Lal Loi

सिंधी डिण [फेस्टीवल] – लाल लोई जो वीडियो – मकर संक्रांत
जडिहिं असां कहिं सिंधी ऐं हिंदु त्यौहार में हिक जहिडायी डिसुं था असां खे कुछ बियो विचार करण खां अगु इहा ऐतहासिक हकीकत याद रखण घुरिजे त सिंधी कौम हिन्दु धर्म जो पालन करण वारिन बेशुमार कौमुन जे मेड जो हिकु भाती आहे तहिं करे इहा हिकजहिडायप कुदरती गालिह आहे।

सियारे जी मुंद में मलिहायो वेन्दड सिंधी डिणु लाल लोई, मकर संक्रांत ऐं पंजाब जे लोहड़ी सां काफी मिलन्दड जुड़न्दड डिण आहे ऐं शायद त मकर संक्रांत जहिडे वढे त्यौहार खां हिकु डींहु अगु मलिहायिजण सबब ऐड़ो मशहूर बि कोन आहे।

सिंध सिंधु नदी जे किनारन ते वसियिल एराजी हुयी सो अजु जे भारत जे पंजाब वांगुर सिंध जो बि आर्थिक शिरस्तो खेती या पोख ते मदार रखन्दड हो इन करे सालाने सिंधी डिण कैलेंडर में तव्हां खे के अहिडा सिंधी डिण मिलन था जिन जो लागापो पोख पोखिण या पोख जे तैयार थियण सां आहे। सिंधी डिण लाल लोई जो लागापो सियारे जी पोख जे तैयार थियण सां आहे। किन बियन जो रायो आहे त लाल लोई जो फ़सुल सां को बि लागापो न आहे इहो सिंधी डिण सियारे जी मुंद जे खत्म थियण जी निशानी तौर मलिहायो वेन्दो आहे।

लाल लोई जे मालिहियाजण जे सबबन में हिकु सबब इहो बि आहे त द्वापुर जुग में बाल कृष्ण खे मारिण वास्ते कंस जेके अलग अलग राक्षस राक्षसियूं मोकलियूं हुयूं उन्हन में हिक लोहिता नाले वारी राक्षसी पिण हुयी, जहिंखे बाल कृष्ण मारे छड़ियो। राक्षसी जे मरण ते गोकुल वासिन जेको उत्सव मालिहायो सो ई अगते हली लाल लोई जो डिणु बणिजी पियो।     

सिंधी डिण लाल लोई जी रात जो होलिका दहन या अंग्रेजन जे कैंप फायर जहिडो नज़ारो डिसण में अीन्दो आहे छो जो बाहि जे चोगिरद फेरा पाईन्दे सिंधी औरतूं पूजा कन्दियूं आहिन। किन हंदन ते औरतूं तोड़े मरद छेज पिण हणन्दा आहिन।