प्रेम प्रकाश पंथ

प्रेम प्रकाश मंडल वेझडायीअ जे समे में सिंधी कौम जे धार्मिक विशवासन मां वधि में वधि तरकियाफता पंथ आहे। प्रेम प्रकाश पंथ जी शुरुआत सिंध जे मशहूर संत कवी स्वामी टेऊँराम साहिब नवाबशाह जिले जे टंडो आदम में कयी हुयी। स्वामी टेऊँराम मूजिब

तिल भर मछली खात जो, कोट गउ करे दान।
काशी करवट जा मरे , ता भी नरक निधान।।

तहिं करे हिन पंथ में शाकाहार खे वडी अहमियत आहे ऐतिरी जो मांसाहारीन खे नामु दान मिलण तमाम विरलों आहे। 1947 जे विरहांङे खां पोय उल्हासनगर पंथ जी मशगूलिन जो वडो ऐं अहमियत वारो मरकज़ बणजी पियो। हालांकि स्वामी सर्वानंद 1952 में जयपुर में अमरापुर आसथान (स्थान ) बरपा कियो। अजु बि पंथ जो हेड क्वार्टर जयपुर में आहे। स्वामी शान्ती प्रकाश जन केतिरियूं सामाजिक ऐं धार्मिक संस्थाऊँ उल्हासनगर तोड़े महाराष्ट्र जे बियन शहरन में बरपा कयूं। अजु इन्हन सभनी जी संभाल करण ऐं श्रद्धालुन खे मोक्ष जी राह डेखारिण जी जवाबदारी स्वामी देव प्रकाश महराज ते आहे। स्वामी देव प्रकाश जन न सिर्फ हरिद्वार जो आश्रम ठाहिरायो आहे पर महाराष्ट्र ऐं गुजरात में केतिरा नवां प्रेम प्रकाश आश्रम पिण शुरू किया अथऊँ।

सिंधियिन जे अलग अलग धार्मिक विशवासन मां प्रेम प्रकाश मंडल हिकु अहिडो पंथ आहे जहिंजा हिन वक़्त तायीं गुरु गदी ते वेठियिल सभु संत सिंधी कुटुंब में जन्म वरतल आहिन। “सतनाम साखी ” हिन पंथ जो हिक किसम जो गुरु मन्त्र आहे छो जो जडहिं बि के प्रेम प्रकाशी हिक बीए सां मिलन त हिक बिये जो आदर करण वास्ते इहो लफजु वापिरायिन था। स्वामी देव प्रकाश में विशवास रखण वारा प्रेम प्रकाशी हिक बियो अखर “जय श्रीकृष्ण ” बि वापिरायिन था।

गांधीनगर कोल्हापुर जे प्रेम प्रकाश आश्रम, स्वामी टेऊँराम मंदिर ऐं स्वामी शान्ती प्रकाश महिला आश्रम जी सार संभाल लहण वास्ते स्वामी देव प्रकाश महराज वक़त ब वक़त अीन्दा रहन्दा आहिन। पंथ जे गुरुन जा जन्म डीहं, वरसियूं, मंदिरन जा सालाना डीहं, हितांजा मुख्य उत्सव आहिन। बियन शहरन मां आयल प्रेम प्रकाशीन वास्ते प्रेम प्रकाश मंदिर में रहण जी बि सहूलियत आहे। वेझडायीअ में हिते हर महीने जी १५ तारीख ते स्वामी शान्ती प्रकाश मनवांछित डींहु मलाहिण शुरू थियो आहे।

प्रेम प्रकाश पंथ में इहा रिवायत आहे त को बि कार्यक्रम या उत्सव “ध्वजारोहण ” सां शुरू थींदो आहे ऐं पलव सां पूरो। पंथ में हर हिक मोके वास्ते अलग प्रार्थना आहे।