देवी महालक्ष्मी
सिंधियिन जा धार्मिक विशवास - श्री महालक्ष्मी - कोल्हापुर - अम्बाई
कोल्हापुर हिकु ऐतिहासिक शहर आहे जहिं खे पुराणे समे में डखन काशी बि चयो वेंदो हो। इन मां ज़ाहिर आहे त कोल्हापुर धार्मिक लिहाज़ खां बि अहमियत वारो शहर आहे। कोल्हापुर श्री महालक्ष्मी या करवीर निवासिनी अम्बाई देवी जो रिहायशी स्थान – घरु आहे। महाराष्ट्र में जेके साढ़ा ट्रे शक्ति पीठ आहिन श्री महालक्ष्मी मंदिर कोल्हापुर उन्हन में शामिल आहे।
इतिहास मुजीब महाराष्ट्र जी हाणोकी कोकण एराजीअ जो राजा करणदेव जडहिं पहिंजो [अटकल 1800 साल अगु ]राजु छड़े कोल्हापुर आयो त खेस जंगली वणन सां ढकियिल हिक नंढो देवी मंदिर नज़र आयो हिन उन्हन जंगली वणन खे कटाये मंदिर तायीं वञण जो रस्तो तैयार कराइयों सो श्री महालक्ष्मी जे इन मंदिर जे वजूद बाबत सभनी खे खबर पयी। मंदिर में मौजूद श्री महालक्ष्मी जी मूर्ती हीरे जी कण समायिल कीमती पथर जी ठहियिल आहे जहिंजो वजन अटकल चालीह किलो आहे।
श्री महालक्ष्मी मंदिर कोल्हापुर जे मंडप [अंगण] में मुख्य मंदिर जे चोगिरद बिया 35 नंढा नंढा मंदिर आहिन। मंदिर जो मंडप नवरात्री ऐं बियन उत्सव जलसन वक़त कम अीन्दो आहे। कोल्हापुर शहर जे इतिहास ऐं श्री महालक्ष्मी मंदिर जी वधिक जाण वास्ते हिते क्लिक कियो।
नित नेम - रोजानो आरती
श्री महालक्ष्मी मंदिर में रोज़ पंज भेरा आरती थींदी आहे जहिंजी शुरुआत
प्रभात जो ४:३० बजे – जहिं वक़त मंदिर जो दरु खोलिजे थो तहिं वक़त –“काकड़ आरती” ऐं “पद पूजा ” [जहिं में देवीअ जा पैर खीर सां धोता वेन्दा आहिन] कयी वेन्दी आहे। इन वक़त मंदिर जा कुछ पुजारी प्रातः कालीन सिलोकन [सुबुह जी प्रार्थना जा मंत्र ] जो उच्चार कन्दा आहिन।
सुबह जो ८:३० बजे “महा पूजा ” ऐं उन खां पोय “मंगल आरती “ थींदी आहे। इन वक़त मंदिर में मौजूद श्रद्धालुन में देवी जी कृपा तौर पंजामृत [गीह, माखी, खंडु, दही ऐं खीर मां ठहियिल ] विरहायो वेन्दो आहे।
रोज़ ११:३० बजे थींदड आरती वक़त श्रद्धालु देवी खे कुमकुम अर्पण कन्दा आहिन। हीउ आरती सभ खां वधीक वक़्त अटकल ब किलाक हलन्दी आहे।
शाम जो ७:३० बजे भोग आरती थींदी आहे इन वक़त श्रद्धालु देवी खे तरह तरह जो नैवेद्य अर्पण कन्दा आहिन। रवाजी तौर हिन आरती वक़त देवी जी मूर्तीअ खे सोन चांदी जे जेवरन सां सीँगारियो वेन्दो आहे।
रात जो १० :०० बजे सेज आरती थींदी आहे। उन खां पोय मुख्य मंदिर जो दरवाजों बंद कियो वेन्दो आहे जेको वरी बिये डींहु सुबह जो ४:३० बजे काकड़ आरती वक़त खोलियो वेन्दो आहे।
त्रिम्बोली यात्रा , रथोत्सव, किरणोत्सव, गोकुल अष्टमी, नवरात्रा ऐं बियन खास मोकन ते खास प्रार्थना आरती कयी वेन्दी आहे। इहा पिण रिवायत आहे त कोल्हापुर जे छत्रपती [राज घराणो ] ऐं शंकराचार्य जे मंदिर अचण ते बि खास पूजा आरती कयी वेन्दी आहे।
श्री महालक्ष्मी कोल्हापुर - नवरात्रा ऐं किरणोत्सव
नवरात्रा
घटस्थापना खां खण्डे नवमी [दशहरे] तायीं हलन्दड हीउ श्री महालक्ष्मी मंदिर जो हिकु खास सालानो उत्सव आहे जहिं वास्ते दुनिया जी हर कुन्ड मां श्रद्धालु हर साल कोल्हापुर अीन्दा आहिन। हिन उत्सव जी हिक खास गालिह इहा बि आहे जो नवरात्रा में रोज़ देवीअ जी मूर्ती खे हिक नयें रूप में सींगारियो वेन्दो आहे।
शाम या रात जे वक़त वास्ते सजे मंदिर खे तरह तरह जी रोशनी सां सजायो वेन्दो आहे। रोज़ “पालकी प्रदक्षिणा ” मतलब पालकी में सवार देवी जो मंदिर जे चोगिरद चकर हणण। इन जुलुस में कोल्हापुर तोड़े बियन शहरन मां आयल हजारें श्रद्धालु शामिल थींदा आहिन ऐं कोल्हापुर जे रिवायती संगीत जो लुत्फ़ माणीन्दा आहिन।
किरणोत्सव
श्री महालक्ष्मी मंदिर कोल्हापुर में आम तौर नज़र न अीन्दड हिकु कुदरती वाकियो साल में ब भेरा थिंदो नज़र अीन्दो आहे जहिं खे किरणोत्सव चयबो आहे। श्री महालक्ष्मी मंदिर अहिडे नमूने थहियिल आहे जो साल में ब भेरा सिज जा तिरविरा सिधो देवीअ जी मूर्तीअ ते पवन्दा आहिन ऐं मुर्ती अलौकिक रोशनीअ सां चमकी पवन्दी आहे।
हिंदु पंचांग मुजीब किरणोत्सव कार्तिक महीने जी 18 तारीख ऐं मांघ महीने जी 11 तारीख खां शुरू थी ट्रिन डीहंन तायीं हलन्दो आहे। पहिरियें डींहु सिज जा तिरविरा देवी जे चरणन खे छुअंदा आहिन बिये डींहु सीने तायीं पहुचन्दा आहिन त आखिरी डीहं ते सजी मूर्तीअ ते पवन्दा आहिन। हिन कुदरती नज़ारे खे डिसण वास्ते परे परे खां श्रद्धालु इन्हन तारिखुन ते कोल्हापुर अीन्दा आहिन। इन्हन डीहंन ते शाम जे वक़त मंदिर जूं सभ अन्दिरियुं लाइट्स बंद रखियूं वेंदयूं आहिन जीयँ इहो नज़रो चिटो नज़र अचे। वेझडायी में कोल्हापुर शहर में ठहियिल उचियूं इमारतुन कहिं वक़त सिज जे तिरविरन जे रस्ते में रूकावट अचण सबब किरणोत्सव पूरो न बि थींदो आहे।