इयें ई Blog in Sindhi Devanagiri

काफी समे खां सिंधी भाषा ऐं सिन्धियत बाबत लिखण खां पोय अजु मनु में खियालु आयो त छो न व्हाट्सप्प जे दोस्तन वास्ते कुछ इयें ई पिण लिखां ? पर इयें ई छा लिखां इहो सवाल नांग वांगुर फणु कढ़ी सामहु अची बि रहियो। इन सवाल खे पूरी तरह समझां या मुंहु डियां उनखां अगु मुहिंजो पुराणो वाक़िफ़ निखमिणोमल बि अची पहुतो। अगते वधण खां अगु इहो ज़रूरी आहे त तव्हां खे निखमिणोमल जी वाकफियत डियां। 
मुहिंजे नाने जे गोठ जो रहवासी निखमिणोमल सरकारी नौकरी मां कुछ साल अगु रिटायर थियल शखसु आहे। संदस बिन पुटन मां हिकु मुंबई में मल्टीप्लेक्सन जो मालिक आहे त बियो मदुरै में नौकरी कंदे पहिंजा टे चार शो रूम खोले वेठो आहे। निखमिणोमल खे हिक धीउ मोहनी बि आहे जा शादी करे मूड़स जो मैनहटन अमेरिका में हलंदड मल्टी ब्रांड रिटेल माल पयी संभाले। संदस घरवारी जो स्वर्गवास थिये बिन सालन खां वधीक जो अरसो गुजिरी चुको आहे। मतलब त रिटायर निखमिणोमल छुटल बैल वांगुर आज़ादी अयं बेफिकरीअ जी ज़िंदगी पियो गुज़ारे।
हर महीने सरकारी पेंशन त पयी ई मिली मथां बयी पुट बि बिना विसारे हर महीने बैंक ट्रांसफर पिया डियन। नियाणी मोहनी साल बिन में जडिहिं बि अचे त निखमिणोमल जे बैंक खाते में डॉलरन जी इंट्री ज़रूर थिये। 
आसूदगीअ  जे अंगण में रहण वारे निखमिणोमल कुछ बियन रिटायर थियलन जे सहयोग सां हिक संस्था (हाणे कहिं सिंधीअ वटि पैसा अयं वकतु बयी हुजन अयं उहो का संसथा न ठाहे इहा त अणथियणी गालिह आहे न ) बि ठाही आहे। आखिर सजी उमिर समाज खां वरतो ई वरतो आहे सो मोट में कुछ डियण बि ज़रूरी आहे न ? इन डियण जे सिलसिले में, जे निखमिणोमल जेकडहिं व्हाट्सप्प ते रोज़ सौ बी सौ मेसेज फॉरवर्ड न करे त लगंदो अथस त अजु नेरन ई कोन कयी आहे। खैर।
निखमिणोमल जे सामहूं हूंदे मूं लाय पहिंजे सामहूं बीठल सवाल सां विचारन जी डे वठु करण जो न सवाल आहे न को मतलब। छो जो निखमिणोमल मतलब सजी दुनिया जी खबरुन जो भंडार। हाणे जे समुंड सामहूं हुजे त फुडे बाबत सोचिण समझदारी त न थींदी। विहंदे ई निखमिणोमल शुरू थी वियो। 
एस पी सर सलाह त डियो ! अजु कलह चवन था पंजाहु हज़ारन खां बि घटि खरचु करे पंज डींह दुबई जी सैर करण मुमकिन आहे ? 
मुखे याद अची वियो त हिक संसथा दुबई में सिंधी सम्मेलन करे रही आहे। सो मां निखमिणोमल खे समझायिण चाहियुम त इहो सैर जो पिरोगिराम न पर सिंधी भाषा अयं सिन्धियत जे वाधारे जी हिक कोशिश आहे।
पर निखमिणोमल जा पहिंजा ई तरक अयं दलीलूं हुआ। 
एस पी सर तवहां बि अलाये छा जो छा पियो चवो ? मां अगमें बि गोवा घुमी आयो आहियां न ? उन वक़्त बि इन नमूने जी गालिह थी हुयी पर मुखे खबर आ त तक़रीरुन वकत अधु डेलीगेट्स त कमरे में आराम पिया कनि उहे बाहिर निकता ई तडिहिं जडिहिं डिनर रेडी थी वियो। क्रूज़ ते बि इसटेज ते सिंधी पिरोगिराम पियो हले पर सभु खायिण पियण में पूरा हुआ।
मुखे बि याद आयो त बराबर कुछ वक़त अगु निखमिणोमल पाण सां गडु पहिंजे खरच ते बियन टिन रिटायर शखसन खे वठी गोवा में हिक अखिल भारत सिंधी संसथा जे सालाने इजिलास में शामिल थियो हुओ। मोटी अची अटकल महीनो खनु गोवा जी मौज़ जा किसा पियो सभनी बुधाये रहियो हुओ।
सो मूं विचार कियो त निखमिणोमल हिन भेरे बि पक बियन खे पहिंजे खरच ते दुबई वठी वेंदो – आखिर समाज जे डिनिल खे मोटायिण बि हुन जो फरज़ु आहे ? – त छो न मां इन मोके जो फायदो वठां ऐं सिंधी भाषा अयं सिंधियत जी महफ़ूज़ी जी हलचल सां जुडी बिना खरच पहिंजो नालो कियां ? बस इहो विचार आयो अयं मुहिंजे गालिहायिण जो लहजो बदिलजी वियो। मुहिंजा विचार बुधी निखमिणोमल चयो 
एस पी सर तवहां चवो त बिलकुल सही था। तवहां जहिड़ो शखसु साणु हूंदो त दानु कियिल गायिं जो पुछु पकडे वैतरणी पार करण वांगुर मां बि सिंधी भाषा अयं सिंधियत ते गालिहायिण सां गडोगडु इन विषय खे कुछ त समझी सघंदुम ? पर गालिह पंजाहु हज़ारन जी आहे ? मथां वरी तवहां जो पासपोर्ट बि ठाहिरायिणो पवंदो ? उन ते बि खरचु थींदो ? सो मुखे सोचिणो पवंदो। 
निखमिणोमल त हली वियो पर दोसतो मेहरबानी करे हिन पोसट खे फारवरड न कजो। जे निखमिणेमल पढ़ी वरतो त थी सघे थो तवहां जे अज़ीज़ एस पी सर जे हथन मां दुबई वञण जो हीउ मोको निकरी वञे।
जे तव्हां खे पसन्द आयो ऐं वाहेगुरु जी महर रही त हीउ इयें ई जो सिलसिलो अगते बि इयें ई कायम रखण जी कोशिश कंदुम। हिन लेख ऐं इयें ई सिलसिले जे बियन सभनी लेखन खे  खे हिक तंज न पर मज़ाकिया रचना जी नुक्ते निगाह सां डिसण जी मेहरबानी कंदा। 

सिंधियत सुहिणी रहे
एस पी सर (मंघिरमलानी) कोल्हापुर 
01 जनवरी  2018