अष्टविनायक यात्रा

मोरेश्वर – मोरगांव
मोरगांव हिक नढो गांव आहे जेको पुणे जिले जे बारामती तालुके में आहे।  मोरगांव ऐं पुणे जे विच वारो मुफसिलो अटकल 60 KM आहे।  कहिं समे में हीउ  गांव में भारत जे राष्ट्रिय पखी मोर जो कुदरती रिहाइशी लेखियो वेन्दो हो तहिं करे ई हिन गांव जो नालो मोरगांव पियो आहे।  मोरेगांव में कारा नदी जे किनारे ते मोरन जे अचण वारी जगह जे वेझो मंदिर हुअण सबब हिते श्री गणेश खे मोरेश्वर सडिबो आहे। पहिरियीं नज़र में श्री गणेश जो मंदिर कहिं मस्जिद वांगुर नज़र अीन्दो आहे पर जे परियां खां डिसजे त कहिं किले खे डिसण जो अहसास थींदो आहे।    
सिद्धेश्वर – सिद्धटेक
श्री गणेश जे हिन मंदिर खे शक्तिशाली देवता जो मंदिर लेखियो वेन्दो आहे छो जो मराठी भाषा में सिंद्धि मतलब थिये शक्ति हासिल करण। हिन्दु विश्वास मूजिब हिन गोठ जे भर वारे पहाड़ सिद्धटेक ते भगवन विष्णु सिद्धि हासिल कयी हुयी। सिद्धटेक गोठ पुणे जे भर वारे जिले अहमदनगर में आहे। मंदिर भीमा नदी जे किनारे ते ठहियिल आहे। हितां जी शांती शायद तव्हां खे अज़ब में विझे छो जो वहन्दड पाणी बि को खास वढो आवाज़ न थो करे। इतिहास मुजीब अहिल्याबाई होल्कर हिन मंदिर में मूर्ति बरपा कयी आहे।
बल्लेलश्वर – पाली
जे पाली गोठ तमाम घणे मींह वास्ते मशहूर आहे त पंज धातुअ जो घिन्ड श्री गणेश जे मंदिर जी सुञाणप आहे। हीउ अकेलो मंदिर आहे जीते श्री गणेश हिक ब्राह्मण [जहिडियिन कपडन] जे वेस में नज़र अचे थो।  मंदिर जे हिक पासे अम्बा नदी वहे पयी त बिये पासे सारसगढ़ किलो आहे। कुदरती नजारन जे शौकीनन वास्ते त हीउ जगह स्वर्ग खां घटि न आहे।  हिन मंदिर जी खास गालिह आहे त उभरंदड सिज जूं किरणूं मंदिर में मौजूद श्री गणेश जी मूर्ती ते पवन्दियुं आहिन।
वरद विनायक [सिद्धिविनायक] – महाड
श्री गणेश जो हीउ मंदिर भगतन जूं आशु पूरियूं कन्दड [वर डीन्दड ] तौर मशहूर आहे।  तहिं खां सिवाय 1892 खां लागीतो बरणदड “नंदा दीप ” बि हिन मंदिर जी खास गालिह आहे। इतिहास आहे त मंदिर जी गणेश मूर्ती मंदिर जे पुठियां हिक खुह मान मिली हुयी पोय उन जगह ते 1725 में मंदिर ठहीयो आहे।  महाड कुदरती नजारन लाय मशहूर इलाके कोंकण में मौजूद हिक दिलकश गोठ आहे। 
चिंतामणी – थेऊर
हीउ पिण पेशवाउन जे समे में ठहियल मंदिर आहे। चयजे थो त लगभग चार सौ साल अगु बि हिन मंदिर जे ठहिरायिण ते अटकल चालीह हज़ार खर्च आयो हो।  हिते श्री गणेश जी पूजा चिंताऊँ हरिंदड [दूर कन्दड] ऐं दिमागी शांती डियण वारे देवता जे रूप में थींदी आहे।  मंदिर जे काठ जे ठहिईल हॉल ऐं पंज धातु घिण्ड खे डिसी तव्हां अज़ब में पयजी वेन्दा।    
गिरजात्मज – लेण्यादिरी
गणेश पुराण में हिन कुकड़ी नदी किनारे वसियिल जगह खे जीमपुर या लेखान परबत नालो डिनिल आहे।  पहाड़ी जी चोटीअ ते पथरन खे खोट्रे हीउ मंदिर ठाहियो वियो आहे। मंदिर बुद्ध धर्म जे कहिं गुफा मंदिर वांगुर लगे थो।  लगभग चौरस 50 फुट वेकिरो ऐं 60 फुट डिघो मंदिर हिक ई पथर मां ठहियिल ऐं बिना खम्भन वारो आहे।  देवी पार्वती गणेश भगवान जी माता जे अनेक नालन मां हिकु नालो आहे गिरिजा ऐं संस्कृत अखर “आत्मज ” जो मतलब आहे पुट्र इन्हन बिन्ही अखरन खे मिलाये गिरजात्मज ठहियो आहे। 
विघ्नेश्वर – ओझर
विघ्न हर्ता – विघ्न रुकावटूं दूर कन्दड – हिक बियो नालो आहे श्री गणेश जो।  हिन मंदिर में श्री गणेश दर्शन कन्दड भगतन जो इहो आम आजमूदो आहे त दर्शन खां पोय हू पाण खे चिंता मुक्त महसूस कन था। ओझर में हीउ मंदिर कुकड़ेश्वर नदी किनारे ते आहे।  मंदिर जी सुनहरी छत वारो हिसो पेशवा जो डिनिल आहे।  हर साल तिरपुरी पूर्णिमा ते चार डीहं हलन्दड उत्सव मलिहायो वेन्दो आहे।
महागणपति – रांझानगांव
श्री गणेश जो हीउ मंदिर पुरातन मंदिरन मां हिकु आहे जेको नायी ऐं डहीं सदीअ में पेशवाउन जी हुकूमत जे दौर में ठहियिल आहे।  इहो विश्वास आहे त हिते गणेश मूर्तीअ खे कहिं समे 10 सुण्डियूं ऐं 20 हथ हुआ, इन सबब हिते श्री गणेश खे महागणपति चयो वेन्दो आहे। रांझानगांव पुणे अहमदनगर हाईवे ते पुणे खां लगभग 70 KM परे वसियिल गोठ आहे।