फायदेमंद सोशल मीडिया

इहा हकीकत आहे त जहिं वक़त निखिमिणेमल इहे अखर फायदेमंद सोशल मीडिया चया मां पहिंजन कनन ते विश्वास कोन करे सघियुम। आखिर केतिरन सालन खां वठी सुबह साणु – बिना मुंद जी परवाह कन्दे सिज जे उभरण वांगुर – फ़्री जी चाहिं पियण वास्ते हू मुहिंजे सामहूं वेही चाहिं सां गडु नाश्ते जे रूप में मुहिंजो मथो खायिण वास्ते हाज़िर रहंदो आयो आहे सो मुखां सिवाय बियो केर थो थी सघे जहिं खे जाण हुजे त निखिमिणोमल सोशल मीडिया खास करे व्हाट्सप्प मां केतिरो बेज़ार आहे।
मुहिंजी फाटल अखियिन जे अज़ब खे दरकिनार कन्दे निखिमिणोमल शुरू थी वियो।

[1] तव्हां खे त याद हूंदो ई एस पी सर त पोयीं लोकसभा जी चूंडिन जे वायदन जो मरकज़ हुओ बेरोज़गारन खे कमु डियण जो वायदो। हाणे डिसो न चाहे सरकार इहो वायदो पूरो कोन कियो आहे पर अजु सोशल मीडिया जी मेहरबानी सां पढ़ीहियिल लिखियिल त परे अणपढिहियिलन ऐं निखिमिणन जे हथन खे बि कमु मिली वियो आहे। सोशल मीडिया जी मेहरबानी सबब अजु भारत में हर हथु फॉरवर्ड करण में रुधियिल आहे।

[2] चवंदा आहिन त निवडत इंसान खे कामियाब बणाये थी। भारत में लगभग अधु आबादी जो मथो सोशल मीडिया जे वापर सबब सजो डींहुं झुकियिल रहे थो। हाणे जहिं मुलक में अदमशुमारी जो ऐतिरो वड़ो हिसो निवडत भरियो हूंदो तहिं मुलक खे कामियाबी जी राह ते वधण खां केर रोके सघन्दो ?

[3] एस पी सर तव्हां कबूल कियो या न पर सोशल मीडिया सबब अजु असां वटि हर विषय जा माहिर नागरिक वड़े तादाद में मौजूद आहिन। सुबह थिये मस थो जो गुड मॉर्निंग जे मेसेजन जी बरसात शुरू थी वञे थी। तव्हां पहिंजी 60 सालन जी ज़िन्दगी में ओतिरन नमूनन में गुड मॉर्निंग कोन चयी / बुधी हूंदी जेतिरन नमूनन में मुहिंजे इन बॉक्स में हिक डीन्ह ते अचे थी। तव्हां त सजो डींहुं इंटरनेट ते पिया गुजारियो पर मां कसम खायी चयी सघां थो त तव्हां बि मूं जेतिरा इमेज मेसेज कोन डिठा हूंदा।

[4] निंड्र न अचण जी बीमारी वारन वास्ते त सोशल मीडिया भगवान जे वरदान खां घटि कोन आहे छो जो हाणे उन्हन खे न सिर्फ बिस्तरे ते लेथिडियूं पायिण खां आज़ादी मिली वयी आहे पर पाण खे ज्ञानवान साबित करण जो वझु बि मिली वियो आहे ।व्हाट्सएप्प ग्रुपन में त इहे हर डीन्ह ते हर हिक ग्रुप में 50 -50 मेसेज फॉरवर्ड कनि था पर गडोगडु पहिंजे हर कांटेक्ट जे पर्सनल इनबॉक्स में 15 -20 मेसेज मोकलिण बि विसारिन न था।

[5] सोशल मीडिया माणुहुअ खे इहा बि आज़ादी डिनी आहे त हू बिना कहिं रोक टोक जे जेको वणेस सो लिखी सघे थो। तव्हां पाण बि त हफ़्ते में हिकु ब भेरो “इयें ई” लिखो था न।

[6] सोशल मीडिया आमु शहरी खे माहिर ऐं ज्ञानवान बणिजण में मददगार साबित थियो आहे। इहो ज़रूरी न आहे त तव्हां पढ़ीहियिल लिखियिल हुजो या ज्ञान हासिल करण वास्ते अजु बि वड़ा वड़ा क़िताब पढ़ो। बस जे तव्हां एडिटिंग में हुशियार आहियो त तव्हां कहिं बि विषय ते बिये जे लिखियिल खे बदिलाये पहिंजे नाले सां फॉरवर्ड करे सघो था।

[7] इहो सोशल मीडिया ई आहे जेको असां खे मोको डिये थो त असां बेखौफ़ थी कहिं जी बि गिला करे सघूं। न सिर्फ ऐतिरो पर पहिंजी साराह करे पाण खे कौम जो अगुवान समझण जो मोको बि सोशल मीडिया सबब ई मिले थो।

मां घणो बुधो या घणो समझियो इन सां निखिमिणेमल जो लागापो कोन नज़र आयो छो जो पहिंजी गालिह पूरी करे हू त हलन्दो थियो। हुअं बि संदस फ्री जी चाहिं ऐं नाश्ते में मुहिंजो मथो खायिण जो अज़ोको कोटा पूरो थी वियो हो सो निखिमिणोमल वेही बि छा करे हां ?

हाणे निखिमिणेमल सां बी मुलाकात थियण तायीं मुखे बि मोकल डियो। वरी गड़िजन्दासीं।