सावण जा डिण
सावण जा डिण - सिंधी डिण त्योहार
सिंधी टिपणे में इहो पदु सावण जा डिण वेझिड़ायी मतलब पोयिन कुझु सदियिन खां शामिल थियल पदु आहे। सावण उहो महीनो आहे जेको सिंधी टिपणे तोड़े हिंदू पंचांग मूजिब धार्मिक कमन वासिते साल जे शुभ लेखियो वेन्दड चैयन महीनन मां हिकु आहे। धार्मिक कमन वासिते शुभ हुजण करे इन्हन चैयन महीनन मां हर हिक खे धर्माउ महीनो चयो वेन्दो आहे।
इहो धियान डियण जोगि आहे त हर ट्रिन सालन खां पोय साल में जोड़ियो वञण वारो वधीक महीनो जहिं खे पिणु धर्माउ महीनो बि चइजे थो उहो इन्हन चैयन धार्मिक कमन वासिते शुभ लेखियो वेन्दड कती, मांघ, वैसाख ऐं सावण में शामिल हुजे इहो ज़रूरी न आहे। हर ट्रिन सालन खां पोय साल में तेरिहें महीने तोर जोड़िये वेन्दड इन वधीक महीने जो नालो कथ मूजिब उन वक़त शुरू महीने जे नाले जे आधार ते हूंदो आहे। मतलब हर ट्रिन सालन खां पोय साल या हर चोथें साल सिंधी टिपणे में को न को महीनो ब भेरा हूंदो आहे।
सावण जा विरत ऐं सिंधी त्योहार
सिंधियिन तोड़े हिंदुन में विरतन जी वडी महिमा आहे सूमर जो विरत हिकु वडी अहमियत रखण वारो लेखियो वेन्दो आहे। सावण जो महीनो धार्मिक कमन जे लिहाज खां खां साल जे चैयन शुभ महीनन में शामिल हुजण सबब सावण सूमर खे वधीक अहमियत वारो लेखियो वेन्दो आहे। इन खां सिवाय बिया कुझु विरत जीयं त टीजड़ी, श्रीकृष्ण जन्माष्टमी बि सावण जे महीने में अचन था तहिं करे सावण खे विरतन जो महीनो बि चयो वेन्दो आहे। सूमर शिव भगवान जो डींहुं आहे ऐं पहिंजी कामना (इच्छा) पूरी थियण जी मुराद सां भोले भंडारी जो जेको 16 सूमरन जो विरत रखियो वेन्दो आहे उन जी शुरुआत बि सावण जे पहिरियें सूमर सां थींदी आहे।
हालांकि सिंधी समाज में आराधिय देवता भगवान झूलेलाल जे अवतार सां जुडियिल बिन सिंधी त्योहारन चेट्री चंड्र ऐं चालीहे मां चालीहो पूरा 40 डीन्ह हलण वारो विरत आहे, धार्मिक लिहाज खां शुभ लेखिये वेन्दड कती महीने में नवमी जा विरत रखिया वेन्दा आहिन। सिंधी सोनारा तोड़े बिया केतिरा सिंधी साल में बी भेरा नवरात्रा जा विरत बि रखन था तहिं हूंदे बि सावण खे विरतन जो महीनो चयो वेन्दो आहे।
सिंधी समाज डिणन / त्योहारन खे खास नमूने मलिहायिण वासिते मशहूर आहे इन नमूने में न सिरफ गीत संगीत या लोक कलाऊँ शामिल आहिन पर किन खासि रिवायतुन सां हर सिंधी त्योहार सां हिकु या वधीक निजु सिंधी खाधे जा ताम (Traditional Sindhi Recipes) बि जुडियल थिये थो। मिसाल तोर सावण जे डिणन मां थधडी सां मिठियूं ऐं चहिरियूं कोकियूं (कुझु लोला बि चवन था) डही ऐं खटाण जुडियल आहिन त टीजड़ी सां असुर करण ऐं अरगु डियण जुडियल आहे।
सावण महीने में मलिहाये वेन्दड सिंधी डिणन मां जेकडहिं सूमर जे विरत जो लागापो शिव भगवान सां आहे त जन्माष्टमी भगवान श्रीकृष्ण जो जन्म डींहुं आहे। टीजड़ी जे सुहागिणिन जो त्योहार आहे त थधडी सीतला माता जी पूजा जो डींहुं आहे। अजु जेको प्री कुकुड़ फुड खायिण लाइफ स्टाइल जी निशानी बणिजी वयो आहे तहिं खाधे जी बुनियाद सिंधी डिण थधडी केतिरियूं ई सदियूं अगु विझी छड़ी हुयी।
केतिरिन जो चवण आहे त सावण जो डिणु राखी या रक्षा बंधन जेको नारियल पूर्णिमा तोर बि मलिहायो वञे थो सो सिंधी डिणु न आहे पर असां खे इहो धियान में रखण घुरिजे त इंसान समाज में रहे थो ऐं समाज जे हिक हिसे जो बिये हिसे ते असर पवण कुदरती गालिह आहे तहिं खां राखी भाउ ऐं भेण जो त्योहार आहे तहिं करे बि इहो ऐतिराज़ खणणु गैर ज़रूरी ऐं गैर वाजिबी आहे।