संत निरंकारी मिशन
संत निरंकारी मिशन बाबत
संत निरंकारी मिशन सिंधियन जे मुख्य धार्मिक पंथन मां हिकु आहे। जेतोणिक इन्ही पंथ जी बुनियाद सिक्ख धर्म जे आधार ते थियल लेखी वेन्दी आहे तहिं हूंदे बि सिंधी कौम जे धार्मिक आचरण व्यवहार ते इन पंथ जो काफी असर आहे।
किन खास रिवायतुन ऐं पूजा करण जे कुछ जुदा तरीके सबब हिन पंथ जे श्रद्धालुन पहिंजे लाय हिकु नवों लक़ब “निरंकारी सिंधी ” हासिल कियो आहे। निरंकारी मिशन पहिंजन श्रद्धालुन जे धार्मिक ऐं आध्यात्मिक वाधारे ते धिआनु डियण खां सिवाय संदन सामाजिक जीवन ते बि धिआनु डिये थो। मुफ्त मेडिकल चेकउप या रत दान जहिडियिन मशगुलियुन वसीले निरंकारिन खे हिक बिये सां तोड़े मकानी समाज सां जुडियिल रखण जी तोड़े मानवता जी सेवा कोशिश कयी वेंदी आहे। संत निरंकारी पंथ में जडिहिं हिक निरंकारी बिये सां मिले थो त उहे “धन निरंकार ” उचारे हिक बिये जो सतिकार कनि था। निरंकारी भवन में प्रवचन सिंधी भाषा में न पर हिंदी या मकानी भाषा में थींदो आहे छाकाण हर हंद ते सिंधियिन सां गडु मकानी माणुहु पिणु निरंकारी आहिन।
निरंकारी मिशन जो इतिहास
निरंकारी इतिहास में पहिरियीं अहमियत वारी तारीख आहे 25 मई 1929 जाहिं ड़ीहुँ पेशावर में बाबा बूटासिंघ बाबा अवतारसिंघ सां मिलिया। बाबा अवतारसिंघ बाबा बूटासिंघ जे शुरुआती शिष्यन माँ हुआ। उहे पहिंजो जीवन “ब्रह्म ज्ञान ” जे फैलाव लाय अर्पण करे चुका हुआ। बयी वढे धीरज सां इन कोशिश में लगा पिया हुआ त वधि में वध माणहुन तायीं संदेशो पहुंचे त “बिना ईश्वर खे जाणिण जे ईश्वर जी पूजा करण जो को बि मतलब न आहे। “
1943 में बाबा बूटासिंघ फ़ानी दुनिया खे छडे निरंकार जो हिसो बणिया । विरहांङे बैद बाबा अवतारसिंघ दिल्ली अची रहिया जिते सत्संग करण ऐं इंसानियत जी सेवा करण जे मकसद सां संत निरंकारी मिशन रजिस्टरड करायो वियो। हिते हाणे शहंशाह बाबा बूटासिंघ जी “सम्पूरन अवतार बाणी ” जे रूप में शिष्यन श्रद्धालुन ते महर थियण लगी।
1962 में बाबा अवतारसिंघ पंथ जे रोजने कमन जी जवाबदारी बाबा गुरबचनसिंघ कहे डयी हिक आमु शिष्य तोर रहण लगा। 1980 खां बाबा हरदेवसिंघ महाराज पंथ जी जवाबदारी सांभालिण लगा। बाबा हरदेवसिंघ जन जो पक्को विश्वास आहे त आध्यत्मिक विकास ई उहो माध्यम आहे जहिं वसीले असां इंसानी जन्म जे मूल मकसद , मिली जुली रहण ऐं विश्व विकास जहिडा मकसद हासिल करे सघऊं था। हिते “भईचारो ” हिकु सपनो न पर हासिल थी सघन्दड मंज़िल आहे।
अजु मिशन जूं 1500 शाखाउं [जिनमां अटकल 200 भारत खां बाहिर आहिन ] कमु पयुं कनि। सजे देश में अटकल 600 निरंकारी सत्संग भवन आहिन जिते रोज़ नियम सां सुबह शाम सत्संग थींदो आहे।
पंज प्रण
मिशन जो मकसद आहे त इंसान पहिंजन रोज़ने कमन में बि दैवीय आनंद जी अनुभूति हासिल करे इनकरे पंथ जे सभनी शिष्यन खे हेठियां पंज प्रण पालिण लाय चयो वेंदो आहे।
[१] सरीर, दिमाग ऐं पैसो निरंकार जो डिनल आहे। इन्हन खे निरंकार जी मिल्कियत समझी इन्हन ते घमंड न करण घुरिजे।
[२] असांखे पहिंजी जात धर्म या वर्ण आश्रम जो अभिमान न हुअण घुरिजे।
[३] असांखे कहिंजे बि खाईण या कपडा पायिण जी आदत सबब नफरत न करण घुरिजे।
[४] असांखे गृहस्थ आश्रम में रहण घुरिजे। साधु सन्यासी या फ़क़ीर थी समाज ते बोझु थियण मां को फायदों कोन्हे।
[५] सतगुरुअ जो डिनल ज्ञान सतगुरुअ जी आज्ञा बिना बियन खे न बुधायीण घुरिजे।