थधिडी
सिंधी डिण [फेस्टिवल] - सावण जा डिण - सीतला माता
सिंधी डिण [फेस्टिवल ] ऐं हिंदु त्यौहारन में जे काफी हिक जहिडायी नज़र अचे थी। इहा अज़ब जी गालिह न आहे छो जो पहिरियूं त सिंधी बि हिंदु आहिन ऐं बियो त सिंधियिन ऐं बियन केतिरिन हिंदु कौमुन जी धार्मिक तोड़े सामाजिक बुनियाद या वधीक सही अखरन में वजूद जी शुरुआत आहे इंडस वैली सिविलाइज़ेशन। हिन्दु पंचांग या सिंधी टिपणे में सावण जे महीने खे पवित्र ऐं धर्माऊ लेखियो वेन्दो आहे। केतिरा सिंधी डिण इन महीने में मलिहाया वेन्दा आहिन जिन खे सावण जा डिण बि चयबो आहे।
सिंधी डिण थधिडी बि हिकु सावण जो डिणु आहे। हकीकत में थदड़ी सीतला माता जी पूजा जो डीहुं आहे। थधिडी जी अहमियत इहा आहे जो इन डीहं ते सीतला माता जी पूजा करे शख़्सी तौर क्रोध जी बाहि खां बचण जो वर घुरण आहे। इहो पिण विशवास आहे त सीतला माता जी पूजा करण सां पहिंजे घर खे बियन जी रीस ऐं हूस जी बाहि खां बचाये सघजे थो।
थधिड़ी जी वैज्ञानिक सिखिया
थधिडी हिकु वैज्ञानिक सन्देश बि डिये थी। उहो खाधे खे महफूज़ रखण बाबत आहे। रिवायत मुजीब थधिडी ते थधो मतलब हिकु डींहु अगु तैयार कियिल खाधो खाइबो आहे। इन जो इहो मतलब आहे त इहो खाधो अहिडे नमूने तैयार कियो वेन्दो आहे जीयं बिये डींह तायीं ख़राब न थिये।
इन जो इहो मतलब पिणु आहे त खाधो महफूज़ करण जंहि खे हाणे जी ज़िंदगी में काफी अहमियत मिली रही आहे ऐं अगु तैयार कयल खाधो जेको मॉडर्न लाइफ में स्टेटस सिंबल बणिजण जी राह ते तेज़ी सां तरकी करे रहियो आहे उन्हन बाबत सिंधी कौम खे सदियूं अगु खां न सिर्फ जाण हुयी पर सिंधी कौम इन्हन जो पहिंजे रोजाने जीवन में उपयोग पिणु कंदी हुयी।
थधिड़ी सिंधी खाधो
थधिडी सां लागापो रखन्दड रिवायती सिंधी खाधो आहे मिठियूं ऐं चहिरियूं कोकियुं जेके दही ऐं खटाण सां खाधियूं वेन्दियूं आहिन। मिठियूं कोकियूं कणक जे अट्टे ऐं खंडु मां त चहिरियूं कोकियूं पीठल चणन जी दाल, सवा मिर्च ऐं लूण मां ठाहियूं वेन्दियूं आहिन। अजुकल केतिरा सिंधी कुटुंब थधिड़ी खां अगु वारी रात जो पुलाव, दही वडा ऐं बियुं कुछ भाजियूं बि ठाहे रखन था ऐं थधिडी जे डींहु खायिन था।