सिंधी समाज जा व्हाट्सएप्प ग्रुप

अजु जे टेक्नोलॉजी जे जुग में व्हाट्सएप्प हिक वरदान आहे कि को सिरापु या पारातो ?

इहो सवाल इन करे पैदा थियो आहे एस पी सर छो जो व्हाट्सएप्प अजु असां जी मोबाइल तोड़े ज़िंदगी जो हिकु अहम हिसो बणिजी पियो आहे। माउ पीउ वटि चाहे बार जे स्कूल में राखियिल पैरेंट मीटिंग वास्ते टाइम हुजे या न हुजे, दुकान ते वेठा हुजूं या किचन में कम पिया कयूं पर एस पी सर व्हाट्सएप्प वास्ते त असां वटि टाइम ई टाइम आहे।

व्हाट्सएप्प जा बेहद शैदाई हून्दे बि अहिड़न जो तादाद घटि कोन आहे एस पी सर जेके व्हाट्सएप्प मां तंग आहिन। सवाल इहो आहे त जे बेहद घणो चाहु आहे त पोय असां में तंग थियण जी भवाना किथां थी पैदा थिये ? सिंधी में चवणी आहे त पहिंजे बार जा गोबा भी मखण लगन मतलब जहिं वास्ते चाहु आहे उन जी ख़राब गालिह बि सुठी लगे, छा इनकरे असां खे व्हाट्सएप्प पसंद आहे ?

हकीकत में जे असां डिसूं एस पी सर त व्हाट्सएप्प वापिरायिण वारन खे

[1] पहिंजा लेख लिखण वारन

[2] बियन जा लिखियिल मैसेज फॉरवर्ड करण वारा

[3] रोज़ गुड मॉर्निंग जा फोटो / इमेज मोकलिण वारा

[4] अखबारून जा पी डी एफ फॉर्मेट या लिंक्स मोकलिण वारा

[5] बिना कुछ लिखण जे इंटरनेट ते मौजूद वीडियो / ऑडियो मोकलिण वारा

[6] बेशुमार ग्रूपन में शामिल थियण वारा ऐं

[7] इन्हन सभनी जो मनपसंद शिकार इहे सभु गालिहियूं डिसण / पढ़ण वारा जहिड़न कुछ किसमन में विराहिजे सघिजे थो।

जे तादाद जी गालिह कजे एस पी सर त पहिरियें छह्न किसमन वारन जो तादाद कुल व्हट्सएप्प वापिरायिण वारन जे तादाद जे 15 -20 % खां वधिक न थो थिये मतलब बाकी 80 % खां बि वधीक तादाद वारा इन्हन थोरायी वारन शिकारिन जा शिकार आहिन।

एस पी सर हाणे अचो तंग थियण जे सबनन ते त इहे मुख्य तोर सिर्फ 2 आहिन

[1] हर हिक ग्रुप में आयल मैसेजन जो तमाम वड़ो तादाद

[2] हिक ई मैसेज जो केतिरन ई ग्रुपन में नज़र अचण

हाणे डिसो न एस पी सर तव्हां बि त हीउ सागो लेख पहिंजन सभनी ग्रुप्स में पोस्ट कन्दा न ? मुहिंजो सवाल सिर्फ ऐतिरो आहे त मां व्हाट्सएप्प वापिरायिण त बंद न थो करे सघां पर छा तव्हां वटि बि को उपाय कोन आहे जेको व्हाट्सएप्प मां तंग थियलन खे पाणु बचायण में मदद करे ?

मां परमात्मा जा थोरा मंञिया जो अजु निखिमिणोमल अहिड़े सवाल में अटकियो आहे जो हुन वटि चुपचाप वेही मुहिंजी गालिह बुधण खां सिवाय को बियो इलाज कोन आहे। सो खुशनसीबी सां मिलियिल हिन विरले मोके जो फायदो वठन्दे मां बि शुरू थी वयुमं।

साईं निखिमिणामल जे सवाल आहे त जवाब बि पक हूंदो। हाणे डिसो न हर हिक शहर में सिंधी समाज जा 5 -10 व्हाटसअप ग्रुप त ज़रूर आहिन ऐं असां इन्हन सभनी में शामिल थियण खां सिवाय पंजन अठन अहिड़न सिंधी ग्रुपन जा बि मेंबर आहियूं जिन में अलग अलग शहरन जा सिंधी शामिल आहिन।

तव्हां हिकदम सही था चवो एस पी सर मां पाण 20 खां वधीक ग्रुपन में शामिल आहियां त मुहिंजे हिक बिये मायट्र जी मोबाइल में ग्रूपन जो तादाद 100 खां बि वधीक आहे। रियाटर थियलन जो आल इंडिया ग्रुप अलग आहे। 

बस साईं निखिमिणामल उपाय इन तादाद में ई आहे। जे तव्हां पहिंजे शहर जे सभनी ग्रूपन जी जगह ते चूंडियिल 4 -5 ग्रुप रखो ऐं बिया भी 4 -5 ग्रुप रखो त तव्हां जे ग्रूपन जो तादाद मतलब मैसेजन जो तादाद अधु थी वियो।

पर एस पी सर तव्हां जे हिन उपाय सां त मुहिंजो सामाजिक दायरो घटिजी वेन्दो। छा मैसेजन जो तादाद घटायिण जो को बियो उपाय कोन आहे।

छो न आहे ! ज़रूर आहे ! पर इन वास्ते बि तव्हां खे पहिंजन कुछ ग्रूपन जी क़ुरबानी डियणी पवंदी। डिसो तव्हां पाण चयो त पोस्ट करण वारन / फॉरवर्ड करण वारन जो तादाद घटि आहे। बस साईं निखिमिणामल तव्हां खे इन्हन जा नाला याद रखी पहिंजन सभनी ग्रूपन जी मेंबर लिस्ट चेक करणी आहे। जेके तव्हां जा ऐं इन्हन जा कॉमन ग्रुप आहिन तिन मां के चूंडियिल ग्रुप छडे डियो अहिडे नमूने जो इन्हन वधीक फॉरवर्ड करण वारन मां हर हिक जे ऐं तव्हां जे कॉमन ग्रुपन जो तादाद बिन खां वधीक न बचे।   

वाह ! एस पी सर वाह ! छा त उपाय बुधायो अथव। न सिर्फ मैसेजन जे तादाद सबब तंग थियण पर सागिया फोटो / वीडियो हर हर डिसण खां बि मुक्ती मिली वेंदी।

त दोस्तों निखिमिणोमल त खुश थी हलन्दो थियो पर तव्हां बुधायो त तव्हां बि खुश थिया या न ?