जन्माष्टमी गोपाल काळा

सिंधी डिण [फेस्टीवल] – सावण जा सिंधी डिण – गोपाल काळा
सिंधी डिण जन्माष्टमी या श्रीकृष्ण जन्माष्टमी सिंधी तोड़े बियन हिन्दु कौमुन जो अहमियत वारो त्यौहार आहे छो जो इहो भगवान श्रीकृष्ण जो जन्मोत्सव आहे। सिंधी क़ौम जेके सावण जा सिंधी डिण मलिहाईन्दी आहे उन्हन में जन्माष्टमी खे सिरमौर लेखियो वेन्दो आहे। इतिहास मुजीब भगवान श्रीकृष्ण जो जन्म मथुरा जी जेल में अध रात जो थियो हो ऐं इन नयें जावल बार खे पिता वासुदेव रातों रात यमुना पार वृन्दावन में पहुचाये आयो हो।

श्रीकृष्ण जे बालपणे जी संभाल यशोदा माता ऐं नन्दराय कयी हुयी। गोकुल वृन्दावन में रहन्दे कृष्ण पूतना खे मारिण खां सिवाय कालिया मर्दन बि कियो हो। मथुरा अची पोय कंस खे मारे धरतीअ जो बोझो घटायो हुओ। इंद्र जे कोप खां ग्वालन खे बचायिण वास्ते चीच ते गोवरधन परबत खणी बिठो हो। हणोके भारत में मथुरा तोड़े वृन्दावन उतर प्रदेश मतलब उतर भारत में आहिन जहिं करे मुल्क जे बियन हिसन जी भेट उतर भारत में जन्माष्टमी वधीक जोश सां मलिहायी वेन्दी आहे। इहो जोश अं उमंग ऐतिरो वधीक आहे जो केतिरा भेरा जन्माष्टमी खे उत्तर भारत जो त्यौहार पिण चयो वेन्दो आहे।

मुल्क जी आर्थिक राजधानी मुंबई महाराष्ट्र में जन्माष्टमी जे बिये डीहं ते वढे पैमाने ते उत्सव मलिहायिण जी रीत आहे इन खे “गोपाल काळा “या “गोविन्दा आला रे ” चयबो आहे। गोपाल काळा जो लागापो कृष्ण भगवान जे नंढे हूंदे गोकुल वृन्दावन में पहिंजे सखाउन [गोविन्दा ] जी मदद सां मखण चोरी करण सां आहे। गोपाल काळा जे दौरान काफी मथे दहीअ जी हंडी बधी वेन्दी आहे ऐं गोविन्दा टोली इंसानी पिरामिड ठाहे हिक बिये मथां बिही हंडी तोड़ीन्दा आहिन।