टीजड़ी करवा चौथ
टीजड़ी -सुहागिणिन जो डिणु - बाबत
सिंधी डिण [फेस्टिवल] – सावण जा डिण – करवा चौथ
सिंधी डिणु टीजड़ी बरसातुन जी मुंद में मलिहायो वेन्दड धर्मिक महीने सावण जो डिण आहे। हकीकत में डिसजे त टीजड़ी हिकु विरतु आहे जेको जाल पहिंजे मुडस जी वडी उमर अं खुशहाली वास्ते रखन्दी आहे। तंहिं करे टीजड़ी खे सुहागिणिन जो डिणु बि चइजे थो।
सिंधी डिण टीजड़ी सां “असुर” – प्रभात वेले खादो खायिण – ऐं “मेहंदी” जो गहरो ऐं अहमियत वारो लागापो आहे। हिन्दु त्यौहार “करवा चौथ ” – नवजवान सिंधी तबके हिंदी फ़िल्मुन में हिन त्यौहार खे डिठो हूंदो – ऐं सिंधी डिण टीजड़ी में मलहायिण जे तरीके ऐं मकसद में काफी हिक जहिडायूं नज़र अचन पयूं सिवाय हिक मुख्य फरक जे। सिंधी डिणु टीजड़ी सावण में मलिहायो वेन्दो आहे त करवा चौथ हिन्दु महीने कार्तिक जे चंड्र खां पोय चौथे डीहं ते।
टीजड़ी - मलिहायिण
सिंधी डिणु टीजड़ी मलिहायिण जी शुरुआत प्रभात वेले खाधो खायिण “असुर” सां थींदी आहे। असुर करण खां पोय मेहंदी जी कलाकारी जो कमु शुरू थींदो आहे। अजुकल जे समे में मेहन्दी लगायिण जो कमु विरत वारे डीहं खां अगु वारी रात जो कियो वेन्दो आहे छो जो लाइफ स्टाइल में आयल बदिलाव सबब असुर जो वक़त प्रभात वेले मां बदिलजी सिज उभरण खां अगु थी वियो आहे। टीजड़ी जे विरत जो अरसो सिज जे उभिरण खां वठी चंड्र जे उभिरण तायीं थींदो आहे।
सजे डीहं जे विरत खां पोय चंड खे “अरगु ” ( खीर चांवर ऐं खंड्रु ) डिनो वेन्दो आहे। अरगु डियण खां अगु टीजड़ी जी कथा ज़रूरी आहे जेका आम तौर मंदिर में थिंदी आहे। करवा चौथ में चंड्र खे अरगु डयी चंड्र डिसण खां हिकदम पोय मुडस जो मुहं डिसण जी रसम आहे पर सिंधियिन में टीजड़ी ते अरगु त डिनो वेन्दो आहे पर करवा चौथ वांगुर न त छाणीअ मां चंड्र डिसण जी ऐं न ई यकदम मुडुस जो चेहरो डिसण जी रीत आहे। अरगु डियण खां पोय खाधो खायी विरतु छोडियो वेन्दो आहे।
हाणो के समे में सिंधी डिण टीजड़ी जो लुतुफ वधायिण ऐं नवजवान सिंधी औरतुन जी हुनरमंदी खे इजिहार जो मोको डियण जे मकसद सां केतिरन शहरन में टीजड़ी ते मेहंदी जी कॉम्पिटिशन बि रखी वेन्दी आहे। शाम जे वक़त मंदिर में टीजड़ी जी कथा बुधण वञण खां अगु औरतूं खास सींगार कन्दियूं आहिन।
करवा चौथ जो इतिहास
हिंदु पुराणन मुजीब कहिं समे करवा नाले वारी औरत जेका किन रूहानी ताकतुन जी मालिक हुयी तहिंजे मुडस खे नदीअ में सिनानु कन्दे वाघुन मरण जी हालत में पहुचाये छड़ियों। पहिंजी रूहानी शक्तिअ सां करवा न सिर्फ पंहिंजे मुडस जी हयाती बचायी पर गडोगडु यमराज खे इन्हन वाघुन खे नर्क में मोकिलिण बाबत चयो। पहिरियूं त यमराज इंकार कियो पर पोय करवा जी रूहानी शक्ति याद करे श्राप जे भव विचां राज़ी थियो। इतिहास त इहो बि आहे त महाभारत जे समे द्रोपदीअ बि हीउ विरतु रखियो हो।