गिरीश साधवानी

मुंबई महाराष्ट्र में जावल ऐं वडे थियल गिरीश साधवानी खे सिंधी गायिकी जे खेतर जो आयींदो लेखियो वेंदो आहे। 21 फरवरी 1985 ते मुंबई में मीरा ऐं गिरधर साधवानी जे पुट्र जे रुप में जनम वठण वारो गिरीश चाहे अमीरी जे महलन में न जाओ आहे पर खेसि जनम खां वठी ई संगीत ऐं गायिकी सां गडु धरम ऐं सूफियत वारो माहोल जरुर मिलियो आहे। संदस पिता गिरधर साधवानी न सिरफ किलासीकल संगीत जो जानकर हुओ पर श्रीमद भागवत गीता ते 30 ऑडियो कैसेट पेश करण जो मानु बि खेसि हासिल हुओ। पिता जे इन लाडे सबब ई रिवायती तोर ते इसकूल में पढ़िहायी शुरु करण खां अगु ई गिरीश सा रे गा मा पा जो गियानु हासिल करे रियाज करण शुरु करे चुको हुओ। संगीत जी शुरुआती सिखिया सां गडु पिता साहिबन गिरीश खे धरम ऐं सूफियत जे विच वारे बेहद सनिही लीक जहिड़े फरक बाबत बि समझाणी डिनी। इन समझाणीअ न सिरफ पहिंजे गायिकी जे हुनर खे बेहतर बणायिण में मदद कयी पर संगीत जी समझ वधायिण में बि इहा मददगार साबित थी।

गिरीश जे इसकूल में हूंदे ई संदस माता महसूस किओ त पिता जे बेवकते फानी दुनिया मां मोकिलाणीअ सबब गिरीश जे कुदरती जनम जाति संगीत जे हुनर जे वधारे जी राह में हिक किसम सां रुखिनो पेदा थी वियो आहे। संगीत जे हुनर जे वाधारे लाय गिरीश खे कहिं जे मारगदरशन जी जरुरत आहे। बस गिरीश खे संगीत जी सिखिया डियण वारे गुरुअ जी गोलिहा शुरु थी वयी। खुशकिसमतीअ सां इहा खोज नामवर संगीतकार ऐं फिलोसोफर डॉ पंडित आसकिरण शर्मा ते अची पूरी थी ऐं गिरीश जी संगीत सलाहियतुन जो अहसास करे पंडित जी पिणु खेसि संगीत जी सिखिया डियण वासिते तियार थी विया।

इहा गालिह गिरीश जी खुशकिसमतीअ जी निशानी आहे जो पंडित जी त खेसि संगीत सेखारिन पिया पर गडोगडु पंडित जी जीवन संगनी श्रीमती योगाई शर्मा – जेका अगिते हली गिरीश लाय गुरु मां बणी – बि गिरीश जी संगीत जी रह ते तरकी ते अखि रखण लगी। गुरु मां जी इछा हुयी त गिरीश किलासीकल संगीत गायिकी में नालो रोशन करे त पंडित जी जो मकसद हुओ गिरीश खे लाइट म्यूजिक जे संसार में हिक बेहतरीन गायक जे रुप में डिसण जो। इहो गिरीश जो संगीत वासिते चाहु ऐं काबिलियत जो सबूत आहे जो हुन बिनही जी आस उमीद मूजिब गायक बणिजण में कामियाबी हासिल कयी आहे।

रिवायती इसकूली पढ़िहायी ऐं संगीत जी सिखिया हलण जे दोर में ई गिरीश केतिरिन ई चटाभेटिन में बहरो वठण ऐं गायिकी जा प्रोग्राम पेश करणु शुरु करे छडियो हुओ। इन अरसे में हुन आल इंडिया इंटर कॉलेजिएट गजल कॉम्पीटीशन, आल इंडिया इंटर कॉलेजिएट किलासीकल कॉम्पीटीशन में अवार्ड हासिल करण सां गडु ISCKON मुंबई जे बाल उत्सव हरे कृष्णा हरे राम में बेस्ट परफॉर्मर बणिजण जो मानु हासिल कियो। ज़ी नेटवर्क ऐं दूरदर्शन जे संगीत सां जुडियल किन प्रोग्रामन में शामिल थी गिरीश टेलीविजन ते बि नजर अची चुको आहे।

संगीत जी सिखिया सां गडु गिरीश किन साजन जे वजायिण जो बि अभियासु कियो आहे ऐं खेसि वायलिन ऐं तबलो जहिड़ा साज वजायिण में सुठी महारत पिणु हासिल आहे। गिरीश आंधीअ में जोति जगायिण वारा सिंधी ऐं राणो छो न मुरिके जहिड़ा कुझु सिंधी अलबम बि पेश किया आहिन। सिंधी गीत संगीत सां जुडियल इहे अलबम न सिरफ संदस गीत संगीत जे हुनर पर संदस हर सिंफ जा गीत गाये सघण जी सलाहियत जो बि सबूत आहिन। इनहन बिनही अलबम में पहिरियें में रिवायती सिंधी गीत आहिन त बिओ रिमिक्स संगीत वारो आहे।

वकत इहा साबिती डिनी आहे त गिरीश जो आवाज हर हिक किसम जे बोलन ऐं संगीत सां ठहकी बेहतरीन असर पेदा करे थो। हालांकि इहो बि सचु आहे त सूफी गीतन ऐं सिंधी कलाम गायिण वकतु गिरीश जो आवाज कुझु थोरो वधीक पुरुसुकूं ऐं दिलिन खे छुअण वारो महसूस थींदो आहे। गिरीश जी गायिकी जो हिकु बेहद असरदार पहलु आहे सिंधी भाषा जी हकीकी सुरिहां वारा उचार इहा हिक गालिह खेसि हिन समे जे बियन सिंधी गायकन खां बेहतर बणाये थी।

देश विदेश में सिंधी संगीत जा प्रोग्राम करण सां गडु गिरीश [1] Svis International School – Navi Mumbai [2] karma Creative Studio – Park Street Kolkata सां बतोर विजिटिंग फैकल्टी जुडियिल आहे। हुन किन हिंदी सिंधी नाटक जे वासिते संगीतकार तोर बि कमु कियो आहे। खेसि सिंधी संगत पारां टिन सालन जी म्यूजिक स्कालरशिप मिली हुयी। भारत जा अगूणा वाईस प्रेसीडेंट सुरगवासी भैरोंसिंह शेखवात यंग म्यूजिक टैलेंट तोर गिरीश जो सतिकार करे चुका आहिन।