रोंग नंबर

मां तव्हां जो दोस्त निखमिणोमल। तव्हां सभनी खे बि इन रोंग नंबर जो आज़मूदो ऐं मज़े या गुसे जो अहसास त ज़रुर हूंदो। इन रोंग नंबर जी सभ खां वडी गालिह त इहा आहे जो इहो अचे बि उन वक़त जहिं वक़त तव्हां या त पहिंजो पाण मां बेज़ारु [तंगि] वेठा आहियो या सुकून भरी निंड्र में हसीन सपनन में रुधिया पिया [बिजी] आहियो। पर मां इहो सभु हिते सिधो तव्हां खे छो पियो थो चवां? हलो त हली एस पी सर वटि चांहि बि पियूं ऐं संदस दिमाग ही डही बि कजे।
अजु त कुछ वधीक ई खिलो पिया साईं निखमिणामल ?
मुहिंजे सवाल खे बुधो अणबुधो कन्दे निखमिणेमल चयो।
तव्हां खे त याद हूंदो ई एस पी सर! त थरड़ीअ [सिंध प्रान्त जे दादू ज़िले जो गोठु] में तव्हां जे पिता साहिबन जो हिकु दोस्त हुओ कुंगूमल ?
मां मन ई मन में वाहेगुरु जो नालो खंयो शाल अजु निखमिणोमल मुहिंजे ख़ानदान जी गालिह न कढ़े।
तव्हां खे खबर अथव उन कुंगूमल जो पोट्रो घुमणमल न सिर्फ मुहिंजी संस्था सां जुडियो आहे पर उन खे तव्हां जी मुहिंजी दोस्ती जी बि खबर आहे।
मां पहिंजो पाण खे चयो रुगो उन घुमण खे छो ? दुनिया ज़हान खे खबर आहे त पंजे अठें डींहुं सिज उभिरण खां अगु ई निखमिणोमल पहुची वेन्दो आहे एस पी सर जे घरि।
बस एस पी सर! उन घुमणमल जी गालिह याद अची वयी सो खिलां पियो।
सचु पुछो त हाणे तव्हां वांगुर मुहिंजो सबुरु बि जवाब पियो डिये त आखिर निखमिणोमल असली गालिह कडिहिं थो शुरु करे?
धिआनु डिजो एस पी सर ! जिन गालिहिन खे असां अजायो ऐं बेमतलब समझूं पिया हक़ीक़त में उन्हन जे करे ई असांजी ज़िंदगी में खिल ख़ुशी अथव। थियो छा जो सूमर डींहुं इन घुमणमल जी ऑफिस जा ट्रे किलार्क बिना बुधाये कोन आया। मथां वरी टेलीफोन ऑपरेटर अगु ई मोकल वठी वयी हुयी सो लाचारी में घुमणमल खे फ़ोन अटेंड करण जी ज़वाबदारी खणिणी पयी।
तव्हां खे ज़रुर हिंदी मुहावरो खोदा पहाड़ निकला चूहा याद अची वियो हूंदो। निखमिणोमल ऐड़ी रामायण बुधाये चुको आहे पर सामहूं न त गालिह आयी आ न गालिह जो गाटो। हिन पासे धिआनु डियो एस पी सर ! जेका पहिरियीं फोनि घुमणमल खंई।
हलो! हीय जेका अख़बार में तव्हां जी मेहिन बाबत ऐडवर्टाईजमेंट छपी आहे न
पर दोस्त असां जो मेहिन जो न मेवन जो धंधो आहे
हा! हा! मुखे सिर्फ हिक गालिह पुछिणी आहे तव्हां जी इहा मेहुन खे जुलाब थियण जी दवा माणुहुन ते बि असर कंदी छा ?
दोस्त मां चयो न त असांजो धंधो
धंधो छा जो बि हुजेव पर जे जाहिरात छापायो था त सवालन जा ज़वाब बि डियो न ? छो था विसारियो त कोरोना जो समो आहे। का बि दवा कमि आणिण खां अगु ज़रुरी आहे त असां खे उन दवा जे साइड इफेक्ट्स बाबत पकी पुख्ती जानकारी हुजे ।
हिकु बियो नज़ारो डिसो
हलो ! मां ममतामयी मेवा कंपनी मां
कम्पनी जो नालो पोय बुधायिजो, पहिरियूं त इहो बुधायो त हिन किसम जी जाहिरात छपायिण जो मतलब छा आहे ?
वेचारे रोंग नंबरन जे सतायल घुमणमल जी दिल त चाहियो त उथी मथो भिति सां भनियां पर सबुर कन्दे चयो
साईं अख़बार में ऐड त धंधो वधायिण वास्ते छपायी वेंदी आहे न ?
त छा तव्हां धंधो वधायिण वास्ते माणुहुन जा ख़ानदान खतम करणु था चाहियो ?
न साईं न ! असां त माणुहुन जी तंदरुस्ती सुठी रहे इन वास्ते हिकदम फ्रेश ऐं बिना मिलावट वारा
पर तव्हां जी जाहिरात त बियो कुछ थी चवे ? तव्हां छा था चाहियो त फ्री जी लालच में माणुहू पहिंजन बुजुर्गन खे मारे छडे ? नंढे कफ़न सां गडु वडो कफ़न फ्री जी जाहिरात जो आखिर मतलब छा आहे ?
साईं असां कफ़न विकिणिण जो धंधो ई कोन कयूं त अहिडी ऐड
छा तव्हां मोहमाया मुर्दा कम्पनी मां न था गालिहायो?
न साईं! मां त ममतामयी मेवा कंपनी मां थो
सॉरी ! वेरी वेरी सॉरी ! रोंग नंबर।
वेचारो घुमणमल! पहिंजे मथे जा वार न पटे त बियो छा करे। लंच तायीं हालत इहा थी जो घुमणमल खे डिसी ऑफिस जो मैनेजर हुजे या इकलोतो आयल क्लर्क या मागे दरवाज़े ते बीठल चपरासी उन्हन लाय पहिंजी खिल रोकिण डुखी गालिह बणिजी पयी।
मतलब इहो थियो साईं निखमिणामल इन रोंग नंबर तव्हां जे घुमण जो मथो घुमाये छड़ियो ?
सचु था चवो एस पी सर ! पर घुमणमल बि आखिर आहे सिंधी न ?
पका अगुवान थी विया आहियो तव्हां। हाणे भला रोंग नंबर सां सिंधी खे जोड़िण जो कहिड़ो मतलब ?
तव्हां खे बि एस पी सर ! हर गालिह अलफु अम्ब खां शुरु करे समझायिणी पवे? मां कौम तोर न सिंधी सियायणप जे खियाल खां सिंधी चयो।
उन घुमणमल जेको कियो सो सिर्फ सिंधी ई सोचे सघे थो। लंच टाइम में घुमणमल पहिंजे टेलीफोन ऑफिस जे दोस्तन जी मदद सां न सुबूह खां आयल फोन्स जा न सिर्फ नंबर्स हासिल करे वरिता पर ट्रिन चैयन मोबाइल नंबर्स जे वापिरायिण वारन जा नाला बि हासिल करे वरिता। लंच तां मोटी घुमणमल फ़ोन खणी वेठो।
हलो ! मां फेरुमल सां गालिहायां पियो न ?
न निभागा मां फेरुअ जी ज़ाल आहियां हू सभागो त सिनान ते वियो आहे।
भाभी डिसो मुखे तव्हां खे क्रेडिट कार्ड डियण बाबत गालिहायिणो हुओ जे फेरुमल सिनानु करे निकरण वारो हुजे त मां फोन होल्ड कियां ?
भाउ क्रेडिट कार्ड चयो न तो ? हां भाउ ! मतलब खरचु हाणे कयूं ऐं पेसा महीने खां पोय भरियूं ? हाणे इन में हू सभागो छा कन्दो। जेसीतायीं मां पकोड़ा तरे गाड़े ते ओवन रखी न डियासं तेसीतायीं त हू पकोड़ा विकिण वास्ते घर खां बाहिर कदम न कढ़े।
वेचारो घुमणमल ! लगुस नमाज़ बकशायिण आयुम ऐं रोज़ा गिचीअ पयिजी विया पर सिंधी हिमत कीयं हारे सो हुन बी फोन लगायी।
हलो ! मां मिरचूमल जो पोट्रो, सरकारी नौकरी करिण वारो रिटायरमेंट वरतल घनशो थो गालिहायां! तव्हां खे केर खपे ?
साईं घनशामदास मुखे तव्हां सां ई गालिहायिणो आहे।
त गालिहायि न अबा ! किन इंतिज़ार कंदे त सरकार कायदो पास करे तुहिंजे गालिहायिण वास्ते।
हाणे साईं घनशामदास गालिहायिण वास्ते सरकार जे कायदे पास करिण जी कहिड़ी ज़रुरत ?
न अबा हुअं त का ज़रुरत कोन आहे पर के अगुवान त चाहिन था न त सरकार कायदो पास करे। रुगो अगुवान जो टेलीविजन न्यूज़ चॅनेल्स वारा बि त इहो चाहिन था।
छा गालिह था बुधायो ! गालिहायिण वास्ते सरकारी कायदो ?
बुधु अबा तूं त शायद उमास जी रात जो पैदा थियो आहियीं ! गालिहायिण लाय न पर सरकार जे खिलाफ कायदो रदि करिण वास्ते आंदोलन करिण जो मोको मिले इन वास्ते चाहिन था त गालिहायिण वास्ते सरकार कायदो पास करे।
ख़ैर साईं घनशामदास ! मां ओधर क्रेडिट कार्ड कम्पनी मां थो गालिहायां।
पर अबा मां त बुधो आहे त क्रेडिट कार्ड त नगद पेसा न डियणा हुजन त वापिरायो वेन्दो आहे। हाणे जेको नगद जी जगह ते कमि अचे उन सां ओधर जोड़िणिण जो मतलब छा ?
साईं घनशामदास मां चयो माँव न त मां ओधर क्रेडिट
बिहु अबा थोरो साहु पटि ! तूं गालिहायीं थो पर छो थो गालिहायीं ऐं वरी मूं सां ई छो थो गालिहायीं ? मुखे साफु साफु मतलब नगद में बुधण में पियो अचे ऐं तूं चयीं थो त ओधर कम्पनी मां थो गालिहायां ?
न चाहीईन्दे बि मुहिंजी खिल निकरी वयी।
तव्हां चवन्दा आहियो न एस पी सर ! माणुहुअ जो वकतु सो ख़राब हुजे उठ ते वेठल खे बि कुतो चकु पाये वठे।
मतलब साईं तव्हां जे इन घुमण जो उन डींहुं वकतु ई ख़राब हुओ।
बिलकुल एस पी सर तव्हां जी सोच बिलकुल सही आहे, पर हुन सिंधी सियाणप खां कमु वरितो। ऑफिस मां निकरी सिधो घरि हलियो वियो।
हिते बि मुहिंजे सोच मूजिब थियो मतलब चांहि पूरी थी वयी हुयी सो निखमिणोमल बि वरी अचण जो चयी हलन्दो थियो।