महालक्ष्मी जा सगिडा
महालक्ष्मी - सिराधन जे विच वारो सिंधी डिणु
हीउ सिंधी डिण हिकु निरालो ऐं अहमियत वारो डिण आहे जेको महालक्ष्मी देवीअ खे अर्पण कियिल आहे। महालक्ष्मी देवीअ खे धन दौलत जी देवी लिखियो वेन्दो आहे। महालक्ष्मी जा सगिडा सिराधन जे दौरान मलिहाया वेन्दा आहिन। सिराध मतलब बिन हफ्तन जे वक़त जो उहो अरसो जहिं में असां पहिंजन स्वर्गवासी वढन खे श्रद्धांजली डीन्दा आहियूं। हकीकत में महालक्ष्मी जे सगडन जी शुरुआत सिराध शुरू थियण खां अगु हथ जी करायीअ ते कच्चे धागे मां ठहियिल ऐं सोरिहां गंढियूँ डिनिल सगडो बंधण सां थींदी आहे पर जीयँ त सगडो अठें सिराध ते छोडिबो आहे तहिं करे हिन डिण खे सिराधन जे विच में मलिहायो वेन्दड सिंधी डिण लेखियो वेन्दो आहे।
सगिडे में सोरिहां तंदुन जो हुजण निशानी आहे इन डिण जे सोरिहां तिथिन वारो (सोरिहां डीन्ह ज़रुरी न नाहे छो जो कहिं तिथि जे क्षय थियण सबब कहिं वक़त हिक डीन्ह ते – आह (सिराधन जी शुरुआत) ऐं पहिरियों सिराधु हिक ई डीन्ह ते हुजण हिकु मिसाल आहे – या सिराधन में का तिथि खाली अचण – ब तिथियूं बि थी सघन थियूं।जाईफां जे जीवन में सोरिहां सींगार वडी अहमियत रखन ऐं इहे सोरिहां सींगार हिक औरत जे जीवन सां जुडियिल (गंढियल|) रहन था सगिडे जूं सोरिहां गंढियूं इन गालिह जी निशानी आहिन।
सगिडा छोड़िणिणु
महालक्ष्मी जे सगडे आखिरी डीन्ह ते मतलब अठें सिराध ते मंदिरन में महालक्ष्मी देवी जी खास पूजा रखी वेन्दी आहे। घर जूं औरतूं हर हिक सगडे खे चैईन पुरियिन ते वेडिहे ऐं हर हिक सगडे वास्ते ब सोरियूं [सोरहन कुण्डन वारी टिकी ] ऐं ब तितर [ चैईन कुण्डन वारो ] ठाहे खणी मंदिर अची महालक्ष्मी देवी जी पूजा कन्दियूं आहिन। पूजा खां पोय घर जो हर भाती पहिंजे पहिंजे हिसे जो सोरी तितर खाईन्दो आहे। धियान डियण जोग गालिह आहे त हिक सगडो जिन बिन तन्दुन जो ठहियल हूंदो आहे तिन मां हिक जाल वास्ते त बी मुडस वास्ते हूंदे आहे मतलब जाल मुडुस अलग अलग सगिडो न पर हिक ई सगिडो अधु अधु करे बधन्दा आहिन।
महालक्ष्मी सगिडा - जुडियल सिंधी खाधो
महालक्ष्मी जे सगडन जो बार ऐं बुढा सिक सां इन्तिज़ार कन्दा आहिन छो जो निज सिंधी खाधो सतिपुड़ा हिन सिंधी डिण सां जुडियिल आहिन। खीर में पियिल सतिपुड़ा हिक मज़ेदार ऐं लज़ीज़ खाधे जो पदारथु आहे।