सिंधी भाषा - कुछ हकीकतूं
सिंधी भाषा - कुछ हकीकतूं - Introductory
अजु खास करे भारत में सिंधी कौम सामहूं वज़ूद जी कायमी जो संकठ आहे छो जो सिंधी भाषा गालिहायिण वारन जो तादाद सिलसिले वार घटिजंदो पयो वञे। भाषा जो वापर बंद त कौम जो वज़ूद खतम इहा गालिह सिज जी रोशनी वांगुर साफु ऐं सही आहे।
इन गालिह ते केतिरा ई विचार पेश थी चुका आहिन त सिंधी भाषा जे वापर घटिजण जा सबब कहिड़ा आहिन सो इन गालिह खे पासीरो रखी मां सिंधी भाषा बाबत कुछ हक़ीकतुन सां सभनी जी वाक़फ़ियत करायिण थो चाहियां।
इयें नाहे त असां खे इन्हन हक़ीकतुन जी जाण न आहे पर जीयं त इन्हन हक़ीकतुन सां असां जी मुलाकात – हर हिक हकीकत सां अलग अलग ऐं जुदा जुदा माहोल में थी आहे सो शायद असां इन्हन हक़ीकतुन जे गड़ियल असर खां पूरी तरह वाकिफ न थी सघिया आहियूं।
सिंधी भाषा जी शुरुआत - इतिहास History of Sindhi Language
[1] इन गालिह जा सबूत मिलिया आहिन त मोहन जोदड़ो या सिंधु घाटी सभ्यता जे नास थियण जो सबब महाभारत जी लड़ायी जे दौरान गुरु द्रोणाचार्य जे पुट्र अश्व्थामा जो हलायल देवी शस्त्र [अणु बम] हुओ। महाभारत वारे जुग खे पंज हज़ार साल अगु वारो लेखियो वेन्दो आहे छा इन जो मतलब इहो न आहे त सिंधी भाषा जी शुरुआत इन अरसे खां बि अगु थी हूंदी ? पर असां जहिं वक़त सिंधी साहित्य जे इतिहास जी गालिह कयूं था त सचल, सामी , शाह ते अची असां जी गाड़ी रुकिजी पवे थी।
[2] सिंधी भाषा जी अरेबिक लिपी भारत ते अंग्रेजन जी हुकूमत जे दौरान कबूल कयी वयी आहे मतलब इहा डेढ ब सौ सालन खां वधीक पुराणी न आहे ?जेके इहो चवन था त अरबी लिपी सिंधी भाषा जी असली लिपी आहे उन्हन वास्ते मुहिंजो हिकु सुवाल आहे। छा असां इहो त चवण चाहियूं त इन खां अगु [अरबी लिपी जे वापर जी शुरुआत खां अगु] सिंधी भाषा न पर बोली हुयी जहिं जो लिखित रूप [लिपी] वज़ूद में न हुओ ?
[3] मोहन जोदड़ो मां मिलियल सबूत डेखारिन था उन समे बि सिंधी भाषा जो वज़ूद हुओ ऐं पुरातन वैदिक जुग खां वठी सिंधी भाषा वकत जे मुखतलिफ दोरन मां गुजरंदे, तरकी कन्दे कन्दे हाणोके रूप में आयी आहे।
[4] इन गालिह ते ज़रूर विचार थियण घुरिजे त अंग्रेजन जे समे कबूल कियिल लिपी खां अगु सिंधी भाषा जी लिपी कहिडी हुयी ऐं उन समे लिखियिल सिंधी साहित्य जो छा थियो ?
हिते मां मानवारे श्री राम जवाहरानी जन जी चयल हिक गालिह ज़रूर शेयर करण चाहियां थो। जडहिं भारत ते हमला शुरू थिया खास करे अरब ऐं मुगलन जा त इन्हन हमलन जो पहिरियों शिकार सिंध बणी। जीयं त इन्हन हमलन जो हिकु मकसद इस्लाम जो फैलाव बि हुओ सो इन्हन हमलावरन भारत जे ज्ञान विज्ञान जे लिखियिल रूप खे नासु करण ते खास ज़ोर डिनो नतीजे तोर सिंधी अदबी विरसो जो सभ खां वधीक नुकसान थियो।
[5] इहो हिकु ऐतिहासिक सच आहे त मुखालफत हूंदे बि अंग्रेजी सरकार सिंधी भाषा वास्ते अरबी लिपी जी मंज़ूरी डिनी हुयी। हकीकत में इन मंज़ूरी सिंधी भाषा जे विनाश जा बिज पोखिया। हिक खां वधीक लिपिन जे वज़ूद सिंधी भाषा जे असली रूप ते हिक किसम जो सवाली निशान लगाये छडियो जहिंजो असर उन समे त न पर मुलक खे अंग्रेजी हुकूमत खां आज़ादी मिलण – सिंध जे सिंधियन जे भारत लड़े अचण जे बिन ट्रिन डहाकन खां पोय ज़ाहिर थियण शुरू थियो।
भारत में सिंधी भाषा Sindhi Language in India
इहा सिंधी कौम जी लासानी खूबी लेखजण घुरिजे जो दर बदर थियल हालत में – रोज़ी रोटी जे मसले जे सामहूं हून्दे – भारत में अलग अलग भाषाउन वारन शहरन में रहण जी जगह मिलण खां पोय बि असां जे वड़न खे इहो ध्यान हुओ त तैलीम इंसान जी ट्रीयीं अख आहे ऐं तैलीम हासिल करण जो बेहतरीन माध्यम आहे मातृभाषा सो उन्हन डुखियिन हालतुन में सिंधी माध्यम जे स्कूलन जी शुरुआत कयी।
इहो हिकु मिसाल खोड़ आहे उन्हन सभनी वास्ते जेके सिंधी भाषा जे हाणोके घटिजन्दड़ वापर वास्ते वडन खे डोहु डियन था। उन दौर में हिक पासे त असां जा वड़ा सिंधी स्कूलन जी शुरुआत पया कनि त बिये पासे सिंधी अदीबन जो हिकु वड़ो तबको सिंधी भाषा खे भारत जे संविधान जी मंज़ूरी वास्ते हलचल हलाये रहियो हो। हिते इहो ध्यान रखण ज़रूरी आहे त भारत हिकु घण भाषायी मुलक आहे ऐं कहिं बि भाषा जी बहबूदी, वाधारे ऐं फैलाव में सरकारी मदद निहायत अहमियत वारी थिये थी। सरकारी मदद हासिल करण वास्ते इहो ज़रूरी आहे त भाषा देश जे कायदे कानून मूजिब मंज़ूर कियिल हुजे।
सिंधी भाषा खे भारत जे संविधान जी मंज़ूरी त मिली वयी पर इन मंजूरीअ सिंधी भाषा जे विनाश जे अंग्रेजन जे पोखियिल बिजन खे वाधि वास्ते ज़रूरी मुफीद माहोल बि डयी छड़ियो छो जो इन मंज़ूरी में सिंधी भाषा वास्ते अरबी तोड़े देवनागिरी बिन्ही लिपिन जे वापर खे कबूल कियो वियो।
लगभग सउ डेढ सउ सालन खां अरबी लिपि में सिंधी साहित्य जी रचना थी रही हुयी ऐं आम माणुह वास्ते बि सिंधी भाषा लिखण जो मतलब अरबी लिपी कम आणिण हुओ सो नतीजे तोर भारत में सिंधी भाषा जी लिपी बाबत हिक किसम जी ज़ंग शुरू थी वयी। हिक पासे अरबी लिपी जा पैरोकार हुआ या आहिन जेके सिंधी साहित्य जे विरसे जे हवाले सां अरबी लिपी वारी सिंधी खे असली सिंधी पिया चवन त बिये पासे हिकु अहिड़ो तबको आहे जेको सिंधी भाषा जे वैदिक जग जे वज़ूद जो आसरो वठी अंग्रेजन जी मंज़ूर कियिल अरबी लिपी वारी सिंधी भाषा खे गुलामी जी निशानी ऐं देवनागिरी लिपी वारी सिंधी भाषा खे असली ऐं पुरातन साबित करण जी ज़दोजहद में लगो पियो आहे। इन बेनतीजा -न हुनन खटियो आहे न मां हारायो आहे – अंदाज़ वारी ज़ंग जे कुदरती नतीजे तोर सिंधी भाषा मुश्किलातुन जे दौर खे मुहं डयी रही आहे।
भारत में सिंधी भाषा जे खातमे जी शुरुआत
मां हित कहिं खे बि न त डोहारी ठहिरायांइण जी कोशिश थो कियां ऐं न ई कहिं खे बेडोही हुअण जो सर्टिफिकेट डियण जी इच्छा रखां थो। इहो फेसिलो त आम सिंधी माणुहुन ऐं वकत जे हथ में आहे। मुहिंजी कोशिश सिर्फ ऐतिरी आहे त के हकिकतूं जेके आहिन त असां जे सामहूं पर जिन ते असां जो ध्यान न आहे तिन बाबत विचार थिये ऐं सिंधी भाषा जे वाधारे जी का राह निकरे।
[1] इहो सही आहे त भारत लड़े आयल सिंधियन सिंधी माध्यम जा स्कूल खोलिया पर सिंधी भाषा जे इन्हन स्कूलन में सिर्फ अरबी लिपी में सिंधी भाषा सेखारिण जे ज़िद सिंधी भाषा जो वापर घटायिण में बि मदद कयी। मज़े जी गालिह इहा बि आहे त इन्हन मां घणन स्कूलन जे बानीकारन सिंधी माध्यम सां गडु अंग्रेजी माध्यम में सेखारिण जी सहूलियत त शुरू कयी पर सिंधी देवनागिरी खां परे रहण पसंद कियो। हिन वक़त असां जेके अंग्रेजी माध्यम जा वड़ा वड़ा स्कूल डिसूं पिया तिन में चंगो तादाद उन्हन जो आहे जेके सिंधी माध्यम स्कूल खे बंद करे वज़ूद में आया आहिन।
[2] अजु जे डिसजे त अरबी लिपी सां शुरुआत करण वारियूं केतिरियूं सिंधी अखबारुं ऐं रिसाला हिंदी, मराठी, गुजराती,अंग्रेजी या बी मकानी भाषा में शुरू आहिन पर इन्हन बि सिंधी देवनागिरी जे वापर खां परहेज़ कयी आहे।
[3] हिक वड़ी घटितायी जहिं सिंधी भाषा जे वापर खे घटायिण में तमाम अहमियत वारो किरदार अदा कियो आहे सा आहे सिंधी भाषा खे रोज़ी रोटी सां जोडिण में नाकामियाबी। भारत में सिंधी कौम मुख्य तोर धंधे सां जुडियिल आहे हालाँकि के थोरा नौकरी में बि आहिन। असां जा अगुवान सिंधी भाषा खे न धंधे सां ऐं न नौकरी सां जोडिण में कामियाब थिया।
[4] NCPSL, राज्यन जूं सिंधी साहित्य अकादिमियूं तोड़े बियन सिंधी अदबी संस्थाउन में अरबी लिपी वारन जी हुकूमत हलण बि सिंधी भाषा जो वापर घटायिण में हिक किसम सां मददगार साबित थी, छो जो इन्हन संस्थाउन जा बानीकार देवनागिरी में लिखियिल रचनाउन खे सिंधी साहित्य जे रूप में कबूल करण वास्ते तयार न हुआ। हिक पासे अरबी लिपी वारा सिंधी स्कूल बंद थी रहिया हुआ त बिये पासे देवनागिरी जा रचनाकार पाण सां नाइंसाफी जी डाहं पिया कनि। सिंधी भाषा जी हालत ब बि वया त छह बि वया जहिड़ी थी वयी। अरबी लिपी वारी जो वापर त कोन वधियो पर गडोगडु देवनागिरी लिपी जो विकास बि रुकिजी वयो।
[5] भारत में सिंधी माणुहुन जो आर्थिक रूप सां मज़बूत थियण तोड़े सिंधी कौम जो अगुवान थियण ऐं सिंधी भाषा जो वापर घटिजण इहे पूर विछोट लीकुन जे रूप में वाधि पायिण लगा मतलब जे हिक लीक वड़ी थी बी लीक बि वड़ी थी पवे पयी। हिक हालत अहिडी बि आयी जो सिंधी स्कूलन में बार पढ़िहायिण वारन खे आर्थिक रूप सा तरकी न कियिल सिंधियन जी ज़मात में शुमारियो पियो वञे।
[6] सिंधी कौम जे सामाजिक जलसन बि सिंधी भाषा जो वापर घटितायिण में मददगार जो किरदार निभायो आहे छो जो भारत में लोकशाही हुअण ऐं सिंधी कौम जो आदमशुमारी में तमाम तमाम घटि हुअण सबब सियासी ताकत हासिल करण वास्ते सिंधी अगुवानन इन्हन जलसन में मकानी नेताउन खे घुरायिण शुरू कियो। नतीजे तोर इन्हन सिंधी सामाजिक जलसन में गैर सिंधी भाषा जे वापर जी शुरुआत थी। अजु त हालत इहा आहे त सिंधी पंचायत जी मीटिंग में बि गैर सिंधी भाषा जो वापर अज़ब जी गालिह न रहियो आहे।
[7] सिंधी भाषा जो वापर घटायिण में जहिं हिक गालिह ताबूत जे आखिरी कोके जो कम कयो सा आहे हिकु बहानो। बार अंग्रेजी माध्यम स्कूल में पढ़े थो ऐं वधीक पढ़ायी वास्ते बार जो अंग्रेजी ते सुठो ज़ाब्तो हुअण ज़रूरी आहे इन बहाने खे अगते करे सिंधी अगुवानन घर में बि बारन सां सिंधी में न गालिहायिण जी रीत शुरू कयी। समाज अगुवानन पूठियां हले थो सो अजु हालत इहा आहे जो गैर सिंधी भाषा जो वापर करण वारन सिंधी घरन / परिवारन जो तादाद तेज़ी सां वधी रहियो आहे।
छा करण घुरिजे ? Action Plan
कुछ डीन्ह अगु आशा चाँद जन सां इन विषय मतलब भारत में सिंधी भाषा जे भविष्य ते गालिहायिण जे दौरान असां में जिन गालिहिन बाबत हिक किसम जी सहमती बणजन्दी महसूस थी से आहिन
[अ] भारत में सिंधी भाषा जो वापर अरबी लिपी में थियण काफी डुखी गालिह आहे पर सिंधी भषा जे भविष्य वास्ते अरबी लिपी जो वज़ूद में रहण बि ज़रूरी आहे।
[ब] भारत में जे सिंधी भाषा जो वज़ूद कायम रहंदो त सिर्फ देवनागिरी लिपी जे रूप में रहंदो।
[स] सिंधी साहित्य जो लगभग समूरो विरसो अरबी लिपी में आहे। देवनागिरी लिपी जे वापर जो इहो मतलब त बिलकुल न आहे त असां इन शानदार विरसे खां महरूम थियूं।
[द] आशा चाँद जन जो चवण हुओ त एस पी सर जे इहो विरसो कायम रखणो आहे त अहिड़न शख्सन जी ज़रूरत पवंदी जिन खे अरबी तोड़े देवनागिरी लिपी बिन्ही जो सुठो ज्ञान हुजे छो जो बिना इन ज्ञान जे अरबी लिपी जे साहित्य जो देवनागिरी में बदिलायिण मुमकिन न आहे।
[इ] मुहिंजो चवण आहे त जे इन कम वास्ते सुठा पेसा मिलन त केतिरा ई अहिड़ा सिंधी नवजवान सामहूं अची वेन्दा जेके देवनागिरी सां त सुठी वाकफियत रखन था से बि अरबी लिपी सिखण वास्ते बि तयार थी वेन्दा।
लब्बोलुबाब इहो आहे त जे असां खे सिंधी भाषा जो वज़ूद कायम रखणो आहे त इहो ज़रूरी आहे त सिंधी भाषा खे रोज़ी रोटी सां जोडिजे।
सिंधी कौम व्यापारी कौम हूंदे बि सिंधी वापारिन सिंधी भाषा जे वाधारे में को खास या लेखे जोग योगदान न डिनो आहे। शुरुआत में मतलब 1980 तायीं त सिंधी वापारी सिंधी अखबारुन ऐं रिसालन में जाहिरात डियण में अगिरा हुआ पर आहिस्ते आहिस्ते आर्थिक मदद जो इहो दरियाह वहण बंद थींदो वयो नतीजे तोर घटि विकरे ऐं आर्थिक तंगी सबब सिंधी अखबारुं ऐं रिसाला बंद थी वया। असां जी 2006 खां हलन्दड़ सिंधी वेबसाइट द सिंधु वर्ल्ड डॉट कॉम जी तारीफ त हर सिंधी कंदो आहे ऐं केतिरयूं नयूं गालिहियूं शुरू करण जी सलाह डियण में देर न कन्दो आहे पर जे गालिह जाहिरात डयी आर्थिक मदद जी आयी त हर हिक आंगुर बिये जे तरफ इशारो करे थी।
सिंधी भाषा खे भारतीय संविधान जी मंज़ूरी मिलण सबब राष्ट्रीय सिंधी भाषा विकास परिषद [NCPSL] ऐं राज्यन में सिंधी साहित्य अकादिमियूं सरकार जी आर्थिक मदद सां हलन थियूं। डिठो वियो आहे त इन्हन संस्थाउन खे मिलण वारे सरकारी फंड जो वड़ो हिसो सिंधी अदीबन खे इनाम डियण, सिंधी कवी लेखकन जी वर्कशॉप लगायिण में या बियन प्रोग्रामन जे बंदोबस्त में खरचु पियो थिये।
ज़रूरी आहे त इन्हन संस्थाउन में अरबी लिपी जे साहित्य खे देवनागिरी लिपी में बदिलायिण खे तरजीह डिनी वञे। हर हिक संस्था जो सिंधी अदीबन खे इनाम या अवार्ड सां नवाजिण जो प्रोग्राम अलग अलग रखण जी जगह ते सभनी संस्थाउन जो गड़ियल प्रोग्राम वारे वटि सां उन्हन शहरन में रखण घुरिजे जिन जी सिंधी आदमशुमारी 20 – 25 हज़ारन खां वधीक हुजे। प्रोग्राम जे बंदोबस्त जे खर्च जी जवाबदारी उन शहर जी सिंधी पंचायत, शहर जी बियन सिंधी संस्थाउन ऐं वपारिन जी मदद सां संभाले मतलब सरकारी मदद सां हलन्दड़ संस्थाउन ते सिर्फ इनाम या अवार्ड जे खर्च जो बार हुजे। इन सां 2 फायदा आहिन।
[अ] हिकु त साल में हिकु भेरो हुअण सबब ऐं अलग अलग शहरन में हुअण सबब आम सिंधी में इन प्रोग्राम वास्ते जोश पैदा थींदो जेको सिंधी भाषा जे वाधारे में अहमियत वारो किरदार अदा कन्दो।
[ब] प्रोग्राम जे बंदोबस्त ते थियण वारे खर्च जी बचत सबब संस्थाउन वटि सिंधी भाषा जे वाधारे जा कम करण वास्ते वधीक पेसा हूंदा।
इन सिलसिले में हिकु सुझाव बियो बि आहे त हर बिये साल इहो प्रोग्राम उन्हन शहरन में रखियो वञे जिन जी सिंधी आदमशुमारी 50 हज़ारन खां वधीक हुजे। इन्हन शहरन में इहो प्रोग्राम हिक जी जगह ते ट्रिन डीन्हन जो हुजे। वधियिल बिन डीन्हन मां हिक ते युथ फेस्टिवल त बिये डीन्ह ते सिंधी लोक कलाउन जे प्रोग्रामन जो आयोजन थियण घुरिजे।
सिंधियत सुहिणी रहे !
Posted on 04 Sep 2018