूली पढ़ायी मुंबई जे मानेकजी कूपर एजुकेशन ट्रस्ट स्कूल में थी आहे। इहो तमन्ना जे स्कूल जो एनुअल डे फंक्शन हुओ खेस रुपहिले परदे वारी, कैमरन ऐं रोशनी जी चकाचौंध सां भरपूर फ़िल्मी दुनिया में शामिल थियण आशियो वियो। उन वक़त तमन्ना जी उमिर सिर्फ 13 साल हुयी तहिं हूंदे बि हुन एक्टिंग जी दुनिया में दाखिल थियण खां अगु लगभग हिकु साल मुंबई जे मशहूर पृथ्वी थियेटर सां जुड़ी कमु करण जी समझदारी डेखारी।

15 सालन जी उमिर में तमन्ना बॉलीवुड हिंदी फिल्मस जे पहिंजे कॅरियर जी शुरुआत 2005 जी चाँद सा रोशन चेहरा सां कयी पर बॉक्स ऑफिस पहिंजे कलेक्शन सां इन फिल्म खे रोशन कोन कियो सो फिल्म जे फ्लॉप थियण सबब कहिं जो बि तमन्ना भाटिया जे अदाकारी जे हुनर ते धियान बी वियो। इन दौरान उन किन सांग एलबम्स में पिण कमु कियो पर कामियाबी जी मंज़िल हासिल न थी। एस्ट्रोलॉजी माहिरन जी सलाह ते हुन अंग्रेजी में पहिंजो नालो Tamanna मां बदिलाये Tamannaah लिखण शुरू कियो। इहो सही न आहे त तमन्ना जे नाले में आयल इहा तबदील साउथ इंडिया जे नाला लिखण जे तरीके सबब आयी हुयी।

तमन्ना जे तेलुगु फिल्म कॅरियर जी शुरुआत Sri सां थी त Kedi संदस पहिरियीं तमिल फिल्म हुयी। तमन्ना जी बियन बिन फिल्म्स Happy Days [तेलुगु] ऐं Kalloori [तमिल] में फिल्म जी कहाणी नवजवानन ऐं कॉलेज जी ज़िंदगी ते आधार रखण वारी हुयी। इन वक़त तायीं तमन्ना जी सुंञाणप हिक हुनरमंद अदाकारा जे रूप में त बणिजी चुकी हुयी पर संदस फिल्म्स खे बॉक्स ऑफिस ते का वड़ी कामियाबी कोन मिली हुयी। हिनन फिल्म्स वास्ते चाहे अखबारुन में तमन्ना बाबत रियल सीन स्टेलर या शी वाक अवे विथ आल क्रेडिट जहिड़ा बयान त छपजिया पर फिल्मस कामियाब न लेखियूं वयूं। फिल्म Viyabari में निभायल अख़बार नवीस जे किरदार वास्ते तमन्ना जी त तारीफ थी पर फिल्म जी कमायी खास लेखे जोग न रही।

2009 में रिलीज़ थियल Padikkadavan तमन्ना जी उहा पहिरियीं फिल्म साबित थी जहिं बॉक्स ऑफिस ते शानदार कमायी कयी। इन फिल्म वास्ते तमन्ना खे फिल्म फेयर अवार्ड साउथ में बेस्ट तेलुगु एक्ट्रेस अवार्ड वास्ते नॉमिनेट बि कियो वियो। तमन्ना जी फिल्मस जी कामियाबी ऐं फ्लॉप जो सिलसिलो त जारी रहियो पर संदस एक्टिंग जे जलवे जी तारीफ ऐं मशहूरी जो ग्राफ बि वधन्दो रहियो। फिल्म Kanden Kadhalai जेका हिंदी फिल्म जब वी मेट जी रीमेक हुयी जो रिव्यु लिखंदे हिक पत्रकार तमन्ना बाबत लिखियो हो “Funny and full of life, it is Tamannaah who is the heart and soul of this love story.”

जे तमन्ना भाटिया जे फिल्म कॅरियर जी गालिह कजे त 2008 खां 2019 तायीं हर साल चार पंज फिल्मस रिलीज़ थियन पयूं मतलब तमन्ना जी फिल्मस जो तादाद 60 खां त वधीक ई हूंदो। हुन कुछ शार्ट फिल्म्स ऐं वेब सीरीज The November’s Story में बि कमु कियो आहे। हिंदी फिल्मस जो खियाल कजे त तमन्ना जी हिट ऐं झझी कमायी करण वारी फिल्मस में बाहुबली खां सिवाय बियो नालो शामिल करण सवलो न आहे। वेन्दे 1983 में ठहियल हिमथवाला में श्री देवी जो रोल निभायिण ऐं अजय देवगन जहिड़े मशहूर हीरो जी मौजूदगी खां पोय बि इन फिल्म खे कमायी जे लिहाज खां हिट फिल्म न लेखियो वेंदो आहे।

टेलीविजन जे केतिरिन ई कमर्शियल में पिण तमन्ना नज़र अची चुकी आहे ऐं हुन सेलकॉन मोबाइल, फैंटा ऐं चन्दिरका आयुर्वेदिक सोप जहिड़न ब्रांड्स जी जाहिरात कयी आहे। तमन्ना भाटिया बतोर एम्बेसडर 2015 में ज़ी चैनल तेलुगु वास्ते त 2016 में भारत सरकार जे बेटी बचाओ बेटी पढ़ाओ अभियान वास्ते कमु करे चुकी आहे। हुन PETA वास्ते बि माणुहुन खे जानवरन जो उपयोग करे टेस्ट कियिल कास्मेटिक न खरीद करण वास्ते हिमथायिण वारी जाहिरात में बि कमु कियो आहे।

केतिरिन ई टेलीविजन शोज में तमन्ना मेहमान या जज जे रूप में नज़र आयी आहे। IPL 2018 जी ओपनिंग सेरेमनी में बि तमन्ना भाटिया शामिल हुयी ऐं तेलुगु, तमिल, कन्नड़ ऐं हिंदी गानन जो सीक्वेंस पेश कियो हुओ।

2007 खां 2017 जे विच में तमन्ना भाटिया खे कुल मिलाये अठ भेरा फिल्म फेयर अवार्ड्स साउथ में नॉमिनेशन त मिलियो आहे पर अवार्ड हिकु भेरो बि न मिलियो आहे। तमन्ना खे 2010 में कला मंदिर अवार्ड त 2017 में दयानन्द मोदी ग्लोबल अवार्ड मिलिया आहिन। ज़ी अप्सरा अवार्डस 2018 में तमन्ना भाटिया खे संदस फिल्म इंडस्ट्री जी कामियाबी वास्ते श्री देवी मेमोरियल अवार्ड डिनो वियो।