झूलेलाल साहिबन जा नाला
सिंधी आराधिय देव - झूलेलाल साहिबन जा नाला
हिंदुन में इहा आम रिवायत आहे त हर हिक अवतार खे केतिरिन ई नालन सां यादि कयो वेंदो आहे। इहे नाला अवतार जे कहिं गुण या कहिंजो उधारु कंदे कयल कम सबब वज़ूद में आयल हूंदा आहिन। सिंधी बुनियादी तोर हिन्दू धरम में विशवासु रखण वारा अयं हिन्दू रीती रिवाजन मूजिब जिंदगी गुजारिण वारा लेखिया वेंदा आहिन। अहिडी हालत में जेकडहिं सिंधी आराधिय देव झूलेलाल जा अलग अलग नाला आहिन त इहा अजब जी गालिह न आहे।
केतिरा सिंधी त इन गालिह ते पिणु विशवासु कनि था त केतिरिन बियन हिन्दू देवी देवताउन वांगुर झूलेलाल साहिबन जा पिणु 108 नाला आहिन। इहो बिलकुल मुमकिन आहे। सोशल मीडिया ते सिंधी आराधिय देव झूलेलाल साहिबन जे 108 नालन जी जेका लिसट तवहां खे नजर आयी हुजे या अची वञें। इहा हकीकत आहे बिये सिंधी इतिहास वांगुर इनहन नालन बाबत के पुखिता ऐतिहासिक सबूत मोजूद कोन आहिन। जिन आम नालन सां झूलेलाल साहिब खे बाडायो वेंदो आहे – यादि कबो आहे से लेख जी पछाडीअ में डिनल आहिन।
झूलेलाल जनम साखी -02
आकाशवाणी मूजिब सिंधी महीने चेट (चैत्र ) महीने जी बीज तिथि [विक्रम संवत 1007 अंग्रेजी साल 950] ते नसरपुर में देवकी अयं रतनचंद लोहाणा जे घर हिक बालक जनम वरतो जंहिं जो नालो उदयचंद रखियो वियो। अगिते हली इहो डींहुं चेटी चंड जे रूप में मलिहायिण जो रिवाज शुरू थियो। हिंदी बोलीअ में उदय जो मतलब थिंदो आहे उभरण अयं अखर चंद , चंड लाय कमि अचण वारो अखर आहे। मतलब त उदयचंद जी अलफाजी माइना – अखरी अरथु थियो उभरंदड चंडु । वकतु पुजाणे हिन बालक उदयचंद हिंदु सिंधिन जो मिरक शाह जे जुलमन खां पूरी तरह सां बचाउ कियो। जीयं उभरंदड चंड जे सामहूं रात जी कारहि खे पहिंजो वजूद कायम रखण मुमकिन न थींदो आहे तहिडी तरह बालक उदयचंद जी मोजूदगीअ सबब मिरक शाह लाय हिंदुन ते जुलमु करण नामुमकिन थी पयो।
बालक जे जनम खां वठी अजब में विझण वारियूं गालिहियूं थियण लगियूं। माउ पीयु डिठो त बारु जडिहिं वातु खोले थो त संदस वात में सिंधु नदी नजर अचे थी। सिंधु नदीअ जे पाणीअ जे वहकरे में हिकु बुजरुग पले [हिक किस्म जी मच्छी ] ते सवार आहे। हिन नजारे सबब झूलेलाल साहिब खे पले वारो पिण कोठियो वेंदो आहे।
सिंध जे रहवासियीन जो विशवासु हुओ त हीउ बालक संदन उधारु करण लाय जनम वठी आयियल अवतार आहे जहिं सबब उहो जनम मरण खां छुटियल मतलब अमर आहे इनकरे बालक जो नालो अमरलाल करे पिण मशहूर थी वियो।
हिन बालक जो पींघो (झूलो ) सदायीं अजखुद लुडंदो पियो हुओ जहिं करे माता देवकीअ बालक खे झूलण नाले सां सडु करण शुरू कियो वक़्त पुजाणे इहो झूलण बदिलिजी झूलेलाल थी वियो।
मिरक शाह सां मुलाकात लाय वेंदे वकत साईं झूलेलाल साहिब घोड़े ते चढिही विया हुआ इनकरे शिरधालू भगत झूलेलाल साईं खे घोड़ेवारो नाले सां पिणु पुकारींदा आहिन।
झूलेलाल मंदिर में सदायीं जोति जलंदी रहंदी आहे तहिं करे झूलेलाल साईं खे जोतिन वारो पिणु सडिबो आहे। आमु तोर ते मंदिरन में या बहिराणो साहिब कढ़ण वकत आयोलाल झूलेलाल जो नारो लगायो वेंदो आहे।
सिंधियन जे भगवान लाल साईं जा सत सभ खां वधीक मशहूर नाला आहिन
उडेरोलाल – पले वारो – अमरलाल – झूलण – घोड़े वारो – जोतिन वारो – बहिराणे वारो