अनीता हासानंदानी

बॉलीवुड हिंदी फिल्म जी दुनिया में हिक आम चवणी आहे त हिते पहिंजी पसंद जो कमु मिलण जो इन्तिज़ार बेमानी आहे। जेको कमु मिले सो कंदा रहन्दा त हिक डींहुं तव्हां इन हालत में हूंदा जो पहिंजी पसंद जो कमु चूंडे सघो। अनीता बि बिलकुल सागी गालिह ते अमल कयो। पहिंजी पहिरियीं फिल्म जेका साउथ इंडियन फिल्म समुराई (तेलुगु भाषा में) हुयी साइन करण खां अगु मिलियल हिकु बियो टेलीविजन सीरियल हरे कांच की चूडिया में कमु कयो। 2002 में Varushamellam Vasantham साउथ इंडियन फिल्म अनीता जी पहिरियीं फिल्म हुयी। जलदु ई अनीता पहिंजी पहिरियीं हिंदी फिल्म कुछ तो है में बि कमु कयो पर इहो संदस फ़िल्मी कॅरियर खे अगते वधायिण में मददगार साबित न थियो। तमाम घटि जो इन गालिह ते धियान हूंदो त इन पहिरियीं हिंदी फिल्म जे रिलीज़ थियण खान अगु अनीता 1999 जी हिट फिल्म ताल जे गाने इश्क़ बिना में नज़र अची चुकी हुयी।

2005 जो सालु अनीता जी किसमत जे सिके खे कामियाबी जे रुख में बदिलायिण वारो हुओ। टेलीविजन सीरियल काव्यांजली जी अंजली जे रूप में माणुहू अनीता खे सुञाणिण लगा। इहो सीरियल हिक आम मिडिल किलास छोकिरी जे हिक वड़े बिजनेस घराणे जे छोकिरे सां शादी जे जीवन ते आधार रखन्दड हुओ नतीज़े तोर अनीता खे पहिंजी अदाकारी जो ज़लवो डेखारिण जो सुठो वझु मिलियो।

अनीता टेलीविजन सीरिअल्स सां गडु हिंदी ऐं साउथ इंडियन फिल्म में कमु करण जारी रखियो। अजु इहो चयी सघिजे थो त अनीता वासिते फ़िल्मी परदे जी भेट में टेलीविजन वधीक बेहतर साबित थियो आहे। फियर फेक्टर खतरो के खिलाड़ी, डांसिंग कुविन, झलक दिखला जा जहिड़न रियलिटी शोज में शामिल थियण सां गडु अनीता कॉमेडी सरकस का जादू जहिड़े टेलीविजन शो खे पेश कन्दे पहिंजे एंकर हुजण जी सलाहियत जो बि प्रदर्शन कयो। 2013 खां शुरू थियल टेलीविजन सीरियल ये है मुहोबतें में शगुन जे रोल खेसि बेहद वधीक मशहूरी डिनी। एकता कपूर जे सीरियल नागिन -3 में बि संदस निभाईल रोल जी काफी साराह थी हुयी।