हीउ बि आज़माये डिसो

हाणे त गालिह सहण जी हद खां बि परे थिंदी थी नज़र अचे एस पी सर ?

पर साईं निखिमिणामल आखिर थियो छा आहे ? सो त बुधायो ?

तेल बुकी तोड़े शादी जे बियन कार्यक्रमन में कॉकटेल पार्टी तायीं त गालिह समझ में अचे पयी पर बारात में रोड ते बियर पियण ? इन गालिह त ताबूत जे आखिरी कोके जो कमु कियो आहे न एस पी सर ? आखिर असां सिंधी मयकशी जा ऐतिरा दीवाना छो आहियूं ?

साईं निखिमिणामल इन गालिह जो लागापो दीवानेपन खां वधीक असां जी इन सोच सां थो रखे त जे मां न कियो त माणुहू छा चवन्दा ? आखिर रहणो त असां खे समाज में आहे न ? हिक बी गालिह बि ध्यान में रखो त इन गालिह जो लागापो असां जे कुछ नयें यादगार करण जे रुख ऐं पाण खे बियन खां जुदा – तरकीयाफ्ता डेखारिण वारी सोच सां आहे।

मतलब त इहो थियो न एस पी सर त बदिलाव जी उमीद करण बेमानी आहे ?

न साईं बदिलाव त थी सघे थो ऐं थियण बि घुरिजे पर इहो बदिलाव करणो पवन्दो पहिंजी सोच में। छा असां जो सिंधी समाज इन गालिह जी चिंता छड़िण वास्ते तयार आहे त माणुहू छा चवन्दा ? छा असां जा विचोले तबके वारा कुटुंब पाण खे तरकीयाफ्ता डेखारिण जे मोह खां बचाये सघन्दा ?

तव्हां इहो त चवण न था चाहियो न एस पी सर त जे असां खे इन बुरी रीत खां आज़ादी खपे त असां खे शख्सी सोच में बदिलाव आणिण जी ज़रूरत आहे ?

बिलकुल साईं निखिमिणामल। डिसो असां जे सिंधी समाज में हिक खास पंथ जा सिंधी इन गालिह खां बिलकुल परे आहिन।
पर एस पी सर उन्हन वटि त पंथ जो आसरो आहे न। सो उहे त बची था वंञन पर आम सिंधी खे त विचार करिणो पवे थो न त माणुहू छा चवन्दा ? मथां वरी जे बिया नंढा बार अथस त उन्हन बारन जी थियण वारी मिट्री मायट्री ते पवण वारे असर खे बि ध्यान में रखणो पवे थो न ?

डिसो साईं निखिमिणामल जे असां खे कहिं बुरायी खां बचणो आहे त का त क़ुरबानी डियण वास्ते तयार थियणो पवन्दो। इन विषय में मुहिंजो हिकु सुझाव आहे। तेल बुकी हुजे या को बियो कार्यक्रम मरदन ऐं औरतुन जो अलग अलग बंदोबस्त करण जी जगह ते गड़ियल प्रोग्राम रखिजे। इहो आम डिठो वियो आहे त पियण जा बहाना गोलिहिण वारा बि माउ, भेण या ज़ाल जे सामहूं पियण में झिझक महसूस कनि था सो इन गालिह जी चिंता न रहन्दी त कॉकटेल जो प्रोग्राम रखण ते माणुहू छा चवन्दा ? बाकी बचियो सवाल प्रोग्राम खे जुदा ऐं यादगार बणायिण जो उन वास्ते त हज़ारें तरीका आहिन।

मुहिंजे हिक करोड़ासपती दोस्त इन मोके खे यादगार बणायिण वास्ते [1] कुटुंबन जे विच में अंतराक्षरी गानन जी चटाभेटी [2] बारन तोड़े ज़ाल मुड़स वास्ते फनी गेम्स जहिड़ा प्रोग्राम रखिया हुआ। मज़े जी गालिह इहा थी जो खाधे जा स्टाल अध रात खां पोय शुरू थिया। पंज साल थी विया आहिन पर अजु बि उन शादी खे याद कियो वेन्दो आहे।

निखिमिणेमल जी चाहिं पूरी थी चुकी हुयी ऐं उन खे गालिह बि समझ में अची वयी सो हू त उथी हलन्दो थियो हा जे तव्हां खे को मोझांरो महसूस थिये थो त हिक कोप चाहिं पी ज़रूर विचार कियो।