बसंत पंचमी

हिक बिये सिंधी डिण होली खां 40 डीन्ह अगु मलिहाये वेन्दड सरसवती देवी जी पूजा वारे त्योहार बसंत पंचमी ते के विरतु पिणु रखन्दा आहिन ऐं पूजा खां पोय पीले रंग वारियूं मिठायूं खाईन्दा आहिन। आम तोर बसंत पंचमी ते मंदिरन ऐं स्कूलन में सरसवती पूजा करण खां हिकु डींहुं अगु पूजा वारी जगह खे सजायो वेन्दो आहे। केतिरिन जो इहो विशवासु आहे त उन्हन जा नंढा बार जे इन डीन्ह ते लिखण जी शुरुआति कंदा त सुठो थींदो।
पुरातन काल में गुरुकुलन में बसंत पंचमी वडे धामधूम सां मलिहायी वेन्दी हुयी ऐं वेझडायी वारन गुरुकुलन जे विद्यार्थिन में केतिरियूं चटाभेटियूं पीणु थींदियूं हुयूं। अजोके समे शहरन जे स्कूलन में बारन जे ज्ञान ऐं पढ़ायी जे विषयन सां लागापो रखण वारियूं चटाभेटियूं थियन थियूं।
किन पुराणन में जिकुरु अचे थो त पारवती जी शिव खे मुडुस जे रूप में हासिल करण वासिते कन्दड तपु डिसी किन ऋषिन काम (पियार जो देवता) जे देवता खे शिव भगवान खे संदस योग समाधी मां बाहिर आणिण में मदद करण वासिते चयो हुओ सो केतिरा ई बसंत पंचमी खे अजोके समे जे त्यौहार वेलेनटाईन डे जो पुरातन रूप चवन्दा आहिन। महाराष्ट्र में त किन परिवारन में अजु बि इहा रिवायत आहे त नओं शादी कयल जोडो शादी खां पोय आयल पहिरियीं बसंत पंचमी ते मंदिर वंञी पूजा कन्दो आहे। पंजाब में बसंत पंचमी ते गुजरात ते उतरायण वांगुर पंतग उडाये खुशी जे इजहार जी रिवायत नजर अचे थी। डखण भारत में केतिरिन ई हंदन ते बसंत पंचमी श्री पंचमी जे रुप में मलिहायी वेन्दी आहे।
बसंत पंचमी उहो डींहुं लेखियो वेन्दो आहे जहिं ते शादी करण लाय महूरत जो विचार करण जी जरुरत न समझी वेन्दी आहे। केतिरिन ई समाज में इन डीन्ह ते सोनु चांदी ऐं वेन्दे रन्धिणे जा बरतन खरीद करण शुभ लेखियो वेन्दो आहे त किन में विदेश वंञण, पढ़ायी वासिते कहिं नयें कोर्स में दाखिला वठण लाय दरिखासत करण लाय बसंत पंचमी शुभ लेखी वंञे थी।