अखण ट्रीज - सिंधी डिण
भागन वारो डींहुं
सिंधी टिपणे या हिंदु पंचांग जे वैशाख महीने जी चांड्रोकिन [शुक्ल पक्ष] जी ट्रियीं तिथि ते मलिहायो वेन्दड सिंधी फेस्टीवल अखण ट्रीज हिकु वडी अहमियत वारो सिंधी डिणु आहे।
संस्कृत में अक्षय जो मतलब थींदो आहे जहिं जो क्षय न थिये मतलब जेको खतम न थिये इन करे बि अखण ट्रीज खे वधीक अहमियत आहे। इहो सही आहे त वेझडियायीय में अखण ट्रीज जहिड़न सिंधी फेस्टीवल्स जे मलिहायिजण जो दायरो काफी वडो थी वियो आहे।
पुराणे ज़माने में अखण ट्रीज शादी शुदा धीउन भेनरुन ऐं ब्राहमण स्वामी खे सुखिड़ियूं डियण तायीं महदूद हूंदो हुओ पर अजोके समे में अखण ट्रीज जो दायरों नवों धंधो शुरू करण, बिना महूरत कढ़ायिण जे हिन डीन्ह ते शादी करण, सोन चांदी, ज़मीन जायदाद ऐं वेन्दे रंधणे जा नवां बरतन खरीद करण तायीं वधी वियो आहे।
हिन्दु विज्ञान मूजिब अखण ट्रीज उहो डींहुं आहे जहिं ते सिजु तोड़े चंड्रू रोशनी जे सभ खां ऊचें मुकाम ते हूंदा आहिन तहिंकरे अखण ट्रीज खे सजे साल जो सभ खां वधीक पवित्र ऐं भागन वारो डींहुं बि लेखियो वेन्दो आहे। शादी वासिते बि अखण ट्रीज उतम डींहुं लेखियो वेंदो आहे छो जो अखण ट्रीज ते शादी करण जी हालत में महूरत कढ़ायिण जी का ज़रूरत न थी रहे।
इतिहास - रिवायत - सिंधी खाधो
हिंदु धर्म ग्रंथन मुजीब विष्णु भगवान जे छहें अवतार परशुराम जो जन्म इन डीन्ह ते थियो हो त ब्रह्मा विष्णु महेश जी त्रिमूर्ती मां ब्रह्मा जे घर संदस पुट्र अक्षयकुमार बि अखण ट्रीज जे डींहुं जाओ हुओ। वेद व्यास ऐं गणेश भगवान बि महाभारत जहिड़े ग्रन्थ जे लिखण जी शुरुआत अखण ट्रीज जहिड़े पवित्र डीन्ह ते कयी हुयी।
हकीकत में जे डिसजे त अखण ट्रीज हिकु मौसमी या सीजनल त्यौहार आहे जेको मुंद मुजीब हलण जी सिखिया डिए थो। पुराणे वक़त में माणुहू घरन में पियण जे पाणी वास्ते कम अचण वारा मटका अखण ट्रीज जे डीन्ह ते बदिलाये नवां रखन्दा हुआ जीयं गरमी जी तपत खां राहत डियण वरो थधो पाणी मिलण में सहूलियत थिये। वक़त में आयल फेरे सबब हाणे न सिर्फ घरन में नवां मटका रखण जी रिवायत बंद थी वयी आहे पर गडोगडु धीउन भेनरुन ऐं ब्राहमण स्वामी खे बि कीमती तोहफ़ा डियण जो रिवाज़ शुरू थी वियो आहे।
पुरातन समे खां वठी सोन चांदी कीमती जायदाद में शामिल रहिया आहिन ऐं लक्मी, सिजु ऐं विष्णु खे सोन जे स्वामी जी मान्यता मिलियिल आहे तहिं करे अखण ट्रीज जे डीन्ह ते सिंधी पहिंजन घरन तोड़े दुकानन ते इन्हन ट्रिहिन जी पूजा कंदा आहिन। केतिरा सिंधी अखण ट्रीज ते रंधणे जा नवां बरतन बि खरीद कन्दा आहिन। इन्हन जो विश्वास आहे त इन करे न सिर्फ रंधणे में हमेशा सुठो खाधो तैयार थींदो पर संदस अन्न धन जा भंडारा सदा भरियिल रहन्दा।
सिंधी खाधो
बियन सिंधी फेस्टीवल्स वांगुर अखण ट्रीज सां बि शरबत ऐं सेसा जहिड़ो खास सिंधी खाधो जुडियिल आहे।
अखण ट्रीज - लोक कहाणियूं ऐं मानियताउं
अखण ट्रीज ते गंगा में सिनान करण खे फलदायी लेखियो वेन्दो आहे छो जो मानियता आहे त भगीरथ जी कोशिशिन सबब जहिं डीन्ह ते आकाश गंगा में वासु करण वारी पवित्र नदी गंगा धरती ते आयी हुयी सो अखण ट्रीज जो डींहुं हुओ।
डखण भारत में इहा मानियता आहे त कुबेर देवता इन डीन्ह ते धन दौलत जी देवी लक्ष्मी जी पूजा अर्चना करे आमु माणुहुन वास्ते धन जो देवता थियण जो वरु हासिल कियो हुओ। डखण भारत में अखण ट्रीज ते जेका पूजा थींदी आहे उन में भगवान विष्णु ऐं लक्ष्मी जी मूरतिन सां गडु कुबेर जी तस्वीर पिण रखी वेंदी आहे।
इहा पिण मानियता आहे त अन्न धन जे भंडार जी देवी अन्नपूर्णा जेका देवी पारवती जो रूप आहे तहिं जो जन्म डींहुं अखण ट्रीज आहे सो माणुहू इन डीन्ह ते पूजा कन्दा आहिन जीयं उन्हन जे घरन में अन्न धन जा भंडारा सदायीं भरियल रहन।
महाभारत काल खां वठी मानियता आहे त जहिं बरितन अक्षय पात्र में वनवास जे दौरान द्रोपदी साधुन वास्ते खाधो रधीन्दी हुयी ऐं जहिं मां द्रोपदी जे खाधे खायिण तायीं सभनी खे भरपेट भोजन मिलन्दो हुओ सो अक्षय पात्र युधिष्टर खे अखण ट्रीज ते ई मिलियो हुओ। सुदामो पिण पहिंजे दोस्त कृष्ण खां मदद वठण वास्ते जहिं डीन्ह ते वियो हुओ सो डींहुं अखण ट्रीज जो हुओ।