होली - रंगपंचमी
होली -सिंधी डिण [फेस्टीवल] - रंगन जो डिण
सिंधी डिण हूजन या बियन हिंदु कौमुन जा त्यौहार सभनी में हिक गालिह जेका ज़रूर मौजद हूंदी आहे सा आहे जोश, उमंग ऐं उत्साह सां मलिहायिण। होली या रंग पंचमी हिकु अहिडो सिंधी डिण आहे जहिं जो इन्तिज़ार हरको कन्दो आहे। उन जो सबब बि आहे रंगन जो डिण होली मौज मज़े जो उहो मोको आहे जहिंजो लुतुफ हर हिकु वठन्दो आहे। होली शायद त हिक ई सिंधी डिण आहे जेको वढे नंढे जो फरक मिटाये छाड़िन्दो आहे।
होली आम तौर मार्च महीने में मलिहायी वेन्दी आहे। बेशक होली या रंग पंचमी सभ खां मशहूर त्यौहार आहे पर मलिहायीन्दडन जे तादाद जे लिहाज खां डियारीअ खां पोय बियें नंबर जो वढे पैमाने ते मलिहायीन्दो वेन्दड भारतीय त्यौहार आहे। शायद त कुदरत बि इहो चाहे थी त रंगन जो डिण होली वधीक मशहूर त्योहरन में शुमारियो वञें इन करे त होली मार्च महीने में जहिं वक़्त मलिहायी वेन्दी आहे उन वक़त सियारे जी मुंद जी पछाडी हुअण ऐं गर्मीअ जी मुंद जी शुरुआत न थियण सबब वातावरण बि दिलकश हूंदो आहे।
रंगन जो डिण होली न सिर्फ आम इंसान जी ज़िन्दगीअ में ख़ुशीअ रंग भरे वातावरण खे खुशमिजाज़ी सां सरोबोर कन्दो आहे। हिंदी फ़िल्मुन जे वास्ते बि इहो हिकु खास मोको आहे जहिंजो हिंदी फिल्म्स में पूरो पूरो फायदो वरतो वेन्दो आहे चाहे उहो इश्क जो इज़हार छो न हुजे। “रंग दे गुलाल मोहे आयी होली आयी रे ” या वरी “रंग बरसे भीगे चुंनरवाली रंग बरसे ” होली सां लागापो रखन्दड होली गीत केतिरिन हिंदी फिल्म्स खे कामियाब बणायो आहे। हिक धिआनु डियण जोग गालिह इहा बि आहे त सिंधी डिण होली ऐं महाराष्ट्र में मलिहायी वेन्दड रंगपंचमी अलग अलग डींहन ते मलिहाया वेन्दा आहिन।
सिंधी डिण धूडियो को अलग त्यौहार कोन आहे दरअसल होली ब डीहं मलिहायी वेन्दी आहे पहिरियें डीहं होलिका दहन थींदो आहे ऐं बिये डीहं रंग, गुलाल अं अबीर सां होली खेड़ी वेन्दी आहे इन बिये डीहं खे धूडियो चयबो आहे।
होली - सिंधी खाधो
सिंधी जे डिण मलिहायिण वास्ते नामवर आहिन त लज़ीज़ खाधो ठाहिण ऐं खायिण जे शौंक में बि सिंधियिन जो को सानी कोन आहे। डिण चाहे कहीडी बि मुंद जो छो न हुजे हर डिण सां को न को खास सिंधी खाधो ज़रूर जुडियिल हूंदो आहे। रंगन जे डिण होली सां लागापो रखन्दड सिंधी खाधो आहे “घीअर” जेको हिकु तरियिल ऐं रिजियिल खंडु में बुढियिल निज सिंधी खाधो आहे।
होली - ऐतिहासिक अहमयित - जुडियिल कहाणी
राजा हरिणियाकष्यप जी भेण होलिका खे हिक वर जे रूप में हिक लोयी मिलियिल हुयी जेका वेडिहे जे हुअ बाहि मे बि विहे त बाहि उन खे न जलाईन्दी। भाउ जे चवण ते होलिका इहा लोयी वेडिहे प्रल्हाद – जेको पीउ जे मना करण खां पोय बि विष्णु जी पूजा करण खां बाज आयो -खे हंज में खणी बरन्दड काठीयिन जे ढेर ते इन विशवास सां वेठी त वर सबब हुन कहे कुछ न थींदो पर थियो ऊबतो विष्णु भगवान जी माया सां अहिडी हवा हली जो होलिका जी लोयी लही प्रल्हाद जे सरीर जे चोगिरद वेडिहिजी वयी नतीजे तौर प्रल्हाद त बाहि मां सही सलामत बाहिर आयो पर होलिका जली मुई।