देवनागिरी लिपी वक़त जी ज़रूरत

हिनन हालतुन में जे असां विचार कयूं त सिंधी भाषा खे बचायिण लाय असां वटि देवनागिरी लिपी कबूल करण खां सिवाय बियो को रस्तो न आहे छो जो
[1] सिंधी जी अरबी लिपिअ जो मोहु छडे सिर्फ देवनागिरी लिपिअ जे वापर ते ज़ोर डियण छो जो सिंधी स्कूल बंद थियण सबब इहो सवलो आहे त सिंधी नवजवानन तोड़े भारत में जन्म वरतल पर अरबी लिपी सिखियल सिंधी बुजुर्गन खे इहा लिपी सवलायी सां सेखारे सघिजेथी।
[2] देवनागिरी लिपी कबूल करण जो वडो फायदो इहो आहे जो न त इन्हन अरबी लिपी न अचण वारी हाणोकी सिंधी कौम खे ऐं न ई अचण वारिन नसलुन खे हिक अलग लिपी सिखण जी ज़रूरत न पवंदी।
[3] भारत जे जिन राज्यन में सिंधी वड़े अंदाज़ में रहन था उन्हन राज्यन जी मकानी भाषा तोड़े भारत जी राष्ट्रीय भाषा हिंदी देवनागिरी में लिखी वेंदी आहे तहिंकरे सिंधी बारन खे सिर्फ सिंधी उचार सेखारिण जी ज़रूरत पवंदी लिखण वास्ते देवनागिरी लिपी त हू स्कूलन में सिखियल हूंदा।
[4] देवनागिरी लिपिअ जी मुख़ालफ़त करण वारन जो हिकु वड़ो ऐतिराज़ आहे त सिंधी जे, से सवाब, सीन सानु, साद संदूक या खे खट, खाय खच्चर या वरी जीम जतु, ज़े ज़ंज़ीर, जुवे ज़ालिम जहिड़न उचारन वास्ते देवनागिरी लिपिअ में अलग अलग अल्फाबेट न आहिन जहिं करे इहा सिंधी भाषा जो सतियानासु थी करे।
बियन केतिरिन भाषाउन में बेशुमार अहिड़ा अखर आहिन जेके लिखिया हिक नमूने ऐं पढिया बिये नमूने वेन्दा आहिन पर उन भाषा जा माणुहू का तकलीफ महसूस न कंदा आहिन। हिते मां चवण इहो बि थो चाहियां त इहा ज़हनी हालत उन मरीज़ खां जुदा कोन आहे जहिं खे डॉक्टर चवे थो त तुहिंजे पेर जे आँगूठे में ज़हिरीलो असर पैदा थी वियो आहे जे तुहिंजो आँगूठो न कटिबो त ज़हर जे सजे सरीर में फैलिजी वञण जो खतरो आहे जहिंजे नतीज़े तोर तुहिंजी मौत थियण बि मुमकिन आहे पर मरीज़ आँगूठो सिर्फ इन करे कटायिण लाय तैयार न थो थिये छो जो इन सबब संदस पेर बदशिकिल थी पवंदो।
हाणे इहो त भारत जे सिंधी समाज खे फेसिलो करणो आहे त कौम जो वज़ूद कायम रखण लाय छा ज़रूरी आहे? देवनागिरी लिपी कबूल करे सिंधी भाषा जो वज़ूद कायम रखण या अरबी लिपिअ जे मोह में सिंधी भाषा खे खतम करे सिंधी कौम जी सुञाणप [Identity] विंञाये छड़िण?