सिंधियत जो संकट

दरअसल में डिसजे त “1947 में थियल देश जे विरहांङें सिंधी कौम खे बेफिकरी वारी हालत मां कढ़ी ज़फ़ाकशी जे दौर में दाखिल थियण लाय मज़बूर करे छडियो।” असां जे डिसूं त वक़त जे इन दौर खां पोय ई सिंधियत जे ख़ातिमे जे सिलसिले जे निरख में तमाम वधीक तेज़ी आयी आहे। हकीकत में इन दौर सिंधी कौम में नवन अगुवानन जे उसरण जो दौर शुरू कियो।
इहे नवां अगुवान समाज जी कुदरती सामाजिक हलचलुन सबब पैदा थियण जे बदिरां बियन सबबन करे कौम जा अगुवान बणिजी पिया।
इहो बि इन दौर जो असर आहे जो सिंधी समाज में सामाजिक सुधार जी क़ाबिलियत ऐं ज़ज़्बे जी जगह सामाजिक संस्थाउन में पेसे वारन खे अहमियत ऐं ओहदा मिलण जी शुरुआत थी।
जीयं त सिंधी कौम जा इहे नवां अगुवान सामाजिक हलचलुन जी सख्त मेहनत ऐं सामाजिक सुधार जे ज़ज़्बे जी तपस्या करण खां सिवाय बियन सबबन करे कौम जे अगुवान जो दरिजो हासिल करण में कामियाब थिया सो कुदरती तोर उन्हन जे लाय सिंधियत न पर उहे सबब वधीक अहमियत वारा बणिया जिन जे सबब उहे अगुवान बणिया।
हिते मां इंसानी इतिहास जे पुरातन इतिहास मां हिक मिसाल खे शामिल करण चाहीन्दुम। देवलोक जे राजा इंद्र खे सभनी देवताउन में सभ खां वधीक सुख सुविधाउं मयसर हुयूं पर पो बि इंद्र सभ खां सुखी कोन हो छो जो हुन जे मन में सदायीं इहो भउ रहंदो हो त किथे हीउ सभु कुछ मुखां खसजी न वञे। इतिहास गवाह आहे त जडिहिं बि कहिं तपस्या जी शुरुआत कयी इहो इंद्र हूंदो जो सभ खां पहिरियूं ड्रप विचां तपस्या भंग करण जी कोशिश कंदो हो।
सिंधी कौम जी बदकिसिमती सां नवां अगुवान इंद्र साबित थिया जिन पाण खे हासिल सामाजिक सुखन खे महफूज़ रखण जी हर मुमकिन कोशिश कयी ऐतिरो ई न पर पहिंजी इन कोशिश में उन्हन बियन खे पासीरो करण या उन्हन जे कमन में मीन मेख कढ़ी गैर ज़रूरी साबित करण जो को मोको बि न विञायो। नतीजो इहो निकतो जो न सिर्फ सिंधी समाज खे तरकी जी राह ते अगते वधायिण वारा अगुवान पासीरा थियण लगा पर समाज जी हलत में, सामाजिक जीवन में उहे गालिहियूं शामिल थियण लगियूं जिन सिंधियत जे विरसे खे कायम रखण जी जगह ते उन जे नास थियण जे अमल में तेज़ी आन्दी।
हकीकत में जे डिसजे त सिर्फ उहे इंसानी समाज पहिंजो सामाजिक, सियासी ऐं सांस्कृतिक विरसो कायम रखण में कायम थींदा आया आहिन जिन जा अगुवान विष्णू जहिड़ी हलत हलन था। विष्णु न सिर्फ सामाजिक हलत जा नियम ठाहे थो पर माणुहुन खे उन्हन नियमन मूजिब ज़िंदगी गुजारिण जा फायदा बि कामियाबी सां समिझाये थो। समाज जे माणुहुन में इहो विशवासु बि पैदा करे थो त विष्णु जे वज़ूद जो मतलब आहे सलामती चाहे उहा जिसमानी हुजे या सामाजिक या वरी रूहानी।